လၢအပူၤကွံာ်, တယံာ်ဒံးဘၣ် နံၣ်တဖၣ်အတီၢ်ပူၤန့ၣ် မဲးကဲၣ် လဲဒံၣ် (Michael Landy) တဂၤ, မၤဝဲဒၣ် စရီတဘ့ၣ်, ဒီးဂံၢ်ဒွးထီၣ် ကယဲၢ်အတၢ်ဖိတၢ်လံၤတဖၣ်န့ၣ် အိၣ်ဝဲဒၣ် ၇,၂၂၇ ထံၣ်န့ၣ်လီၤ. ဝံၤန့ၣ်ဒီး, တၢ်မၤလၢခံတပတီၢ်, လၢအမၤဝဲန့ၣ် လီၤကမၢကမၣ်ဒိၣ်မးန့ၣ်လီၤ. လၢဝ့ၢ်လိဒိၣ်, ပှၤဆါတၢ်ပှ့ၤတၢ်အါအါဂီၢ်ဂီၢ်, အလီၢ်အကျဲတတီၢ်န့ၣ် အဝဲတ့ဒုးအိၣ်ထီၣ် စဲးဖီကဟၣ် အတၢ်သူၣ်ထီၣ်တဖျၢၣ်, ဒီးမၤဟးဂီၤကွံာ် အတၢ်ဖိတၢ်လံၤခဲလၢာ်, လၢပှၤအါဒံအါဂၤအမဲာ်ညါန့ၣ်လီၤ. အဝဲမၤဟးဂီၤကွံာ် အဆ့ကူဆ့ကၤ, ပှၤတ့ခဲၣ်တၢ်ဂီၤတဖၣ်, တၢ်အဲၣ်အလံာ်လဲၢ်တဖၣ်, တကးဒ်ဘၣ်န့ၣ် အသိလ့ၣ်စ့ၢ်ကီး မၤဟးဂီၤကွံာ်ဝဲဒၣ် လၢစဲးဖီကဟၣ်တဖျၢၣ်အံၤအပူၤန့ၣ်လီၤ. လၢတၢ်ဆါတၢ်ပှ့ၤအတၢ်သူၣ်ထီၣ်အကပၤ, ဖဲပှၤဆါတၢ်ပှ့ၤတၢ်ဖိတဖၣ် နုာ်လီၤဟးထီၣ်အကတီၢ်, ဒုးနဲၣ်ဝဲဒၣ် အတၢ်မၤ, ဒီးသံကွၢ်ဝဲဒၣ် “ပတၢ်ထူးတၢ်တီၤမ့ၢ်တအိၣ်လၢၤဘၣ်န့ၣ်ဒီး, ပကမ့ၢ်တၢ်မနုၤတမံၤလဲၣ်” န့ၣ်လီၤ.

မ့ၢ်လၢပဝဲအါဒံအါဂၤ, ပပှ့ၤန့ၢ်တၢ်ဖိတၢ်လံၤတဖၣ် ဒ်သိးပပာ်ဖျါထီၣ် ပတၢ်မ့ၢ်တၢ်, (မ့) လၢခါဆူညါ ပကအိၣ်မူအိၣ်ဂဲၤဘံၣ်ဘံၣ်ဘၢဘၢအဂီၢ်အဃိ, တၢ်သံကွၢ်အံၤ, မ့ၢ်တၢ်အကါဒိၣ်တမံၤန့ၣ်လီၤ. ကစၢ်ယ့ၣ်ၡူး အတၢ်ကတိၤဟ့ၣ်ဒိတထံၣ်ပာ်ဖျါထီၣ် ပှၤထူးပှၤတီၤတဂၤ, လၢအဟံးပာ်ဖှိၣ် အတၢ်ထူးတၢ်တီၤတဖၣ်, ဒီးအိၣ်မူအိၣ်ဂဲၤ ဒ်ပှၤပှ့ၤန့ၢ်တၢ်ဖိတဂၤအသိးအဂ့ၢ်, ဒီးစံးလီၤအသးလၢ, “သးဧၢ, နတၢ်ဖိတၢ်လံၤအါအါကလဲာ် အိၣ်ပာ်လံလၢအါနံၣ်အါလါအဂီၢ်လံ. အိၣ်ဘှံးဒီးအီၣ်တၢ်အီတၢ်, ဒီးမုာ်လၤတၢ်တက့ၢ်” (လူၤ ၁၂:၁၉) န့ၣ်လီၤ. ဘၣ်ဆၣ်, “တၢ်မ့ၢ်ဃ့န့ၢ်” အသးသမူ, ဖဲမုၢ်နၤအံၤန့ၣ်ဒီး, တၢ်ကမၤအသးဒီးအီၤမနုၤတမံၤလဲၣ်. မ့ၢ်လၢအဝဲပျဲပျၢ် တၢ်အကါဒိၣ်တမံၤအဃိ, အဝဲဘၣ်ကွၢ်ဆၢၣ်မဲာ် ကစၢ်ယွၤ အတၢ်သိၣ်ဃီၣ် (:၂၀-၂၁) န့ၣ်လီၤ.

ပအိၣ်ဒီးတၢ်ထူးတၢ်တီၤန့ၣ်တမ့ၢ် တၢ်ဒဲးဘးဘၣ်. မဲးကဲၣ် လဲဒံၣ် တဂၤ လိၣ်ဘၣ်ဝဲ ဒံးတၢ်ကူတၢ်သိးန့ၣ်လီၤ. ဘၣ်ဆၣ်, ဒ်သိးပကဃုထံၣ်န့ၢ် ပတၢ်အိၣ်မူ, ဒီးပတၢ်မ့ၢ်တၢ် ခီဖျိလၢပတၢ်ထူးတၢ်တီၤအဂီၢ်, ဖဲတၢ်လ့ပစီၤလီၤဘၣ်ပှၤန့ၣ်ဒီး, ကစၢ်ယ့ၣ်ၡူး မၤသ့ၣ်နီၣ်ပှၤလၢ, “ပှၤကညီအတၢ်မူ တမ့ၢ်ဘၣ် အစုလီၢ်အခီၣ်ခိၣ် အိၣ်အါအါကလဲာ်” (:၁၅) ဘၣ်န့ၣ်လီၤ. နတၢ်ဖိတၢ်လံၤတဖၣ် မ့ၢ်တအိၣ်လၢၤဘၣ်န့ၣ် နကမ့ၢ်မတၤတဂၤလဲၣ်. နကမ့ၢ် ကစၢ်ယွၤ အဖိခွါလၢ အဲၣ်ဘၣ်ဝဲနီၢ်နီၢ်တဂၤ (စံး ၁၀၃: ၁၇, အ့း ၅:၁) အဖၢမုၢ်ဧါ. ခီဖျိလၢပတၢ်မ့ၢ်တၢ် အဘံၣ်အဘၢဒ်သိးအံၤအပူၤန့ၣ် ပကမ့ၢ် ပှၤထူးပှၤတီၤလၢ ကစၢ်ယွၤ, ဒီးပှၤဂုၤပှၤဂၤအမဲာ်ညါ သ့ဝဲဒၣ်န့ၣ်လီၤ.