တၢ်ထိၣ်ဆၢတဲာ် တၢ်ဆၢကတီၢ် အယူနံးန့ၣ် ဘၣ်တၢ်ထိၣ်ဒွးအီၤ ခီဖျိလၢမူကပိာ် စဲအ့ၣ်ပီညါအက့ၢ်အဂီၤ, ဒ်အမ့ၢ် ဟီၣ်ခိၣ်ဖျၢၣ်လဲၤတရံးအသး, ဒီးအတၢ်လဲၤတရံးမုၢ်အသိးန့ၣ်, တုၤလၢ ၁၉၆၇ နံၣ်န့ၣ်လီၤ. ဘၣ်ဆၣ်, နံၣ်ကယၤတဖၣ်လဲၤပူၤကွံာ်ဝံၤန့ၣ်ဒီး, ကတၢ်ဂ့ၢ်ကီအိၣ်ထီၣ်ဝဲဒၣ်န့ၣ်လီၤ. နီၢ်နီၢ်န့ၣ် ဟီၣ်ခိၣ်ဖျၢၣ်အံၤ, အတၢ်လဲၤန့ၣ်ဃၢလီၤ စှၤလီၤလၢ အမူဖျၢၣ်အကျိၤန့ၣ်လီၤ. ပှၤစဲအ့ၣ်ဖိတဖၣ် ဃုထံၣ်န့ၢ်ဝဲလၢ တၢ်ဆၢကတီၢ်စဲးကီာ်အယူနံးန့ၣ် ယံာ်ထီန့ၢ်ဒံး ညီနုၢ်တၢ်ထိၣ်ဒွးအီၤန့ၣ်လီၤ. စးထီၣ်လၢ ကစၢ်ခရံာ်အမုၢ်နံၤတဖၣ်န့ၣ် တၢ်ထိၣ်ဒွး တၢ်ဆၢကတီၢ် လၢဟီၣ်ခိၣ်လဲးတရံးအသး လီၢ်မၢ်ကွံာ် တစဲးဘၣ်တစဲးန့ၣ် အိၣ်ဝဲဒၣ်သၢနၣ်ရံၣ်ပှဲၤပှဲၤလံန့ၣ်လီၤ.

မ့ၢ်ဝဲလီၤ. တၢ်ထိၣ်ဒွးတၢ်ဆၢကတီၢ် ဒ်အမ့ၢ် မူကပိာ်ပီညါဘၣ်ဃးဒီးမူဖျၢၣ်လဲၤတၢ်အကျိၤတဖၣ်, ဒီးတၢ်လဲၤတရံးသးတဖၣ်အသိး, ကစၢ်ယွၤတ့လီၤဝဲဒၣ်န့ၣ်လီၤ. ဘၣ်သ့ၣ်သ့ၣ်, ပှၤစဲအ့ၣ်ဖိတဖၣ် အတၢ်ထိၣ်ဒွးတဖၣ်န့ၣ် ကကီခဲန့ၢ်ဒံး တၢ်လၢ
ပဆိကမိၣ်တ့ၢ်လံတဖၣ်န့ၣ်လီၤ. ဘၣ်ဆၣ်, ပအိၣ်ဂၢၢ်ဆိးကျၢၢ်သ့ဝဲဒၣ်လၢ စီၤပ့းတရူး အတၢ်ကတိၤတဖၣ် “လၢကစၢ်အမဲာ်ညါန့ၣ်, မုၢ်တနံၤမၤအသးဒ်နံၣ်တကထိအသိး” (၂ပ့း ၃:၈) န့ၣ်လီၤ. အဝဲ ဂ့ၢ်လိာ်ထီဒါ ပှၤအသးဒ့ဒီတဖၣ်လၢ အပာ်ဒ့ၣ်ပာ်ကမၣ် ကစၢ်ယ့ၣ်ရှူး တဟဲက့ၤဒံးဘၣ်အဂ့ၢ်န့ၣ်လီၤ. “ကစၢ်တမၤယံာ်မၤနီၢ်တၢ်လၢအတၢ်စံးပာ်အဂ့ၢ်အကျိၤ, ဒ်ပှၤကညီတနီၤနီၤ ပာ်တၢ်မၤယံာ်မၤနီၢ်အသိးန့ၣ်ဘၣ်” (:၉) န့ၣ်လီၤ. ကစၢ်ယွၤ မၤတၢ်န့ၣ် လၢအဆၢအကတီၢ်ဒၣ်ဝဲ လၢအတၢ်ပညိၣ်တဖၣ်အဂီၢ်န့ၣ်လီၤ.

တၢ်အိၣ်ဒံးဝဲအါမး, ယွၤ “အဆၢအကတီၢ်” အံၤ အိၣ်ဟဲထီၣ်လၢအတၢ်အဲၣ် န့ၣ်လီၤ. “မ့ၢ်အဝံသးစူၤသုဃဲးဃဲးလီၤ. တဘၣ်ဘၣ်အသးလၢ ပှၤကတုၤလၢတၢ်ဟးဂူာ်ဟးဂီၤနီတဂၤဘၣ်” (:၉) န့ၣ်လီၤ. ကစၢ်ယ့ၣ်ရှူး ကဟဲက့ၤဝဲဒၣ်, ဒီးကစၢ်ယွၤအဲၣ်ဒိး ဝဲလၢ ပှၤကိးဂၤဒဲး ကအိၣ်ဒီးတၢ်ခွဲးတၢ်ယာ် ဒ်သိးကဟဲက့ၤဆူအအိၣ်န့ၣ်လီၤ. တၢ်ဂ့ၢ်အံၤမ့ၢ်တၢ်ဒုးနဲၣ်ဖျါထီၣ်အတၢ်အဲၣ်န့ၣ်လီၤ. ဖဲတၢ်အကတီၢ်အဘၢၣ်စၢၤန့ၣ် ပကဘၣ် “ကျဲးစၢးလၢအကထံၣ်န့ၢ်သုလၢ သုတမဲၣ်သူတမဲၣ်ဂီၤဘၣ်” (:၁၄) န့ၣ်လီၤ.

တၢ်ဆၢကတီၢ်, ယွၤ, ဒီးတၢ်အဲၣ် သ့ၣ်တဖၣ်အံၤ ဘျးစဲလိာ်သးန့ၣ်လီၤ. ဖဲလၢ မုၢ်နံၤလၢခံအကတၢၢ်တဖၣ်အပူၤန့ၣ် ယွၤအတၢ်အဲၣ်န့ၣ် တဆံးလီၤစၢ်လီၤဝဲဒၣ် နီတဘျီဘၣ်န့ၣ် မ့ၢ်တၢ်လၢအလီၤတံၢ်တမံၤန့ၣ်လီၤ.