လၢတၢ်သးတံာ်တာ်အပူၤ, ကၠိစဲး (Joseph) လူၤကွၢ်ဃုခွဲးခွး တၢ်ဖံးတၢ်မၤအစရီန့ၣ်လီၤ. လၢအပူၤကွံာ် တၢ်ကွၢ်ထွဲဘုၣ်အီၣ်ဘုၣ်အီပှၤတမှံၤ အတၢ်ဖံးတၢ်မၤန့ၣ် ဒိးန့ၢ် ဝဲဒၣ်လါလဲဂ့ၤဂ့ၤဘၣ်ဆၣ်, ဒ်အမ့ၢ်ပှၤစူၢ်က့ၤနာ်က့ၤ ကစၢ်ခရံာ်သီသီတဂၤ, လၢကလဲၤဘူၣ်သကိးဘါသကိးယွၤအဂီၢ်, ညီနုၢ်နွံအကတၢၢ် တၢ်ဆီတလဲတၢ်မၤအဆၢကတီၢ် လၢတၢ်ဆါတၢ်အီၣ်ကျးအတၢ်ဖံးတၢ်မၤန့ၣ် ကီခဲဝဲဒၣ်လၢအဂီၢ်န့ၣ်လီၤ. အဝဲကအုကစွါထီၣ်ဝဲဒၣ်လၢ “ဘၣ်မနုၤအဃိ, ကစၢ်ယွၤတစံးဆၢယတၢ်ထုကဖၣ်န့ၣ်လဲၣ်.” “မ့ၢ်လၢကစၢ်ယွၤ တအဲၣ်ဒိး ယကလဲၤဘါယွၤဘၣ်န့ၣ်ဧါ” န့ၣ်လီၤ.
တချုးလၢ ကၠိစဲး ထံၣ်လီၤက့ၤအသးလၢ ကဘၣ် မၤဘၣ်လိာ်က့ၤ အတၢ်မုၢ်လၢ်ကွၢ်စိတဖၣ်, ဒီးလူၤကွၢ်ဃုတၢ်ဖံးတၢ်မၤအဂၤအဂီၢ်, တၢ်ဆၢကတီၢ်ကအိၣ်ဝဲတနံၣ်ဝံၤန့ၣ်ဒီး, အကတၢၢ်န့ၣ် ဒိးန့ၢ် တၢ်ဖံးတၢ်မၤလၢ တၢ်မၤအဆၢကတီၢ်ဘၣ်လီၢ်ဘၣ်စးဝဲဒၣ်လၢအဂီၢ်န့ၣ်လီၤ. ကၠိစဲး သ့ၣ်ညါနၢ်ပၢၢ်ဝဲဒၣ်လၢ တၢ်အိၣ်ခိးဖးယံာ်ဖးထီန့ၣ် ဒုးကဲထီၣ်အီၤ ပှၤဒိၣ်တုာ်ခိၣ်ပှဲၤတဂၤလၢ ကဆၢတဲာ်တၢ်တဖၣ်အဂီၢ်အဃိ, စံးဘျုးဝဲဒၣ် ကစၢ်ယွၤ
န့ၣ်လီၤ. ကၠိစဲး ဒိးန့ၢ် တၢ်မၤလိ ခီဖျိလၢတၢ်ဆီတလဲ တၢ်ဖံးတၢ်မၤအပတီၢ်အံၤန့ၣ် လၢတၢ်အိၣ်မူအပူၤ, တၢ်သူၣ်စူၤသးစူၤအခီပညီ မ့ၢ်တၢ်ဒ်လဲၣ်, ဒီးတၢ်နာ်န့ၢ် ကစၢ်ယွၤ ဒ်သိးကလီၣ်ဖျါထီၣ် အတၢ်တိာ်ကျဲၤ လၢအကတီၢ်ဒၣ်ဝဲအဂီၢ်န့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူး လၢအလီၤပြံလီၤပြါ, ဒီးအဘၣ်နးဘၣ်ဖှီၣ်တဖၣ်အဂီၢ်, စီၤယၤကိာ် ပာ်ဖျါထီၣ် တၢ်ဂ့ၢ်အံၤန့ၣ်လီၤ. ဒ်သိးအဝဲသ့ၣ်တဟ့ၣ်လီၤအသးအဂီၢ်, ဟ့ၣ်ဂံၢ်ဟ့ၣ်ဘါဝဲဒၣ်လၢ, “မ်တၢ်ဝံသးစူၤအိၣ်ဒီးအတၢ်မၤအလၢအပှဲၤ, ဒ်သိးသုကလၢထီၣ်ပှဲၤထီၣ်, ဒီးအိၣ်ဒီးတၢ်ခဲလၢာ်, ဒီးတလီၤစှၤဘၣ်လၢတၢ်နီတမံၤဘၣ်” (ယၤကိာ် ၁:၄) န့ၣ်လီၤ. တၢ်ဃ့သကွံာ်ကညးယွၤ လၢတၢ်ကူၣ်သ့, တၢ်အိၣ်ခိးတၢ်, ဒီးတၢ်ဆၢထၢၣ်ဂၢၢ်ကျၢၢ် (:၅-၆), အပတီၢ်အဆီတဖၣ်န့ၣ် ကမၤဒိၣ်ထီၣ်အါထီၣ် တၢ်သးစူၤ, ဒီးတၢ်နာ်သန့ၤယွၤ, ဃုာ်ဒီးတၢ်မၤစၢၤမၤဒိၣ်ထီၣ် အဝဲသ့ၣ်အတၢ်ဒိၣ်တုာ်ခိၣ်ပှဲၤ, ဒ်အဝဲသ့ၣ်မၤလိသ့ၣ်ညါအါထီၣ် အနီၢ်ကစၢ်အသး, ဒီးကစၢ်ယွၤအဂ့ၢ်န့ၣ်လီၤ.
တၢ်အိၣ်ခိးကွၢ်လၢ် ကစၢ်ယွၤ အတၢ်စံးဆၢန့ၣ် တၢ်ကီတၢ်ခဲ ကအိၣ်ဝဲဘၣ်ဆၣ်, ကဒုးဒိၣ်တုာ်ခိၣ်ပှဲၤပှၤ, ဒီးကဒုးအိၣ်ဂၢၢ်ဆိးကျၢၤအါထီၣ်ပှၤ, ကမၤဆူၣ်ထီၣ် ပတၢ်စူၢ် တၢ်နာ်, ဒီးကမၤယိာ်ထီၣ် ပတၢ်နၢ်ပၢၢ် တၢ်နာ်န့ၢ်ယွၤန့ၣ် မ့ၢ်တၢ်ဒ်လဲၣ်န့ၣ်လီၤ.