ဖဲပလဲၤဟးလိာ်ကွဲဆူ ကၠီးရှၢၣ် သ့ၣ်ပှၢ်ကရၢၢ် (Joshua Tree National Park)လၢကီၢ်စဲၣ် ခဲၣ်လံၣ်ဖိနံယါ အကတီၢ်, ပထံၣ်သ့ၣ်လီၤဆီတဖၣ် လၢအဒ့အလၣ်တဖၣ် အိၣ်ကစီၤထီၣ်အသးဆူ မူခိၣ်အသိးန့ၣ်ဒီး, ထုးန့ၢ်ပသူၣ်ပသးဒိၣ်မးန့ၣ်လီၤ. ပှၤအါဒံအါဂၤ နာ်ဝဲဒၣ်လၢ ပှၤဟဲတုၤဆိ ဖဲတၢ်လီၢ်တၢ်ကျဲအံၤဒီးအိၣ်ဆိးတဖၣ်, လၢတၢ်သ့ၣ်နီၣ်ထီၣ်က့ၤ တၢ်ဂ့ၢ်လၢလံာ်စီဆှံအလီၢ်လံၤတကတြူၢ်, ဖဲ စီၤယိၤရှူ ယူာ်ထီၣ်အဘီဆူမူခိၣ် ဒ်အမ့ၢ်တၢ်ပနီၣ်လၢ ကစၢ်ယွၤ အတၢ်အိၣ်ဒီးအပှၤဂီၢ်မုၢ်, ဒီးအတၢ်မၤစၢၤအဂီၢ်, ကိးဝဲဒၣ် သ့ၣ်တဖၣ်အံၤလၢ ကၠီးရှၢၣ်သ့ၣ်ထူၣ် (Joshua Tree) န့ၣ်လီၤ.

ဖဲ ပှၤအံၣ်စရ့လးဖိတဖၣ် နုာ်လီၤအိၣ်ဆိးလၢ ကီၢ်ကနၤဧၣ်အကတီၢ်, လိၣ်ဘၣ် ကစၢ်ယွၤအတၢ်မၤစၢၤ လၢတၢ်ဒုးတၢ်ယၤအဂီၢ်န့ၣ်လီၤ. ဘၣ်ဆၣ်, မ့ၢ်လၢအဝဲသ့ၣ်မၤတၢ်ဒဲးဘးအဃိ (ယိၤရှူ ၇:၁၁-၁၂), ပှၤဂဲဖိတဖၣ် မၤနၢၤဝဲဒၣ် ပှၤအံၣ်စရ့လးဖိတဖၣ်န့ၣ်ဒီး, အဝဲသ့ၣ် ပျံၤဝဲဒၣ်လၢ ကဘၣ်လဲၤဒုးပှၤဂဲဖိတဖၣ်န့ၣ်လီၤ. ဘၣ်ဆၣ်, ကစၢ်ယွၤ ဟ့ၣ်ဂံၢ်ဟ့ၣ်ဘါ စီၤယိၤရှူလၢ “ပျံၤတၢ်တဂ့ၤ, ဘၣ်ယိၣ်တၢ်တဂ့ၤ” (၈:၁) န့ၣ်လီၤ. ဒီးကစၢ်ယွၤ စံးဘၣ် စီၤယိၤရှူ, “ယူာ်ထီၣ်ဘီလၢ အအိၣ်လၢနစုပူၤတဘိဆူ ဂဲန့ၣ်တက့ၢ်. အဂ့ၢ်ဒ်အံၤ, ယကဟ့ၣ်လီၤအီၤလၢနစုပူၤ” (:၁၈) န့ၣ်လီၤ. ဒီးစီၤယိၤရှူ ဒိကနၣ် ကစၢ်ယွၤ, “ဒီးတထုးကဒါက့ၤဘၣ်အစုလၢ အယူာ်ထီၣ်ဘီတဘိန့ၣ်” တုၤအမၤနၢၤကွံာ်တၢ်ဒုး (:၂၆) န့ၣ်လီၤ. ဘီလၢ စီၤယိၤရှူယူာ်ထီၣ်ဝဲတဘိန့ၣ် တမ့ၢ်လၢ အမၤနၢၤတၢ်ဒုးတၢ်ယၤဘၣ်. မ့မ့ၢ် ကစၢ်ယွၤ အတၢ်အၢၣ်လီၤ အတၢ်ပနီၣ်တမံၤလၢ ကမၤစၢၤအပှၤဂီၢ်မုၢ်, ကအိၣ်ဒီးအပှၤဂီၢ်မုၢ်န့ၣ်လီၤ.

ဖဲပဘၣ်ကွၢ်ဆၢၣ်မဲာ်တၢ်တၤအကီအခဲတဖၣ် အဆၢကတီၢ်, တၢ်မၤသ့ၣ်နီၣ်ထီၣ်က့ၤတၢ်, လၢအမ့ၢ် ကစၢ်ယွၤအိၣ်ဒီးပှၤန့ၣ် ကဲထီၣ်တၢ်မၤစၢၤလၢပဂီၢ်သ့ဝဲဒၣ်န့ၣ်လီၤ. တၢ်ဘျးလီၤစဲၤ လံာ်စီဆှံတဆၢလၢ ပဟံၣ်ပဃီ, ကစၢ်ယွၤ အတၢ်ဘၣ်တ့
တၢ်ဂီၤဖိတဘ့ၣ်လၢ ထုးန့ၢ်ပသး, ဒီးတၢ်လံာ် ထူၣ်စုညါအတၢ်ပနီၣ်လၢပကိာ်လိၤန့ၣ် တကဲထီၣ် တၢ်မၤစၢၤဘၣ်ဆၣ်, ဒ်သိးတၢ်ကမၤသ့ၣ်နီၣ်ထီၣ်က့ၤပှၤလၢ ကစၢ်ယွၤအိၣ်ဒီးပှၤ, အိၣ်ဒီးအစိအကမီၤအဂ့ၢ်န့ၣ် ကစၢ်ယွၤ စူးကါဝဲ တၢ်သ့ၣ်တဖၣ်အံၤ သ့ဝဲဒၣ်န့ၣ်လီၤ.