ယဖိဒိၣ်မုၣ်န့ၣ် မ့ၢ်ပှၤထီၣ် ခီလ့ၣ်ကၠိ သီသီဖိတဂၤ, ဒီးအတၢ်ဖံးတၢ်မၤအါလၢ ကၠိအတၢ်မၤ, ဒီးတၢ်မၤဘၣ်လိာ်ဘၣ်စးအသးဒီးတၢ်လီၢ်တၢ်ကျဲအသီအဂီၢ်န့ၣ်လီၤ. မ့ၢ်လၢတၢ်ဘံၣ် တၢ်ဘၢအဂ့ၢ်အိၣ်ထီၣ်အဃိ, သိလ့ၣ်ကနုာ်လီၤဟးထီၣ် လၢကၠိကရၢၢ်အဂီၢ်, လိၣ်ဘၣ်ဝဲဒၣ် လံာ်က့တၢ်ပျဲအပနီၢ်န့ၣ်လီၤ. တၢ်မၤအံၤ, ကမ့ၢ်တၢ်မၤအါထီၣ် အတၢ်မၤစရီတဖၣ်အဃိ, ယသံကွၢ်အီၤလၢ ယကဘၣ်မၤစၢၤအီၤဧါန့ၣ်လီၤ. ဒ်သိးကမၤန့ၢ် လံာ်က့တၢ်ပျဲ အပနီၣ် လၢခီလ့ၣ်ကၠိအဝဲၤဒၢးန့ၣ် ယံာ်ဝဲဒၣ်ထဲ စှၤမံးနံးအဃိ, ကဲထီၣ်တၢ်ကမၢကမၣ်လၢအဂီၢ်, ဒီးလၢခံန့ၣ်, စံးဘျုးစံးဖှိၣ်ယၤန့ၣ်လီၤ.

ဘၣ်ဆၣ်, တၢ်ဂ့ၢ်လၢ ယဖိဒိၣ်မုၣ် တသ့ၣ်ညါဝဲဒၣ်န့ၣ် ဒ်သိးယကမၤန့ၢ် လံာ်က့တၢ်ပျဲအဂီၢ်, ယမၤသကိးတၢ်ဒီးကၠိအဝဲၤဒၢးန့ၣ် ယံာ်ဝဲဒၣ်နံၤတဝာ်, လၢတၢ်ကွဲးဘှီဘၣ် အလံာ်ပတံ, ဒီးတၢ်လူၤဃုထၢပာ်ဖှိၣ် လံာ်အုၣ်သးလၢအလိၣ်တဖၣ်န့ၣ်လီၤ. ဘၣ်ဆၣ်, ယတဒုးသ့ၣ်ညါအီၤလၢာ်ဘၣ်, ဒီးယစံးဘၣ်အီၤထဲဒၣ် တၢ်ဂ့ၢ်ကီတအိၣ်ဘၣ်န့ၣ်လီၤ.

တၢ်အဲၣ်တၢ်ကွံန့ၣ် ပာ်လုၢ်ပာ်ပှ့ၤ တၢ်ဂ့ၢ်အဆံးတဖၣ်လီၤတံာ်လီၤဆဲးန့ၣ်လီၤ. ယမၤစၢၤ ယဖိဒိၣ်မုၣ် အတၢ်ဂ့ၢ်ဆံးလီၤတံာ်လီၤဆဲးဖိ လၢအတပာ်သူၣ်ပာ်သးဝဲတဖၣ်န့ၣ် မ့ၢ်ဝဲဒၣ် တၢ်အဲၣ်တၢ်ကွံန့ၣ်လီၤ. လံာ်စီဆှံ စံးဘၣ်ပှၤ ဖဲပှၤအံၣ်စရ့လးဖိတဖၣ် အိၣ်မူအိၣ်ဂဲၤဝဲလၢ ပှၢ်မုၢ်ကနၢအကတီၢ်, ကစၢ်ယွၤ အတၢ်အဲၣ်န့ၣ် ဖျါဝဲဒၣ်လၢ တၢ်ဂ့ၢ်အဆံးလီၤတံာ်လီၤဆဲးခံမံၤ, လၢအမ့ၢ် အကူအသိးဒီးခီၣ်ဖံးတဖၣ်န့ၣ်လီၤ. ဖဲပှၤဂီၢ်မုၢ်တဖၣ်ဘၣ်လဲၤဟးဝ့ၤဝီၤ လၢပှၢ်မုၢ်ကနၢ အနံၣ် ၄ဝ အကတီၢ်, “အကူအသိးတဖၣ် ဒီးခီၣ်ဖံးတဖၣ် တလီၤလံၤ, တဟးဂီၤဘၣ်” (၅မိၤ ၂၉:၅) န့ၣ်လီၤ. အဝဲသ့ၣ် “အခီၣ်ဒၣ်လဲာ် တညိးထီၣ်ဘၣ်” (၅မိၤ ၈:၄) န့ၣ်လီၤ.

ကစၢ်ယွၤအပှၤဂီၤမုၢ်တဖၣ် တတီတလိၤဒီးအီၤဘၣ်ဆၣ်, တညိကွံာ်အပှၤဂီၢ်မုၢ်ဘၣ်. ယွၤ ပာ်ဖျါထီၣ် “တၢ်သးအိၣ် ဒိၣ်ဒိၣ်ကလဲာ်” (နဃ့ ၉:၁၉) န့ၣ်လီၤ. “အတၢ်တလၢ တပှဲၤ တအိၣ်ဘၣ်” (:၂၁). ကစၢ်ယွၤ ကတဲာ်ကတီၤန့ၢ် “တၢ်လၢအဒိၣ်တဖၣ်,” ဒ်အမ့ၢ်, ကစၢ်ယွၤအိၣ်ဒီးအဝဲသ့ၣ်, ယွၤအသးစီဆှံ အတၢ်ဟ့ၣ်ကူၣ်, ဒီးတၢ်အီၣ်တၢ်အီ ဒီးထံအီတဖၣ် (:၁၉-၂၀), ဒီးတၢ်ကူတၢ်သိးဒီးခီၣ်ဖံးတဖၣ်န့ၣ် မ့ၢ်တၢ်အဆံးဘၣ်ဆၣ်, မ့ၢ်တၢ်လၢအလိၣ်ဘၣ်နီၢ်နီၢ်တဖၣ်န့ၣ်လီၤ.

ကစၢ်ယွၤ ပာ်ဖျါဝဲ အတၢ်အဲၣ် ခီဖျိကျိၤကျဲလၢ ပထံၣ်တသ့ (မ့) လၢပတပာ်သူၣ်ပာ်သးတဖၣ်အပူၤန့ၣ်လီၤ. ယွၤအတၢ်အဲၣ်အံၤ လၢပတၢ်အိၣ်မူအပူၤ, တၢ်ဂ့ၢ်အဆံးဖိ တဖၣ်ဒၣ်လဲာ် ထံၣ်ဝဲဒၣ် လီၤတံၢ်တီၤဆဲးန့ၣ်လီၤ.