ဖဲလၢ ယၤဒီးယဝၤ, အဲၣ်လဲ(န) (Alan), ပပာ်လီၤပသးလၢ ပကသုးအိၣ်ဆိးလၢ ဝ့ၢ် ဖံၣ်လဒဲဖံယၤ, (Philadelphia) ဆူထံကီၢ်အတခီတဝာ်, ဒ်သိးယဝၤကထီၣ် ကၠိဆူညါအဂီၢ်န့ၣ်လီၤ. အကတီၢ်ဖဲန့ၣ်, ယတၢ်ဖံးတၢ်မၤတအိၣ်ဒံးဘၣ်, ကၠိဖိဟံၣ်ဒွဲ အဂီၢ်စ့ၢ်ကီး, မ့ၢ်ပကဘၣ်မၤဒ်လဲၣ်န့ၣ် ပတသ့ၣ်ညါဘၣ်. ဘၣ်ဖဲမုၢ်အိၣ်ဘှံးအနံၤ တနံၤ, တချုးလၢ ပလဲၤဒံးဘၣ်တၢ်အကတီၢ်ဖိန့ၣ် လၢပတၢ်အိၣ်ဖှိၣ်အပူၤ, ပှၤလၢပသ့ၣ်ညါလိာ်သးတဂၤန့ၣ် ဒုးသ့ၣ်ညါပှၤလၢ ကၠိဖိလီၤလံၤတဂၤ, လၢအမၤလိတ့ၢ်ဝဲဒၣ် ဖဲဖၠၣ်စိမိၤလၢ အဲၣ်လဲ(န) ကလဲၤထီၣ်န့ၣ်လီၤ. ဒီးအဝဲစံးဘၣ်တဲဘၣ် ပှၤဟံၣ်ဒၢးလၢအပှ့ၤကလံၤအကြၢးအဘၣ်တဒၢးအဂ့ၢ်န့ၣ်လီၤ. လၢခံ, တချုးပဟးထီၣ် န့ၣ်ဒီး, ပှၤမၤသကိးတၢ်ဒီးယၤတဂၤန့ၣ် ဒ်သိးယကဆဲးကျိးစံးကတိၤတၢ်ဒီး ပှၤခရံာ်ဖိအတၢ်ကရၢကရိအဂီၢ်, ဟ့ၣ်လီၤယၤ ပှၤတဂၤအမံၤန့ၣ်လီၤ. ကစၢ်ယွၤစံးဆၢ ပတၢ်ထုကဖၣ်, ဒီးဟ့ၣ်လီၤပှၤ တၢ်ခွဲးတၢ်ယာ်တဖၣ်အကျါန့ၣ် ပာ်ဃုာ်ဒီးဟံၣ်ဒၢး, ဒီးတၢ်ဖံးတၢ်မၤ ခီဖျိလၢအပှၤကညီတဖၣ်န့ၣ်လီၤ. လၢပတၢ်သုးလီၢ်သုးကျဲအဂီၢ်, တံၤသကိး, ဒီးဟံၣ်ဒူၣ်ဃီထၢတဖၣ် မၤစၢၤပှၤ, ဒီးဆှၢပှၤလၢ တၢ်ထုကဖၣ်န့ၣ်လီၤ.
ပှၤကွဲးလံာ်တၢ်စံၣ်တဲၤတဲလီၤတၢ် ကွဲးပာ်ဖျါဝဲ တၢ်ကဲဘျုးကဲဖှိၣ်တဖၣ်လၢ တၢ်တလဲၤခီဖျိတၢ်အိၣ်မူ ထဲတဂၤဧိၤအဂ့ၢ်, “ပှၤခံဂၤဂ့ၤန့ၢ်ပှၤတဂၤတက့ၢ်” (၄:၉) န့ၣ်လီၤ. ပှၤခံဂၤ မၤဝံၤတၢ်ဖံးတၢ်မၤ အါန့ၢ်ဒံးပှၤမၤတၢ်ထဲတဂၤဧိၤ, ဒီးမၤစၢၤလိာ်အသးသ့ဝဲဒၣ်လၢ တၢ်ကျဲးစၢးဂဲၤလိာ်တဖၣ်အပူၤ, ကဲထီၣ်ပှၤလဲၤသကိးမၤသကိးတၢ်, ဒီးဒီတဒၢ လိာ်သးလၢ တၢ်လီၤပျံၤလီၤဖုးသ့ဝဲဒၣ် (:၉-၁၁) န့ၣ်လီၤ. စံးကဒီးဝဲလၢ, “ပျံၤပိၤအသး သၢပလွံတဘိန့ၣ် ပှၤတမၤတဲာ်ဘၣ်ချ့သဒံးဘၣ်” (:၁၂) န့ၣ်လီၤ. ပပှၤတဝၢန့ၣ် အိၣ်ဒီးတၢ်ကဲဘျုးကဲဖှိၣ် အဒိၣ်အအါ, ဂံၢ်ထံးတဖၣ်, တၢ်ဆီၣ်ထွဲမၤစၢၤတၢ်တဖၣ်အိၣ်ဝဲဒၣ်အါအါဂီၢ်ဂီၢ်န့ၣ်လီၤ.
အဲၣ်လဲ(န)ဒီးယၤ ပဘၣ်ဘျုးဘၣ်ဖှိၣ် ခီဖျိပပှၤတဝၢလၢ ပပာ်လီၤတဲာ်တ့ၢ်အီၤ န့ၣ်လီၤ. လၢဝ့ၢ်ဖးဒိၣ်အံၤအပူၤန့ၣ် ဒ်သိးပသးကပလၢၤဘၣ်ဝဲ ဒ်ပဟံၣ်အသိး, ဒီးပကတ့ဒုးအိၣ်ထီၣ်ပပှၤတဝၢအသီအဂီၢ်, ကစၢ်ယွၤ မၤစၢၤပှၤန့ၣ်လီၤ. မ့ၢ်နသးကလၢၢ်ဘၣ်နဲလၢ နအိၣ်ထဲဒၣ်တဂၤဧိၤန့ၣ်ဒီး, ဃ့တၢ်ဒ်သိးကစၢ်ယွၤ ကမၤစၢၤနၤလၢ နကဃုထံၣ်န့ၢ် တံၤသကိးတဂၤ, တၢ်အိၣ်ဖှိၣ်လၢအဂ့ၤတဖု, (မ့) တၢ်လီၢ်တတီၤလၢ နကမၤဂ့ၤမၤစၢၤ ပှၤတဝၢအဂီၢ်န့ၣ်တက့ၢ်.