ပၢ်လၢအသူၣ်အုးသးအုးတဂၤ ဆှၢလီၤန့ၢ်ယၤ လီလံာ်ပရၢဖိတဘ့ၣ်န့ၣ်ဒီး, တၢ်စးထီၣ် မၤအသးန့ၣ်လီၤ. ပၢ်တဂၤအံၤ မ့ၢ်လၢသိလ့ၣ် နုာ်လီၤဘျၢၣ် အဖိမုၣ် ခီလ့ၣ်ကၠိဖိမုၣ်, အလံၤစၣ် (Alyssa), ဒီးသံလဲၤပူၤကွံာ်ဟီၣ်ခိၣ်အဃိ, လိၣ်ဘၣ်ဝဲဒၣ် ပှၤတဂၤဂၤ, လၢအသ့ၣ်ညါနၢ်ပၢၢ် အတၢ်နးတၢ်ဖှီၣ်, ဒီးကမၤမုာ်ထီၣ်က့ၤအီၤအဂီၢ်န့ၣ်လီၤ.
တၢ်ဆှၢလိာ်သး လီလံာ်ပရၢ အဘ့ၣ်သၢကယၤဃၣ်ဃၣ်လၢ လွံၢ်နံၣ်အတီၢ်ပူၤဝံၤ, အကတၢၢ်န့ၣ် ကရ့း (Craig) ဒီးယၤ, ပထံၣ်လိာ်ဘၣ်ပသး လၢမဲာ်သကိးမဲာ်န့ၣ်လီၤ. ကရ့း ဘၣ်ဟဲဖံးတၢ်မၤတၢ် ဖဲဝ့ၢ်တဖျၢၣ်လၢ အအိၣ်ဘူးဒီးယၤအဃိ, ပဘူၣ်သကိးဘါသကိးတၢ် လၢမုၢ်အိၣ်ဘှံးနံၤ, ပအီၣ်သကိးမုၢ်ဆါခီတၢ်အီၣ်, ဒီးစံးကတိၤသကိး ယဖိမုၣ်ဖိ မဲလ်လံစၣ် (Melissa), ဒီးအဖိမုၣ် အလံၤစၣ် ခံဂၤအဂ့ၢ်န့ၣ်လီၤ. ပိာ်မုၣ်ဖိ ခံဂၤလိာ်န့ၣ် မၤသူၣ်ဖှံသးညီ ပှၤဂုၤပှၤဂၤအသး, ဘၣ်သူၣ်ဘၣ်သးဝဲလၢ တၢ်ဂဲၤလိာ်ကွဲဖျၢၣ်ပှီၢ်, မ့ၢ်ပှၤသ့ၣ်တဖၣ်လၢအဲၣ်ဘၣ်ကစၢ်ယ့ၣ်ရှူး, အိၣ်ဒီးတၢ်ပာ်သူၣ်ပာ်သးလၢ အကဆှီန့ၣ်, ဘၣ်ဒိဘၣ်ထံးလၢသိလ့ၣ်, ဒီးသံလဲၤပူၤကွံာ်ဝဲဒၣ်ဟီၣ်ခိၣ်န့ၣ်လီၤ.
မုၢ်နံၤလၢ ပထံၣ်လိာ်စံးကတိၤသကိးတၢ်အကံၢ်အစီန့ၣ် ကမ့ၢ်တၢ်မနုၤလဲၣ်.ပစံးကတိၤသကိး ပတၢ်သူၣ်အုးသးအုးအဂ့ၢ်, ဒီးပဟီၣ်သကိးန့ၣ်လီၤ. ဘၣ်ဆၣ်, အါတက့ၢ်, ပစံးကတိၤသကိး တၢ်မုၢ်လၢ်အဂ့ၢ်န့ၣ်လီၤ. တၢ်မုၢ်လၢ် အမ့ၢ်အတီနီၢ်နီၢ်န့ၣ် အိၣ်သူၣ်လီၤသးလၢ ကစၢ်ယွၤအတၢ်အၢၣ်လီၤတဖၣ်အလိၤန့ၣ်လီၤ. ပှၤတၢ်မၢဖိစီၤပီလူး စံးဘၣ်ပှၤ, “ဒီးပုၢ်သ့ၣ်ဝဲၢ်သ့ၣ်ဧၢ, တဘၣ်ဘၣ်ပသးလၢ သုတသ့ၣ်ညါဘၣ် ပှၤအမံၤအဂ့ၢ်အကျိၤန့ၣ်, ဒ်သိးသုသးသုတအုး, ဒ်ပှၤဂၤလၢအတၢ်မုၢ်လၢ်တအိၣ်ဘၣ်အသိးန့ၣ်တဂ့ၤ. အဂ့ၢ်ဒ်အံၤ, ပမ့ၢ်စူၢ်က့ၤနာ်က့ၤလၢ ယ့ၣ်ရှူးသံဝဲ, ဒီးဂဲၤဆၢထၢၣ်က့ၤဝဲဒီး, ပှၤလၢအမံလၢယ့ၣ်ရှူးအပူၤတဖၣ်န့ၣ်, ယွၤကဒုးဟဲက့ၤထီၣ်အီၤလၢအသိး, ဒ်န့ၣ်အသိးစ့ၢ်ကီး” (၁ သ့း ၄:၁၃-၁၄) န့ၣ်လီၤ. ပှၤစူၢ်က့ၤနာ်က့ၤတၢ်ဖိတဖၣ်အဂီၢ်, တၢ်သံလၢ တၢ်သွၣ်ခိၣ် မ့ၢ်ဝံၤန့ၣ် အိၣ်ဒံးဝဲဒီး တၢ်မူ, လၢအမ့ၢ် တၢ်မူအထူအယိာ်န့ၣ်လီၤ.
ကရ့းဒီးယၤ ပမၤကတၢၢ်က့ၤ မုၢ်တနံၤအံၤ, ခီဖျိလၢတၢ်ထုကဖၣ်, ဒီးတၢ်စံးဘျုးက့ၤယွၤ မ့ၢ်လၢပဖိမုၣ်တဖၣ်, အိၣ်ဆိးဘၣ်ဝဲလၢ ယွၤ အစုပူၤသပှၢ်တၢၢ်လံအဃိန့ၣ်လီၤ. တၢ်ဟ့ၣ်ခီနီၤလီၤ ကစၢ်ယ့ၣ်ရှူး အတၢ်အဲၣ်န့ၣ် ဒုးဘျးစၢ ပသူၣ်ပသးတဖၣ်, ဒီးဖဲလၢ ပတၢ်မုၢ်လၢ် တအိၣ်ဘၣ်အကတီၢ်န့ၣ် ဒုးအိၣ်ထီၣ်ပတၢ်မုၢ်လၢ်န့ၣ်လီၤ.
