ပှၤခရံာ်ဖိခိၣ်နၢ် ခံဆံခံဂၤတဖုန့ၣ် လၢတၢ်ခူသူၣ်အပူၤ, ဒ်သိးကထံၣ်လိာ်သး, ဒီးမၤလိန့ၢ်တၢ်လၢ တၢ်အိၣ်ဖှိၣ်သရၣ်တဂၤ, အိၣ်ဟဲဝဲလၢ ထံကီၢ်အဂၤတဘ့ၣ်အဂီၢ်, ဘၣ်လဲၤဝဲနံၤတဝာ်အကျဲန့ၣ်လီၤ. တၢ်မ့ၢ်ဘၣ်ဖီၣ်န့ၢ်ဒီး, တၢ်အိၣ်ဖှိၣ်သရၣ်န့ၣ် ကဘၣ်တၢ်နီၣ်ဟးထီၣ်လၢကီၢ်ပူၤ, ဒီးပှၤအဂၤတဖၣ် ကဘၣ်လီၤဃိာ် သၢနံၣ်န့ၣ်လီၤ. ပှၤခံဆံခံဂၤအကျါ တဆံဃိးဂၤန့ၣ် မ့ၢ်လၢအတၢ်စူၢ်နာ်ကစၢ်ခရံာ်အဃိ, ဘၣ်လီၤတ့ၢ်လံဃိာ်န့ၣ်လီၤ.

လံာ်စီဆှံ တဆံယဲၢ်ဘ့ၣ်လၢ အဟဲစိာ်ဝဲန့ၣ် တၢ်အိၣ်ဖှိၣ်သရၣ် ဟ့ၣ်လီၤဝဲဝံၤန့ၣ်ဒီး, ပိာ်မုၣ်တဂၤန့ၣ် ဟ့ၣ်လီၤဝဲအလံာ်စီဆှံဆူ ပှၤအဂၤတဂၤန့ၣ်လီၤ. အဝဲမ့ၢ်ဘၣ်လီၤဃိာ်န့ၣ် ဒ်သိးလံာ်စီဆှံအတၢ်ကူၣ်သ့တဖၣ် ကအိၣ်ဂၢၢ်ဆိးကျၢၤလၢအသးကံၢ်ပူၤအဂီၢ်, ဒ်ပှၤဂၤတဖၣ်အသိး, အဝဲတိၢ်ရူးတ့ၢ်ဝဲ လံာ်စီဆှံအဆၢဒိၣ်တဖၣ်န့ၣ်လီၤ. လၢခံ, ပိာ်မုၣ်န့ၣ် စံးဘၣ် တၢ်အိၣ်ဖှိၣ်သရၣ်လၢ ကဃ့ဘါထုကဖၣ်န့ၢ်တၢ်လၢ အဝဲသ့ၣ် အတၢ်အိၣ်ဖှိၣ် ကပာ်ဖှိၣ်ဘူၣ်ထူဘါယွၤ လၢတၢ်သဘျ့အပူၤအဂီၢ်, ဒ်တၢ်အိၣ်ဖှိၣ် သရၣ်အတၢ်အိၣ်ဖှိၣ်အသိးန့ၣ်လီၤ. တၢ်အိၣ်သရၣ်န့ၣ် ကမၢကမၣ်ဝဲဒၣ်လၢ အဝဲသ့ၣ် ဟ့ၣ်လီၤအသး, တူၢ်ခီၣ်တၢ်မၤအၢမၤနး, ဒီးကလီၤဘၣ်ဃိာ်ဒၣ်လဲၣ်ညိကွံာ်အသး အဃိ, ဒ်ပိာ်မုၣ်သကွံာ်ကညးအီၤအသိး, ကဘၣ်ဃ့ထုကဖၣ်ဝဲအလီၢ်န့ၣ် အဝဲဃ့ဘါထုကဖၣ်ဝဲလၢ အတၢ်အိၣ်ဖှိၣ်ကလီၤဂာ်ဒ်အဝဲသ့ၣ်အတၢ်အိၣ်ဖှိၣ်အသိးန့ၣ်လီၤ.

ပှၤစူၢ်က့ၤနာ်က့ၤကစၢ်ခရံာ် လၢဟီၣ်ခိၣ်ဒီဘ့ၣ်တဖၣ် ဘၣ်တၢ်မၤအၢမၤနးလၢ အဝဲသ့ၣ်အတၢ်စူၢ်တၢ်နာ်အဃိန့ၣ်လီၤ. ပှၤတနီၤန့ၣ် တူၢ်ဘၣ်ခီၣ်ဘၣ်တၢ်နးနးကျံးကျံး, အါန့ၢ်ဒံးပှၤဂၤန့ၣ်လီၤ. ဖဲတၢ်အိၣ်မူလၢခရံာ်အဂီၢ်န့ၣ် တၢ်ဟ့ၣ်ဘၣ်အပှ့ၤကလံၤမ့ၢ်ဒိၣ် မ့ၢ်အါထီၣ်န့ၣ်ဒီး, ဒ်သိးပှၤစူၢ်က့ၤနာ်က့ၤတၢ်ဖိတဖၣ်ခဲလၢာ် ကဂုၤက့ၤသုးက့ၤအသးဆူလီၢ်ခံအဂီၢ်, တၢ်လ့ပစီလီၤဘၣ်အဝဲသ့ၣ် သ့ဝဲဒၣ်န့ၣ်လီၤ. ဘၣ်ဆၣ်, ဒ်သိးပကစူးကါ ယွၤအတၢ်ဟ့ၣ်တဖၣ်လၢ “တၢ်စိတၢ်ကမီၤ, ဒီးတၢ်အဲၣ်တၢ်ကွံ, ဒီးတၢ်သူၣ်ဂၢၢ်သးကျၢၤ” (၂ တံၤ ၁:၇) အဂီၢ်, သးစီဆှံကစၢ် ကမၤစၢၤပှၤန့ၣ်လီၤ. ဒ်သိးပကနီၤဟ့ၣ်ခီ တၢ်သးခု ကစီၣ် လၢတၢ်သူဒူသးဒူ, ဒီးလၢတၢ်အဲၣ်တၢ်ကွံအဂီၢ်, ယွၤကမၤစၢၤပှၤ ဖဲအဝဲနဲၣ်ဆှၢ ဝဲဒၣ်ပှၤ တၢ်လီၢ်တပူၤလၢ်လၢ်န့ၣ်လီၤ. လၢပဂီၢ်, မ့ၢ်လၢကစၢ်ယွၤမၤတ့ၢ်လံတၢ်ခဲလၢာ်အဃိ (:၉-၁ဝ) န့ၣ်လီၤ. ပတူၢ်လိာ် တၢ်လုၢ်ထီၣ်သးသမူအပှ့ၤကလံၤ ခီဖျိတၢ်ဟ့ၣ်လီၤဘျုးလီၤသးဆူ ကစၢ်ခရံာ်, ဒီးပၢၤဃာ် “တၢ်ကတိၤအဂ့ၤအဘၣ်လၢတၢ်နာ်, ဒီးတၢ်အဲၣ်တၢ်ကွံလၢ ယ့ၣ်ရှူးခရံံာ်အပူၤ” (:၁၃) သ့ဝဲဒၣ်န့ၣ်လီၤ.