အပူၤကွံာ် အနံၣ်သၢဆံန့ၣ်, ယမၤသကိးတၢ်ဒီးတၢ်စံးကတိၤသကိးတၢ်လၢ ပှၤအတၢ်ဖံး တၢ်မၤတအိၣ်တဖၣ်အဂီၢ်, အတၢ်ဟူးတၢ်ဂဲၤန့ၣ် ယသ့ၣ်နီၣ်ဘၣ်ယဲ, တုၤမုၢ်မဆါတနံၤအံၤန့ၣ်လီၤ. ယတံၤသကိး ပာ်လီၤပှၤမၤသကိးတၢ်ဖိတဖၣ် ဒီးယကဘၣ်ကွဲးဝဲဒၣ် တၢ်တဲဖျါထီၣ် တၢ်အိၣ်ဘှံးလၢ တၢ်ဖံးတၢ်မၤအဂ့ၢ်အကျိၤန့ၣ်လီၤ. ဒ်သိးပကအိၣ်ဘှံးလၢတၢ်ဖံးတၢ်မၤအဂီၢ်, ပသးအနံၣ်အလါ စၢ်ဒံးဝဲဒၣ်အဃိ, ပဝဲကိးဂၤဒဲးန့ၣ် ပဃုတၢ်ဖံးတၢ်မၤန့ၣ်လီၤ. ဘၣ်ဆၣ်, ပှၤမၤစၢၤတၢ်တဂၤ, ပာ်ဖျါထီၣ်တၢ်ဟူးတၢ်ဂဲၤအတၢ်ပညိၣ်, ဒီးစံးဝဲဒၣ် “တၢ်လၢနစံးကတိၤတဖၣ်န့ၣ် တမ့ၢ်ကဘၣ်ဃးဒီးတၢ်မၤလၢနမၤအီၤဘၣ်.” လၢပတၢ်အိၣ်မူအပူၤန့ၣ်, တၢ်ဖံးတၢ်မၤ တမ့ၢ်တၢ်ဂ့ၢ်အခီၣ်ထံးနီၢ်နီၢ်န့ၣ် အဝဲ မၤဆှဲပာ်ဖျါန့ၢ်ပှၤန့ၣ်လီၤ. ခီဖျိလၢပတၢ်မၤအိၣ်ပတုာ်အဃိ, ပသးမ့ၢ်ဘၣ်ဖှီၣ်အကတီၢ်, မ့မ့ၢ်ပတၢ်အိၣ်မူန့ၣ် အခီပညီအိၣ်ဝဲဒၣ် ဒိၣ်န့ၢ်အါန့ၢ်ဒံး ပအိၣ်ဒီးတၢ်ဖံးတၢ်မၤန့ၣ်လီၤ.
စီၤအၤဘြၤဟၣ် အသးသမူကတၢၢ်ကွံာ်ဝဲဒၣ် အဂ့ၢ်လီၤတံၢ်လီၤဆဲးတဖၣ်န့ၣ် ဒုးသ့ၣ်နီၣ်ထီၣ်ယၤ တၢ်မၤလိအတၢ်ဟူးဂဲၤအံၤန့ၣ်လီၤ. စီၤအၤဘြၤဟၣ် သံ “အိၣ်ကၢအိၣ်ခိးတုၤအသးပှၢ်တုာ်ဝဲ” ဒီးအိၣ်မူဘၣ် တၢ်အိၣ်မူ “အယံာ်အထီ, ဒီးမံသူၣ်မုာ်သး” (၁ မိၤ ၂၅:၈) (ခ့ခါ) န့ၣ်လီၤ. လံာ်စီဆှံ ဒီတဘ့ၣ်အပူၤန့ၣ်, ပကဖးဘၣ် စီၤအၤဘြၤဟၣ်အတၢ်တီတၢ်လိၤ, လၢအလူၤပိာ်ထွဲ ကစၢ်ယွၤ အတၢ်မၤလိာ်တဖၣ်ဘၣ်ဆၣ်, အတၢ်ဖံးတၢ်မၤ အဂ့ၢ်အကျိၤန့ၣ် ပတဖးဘၣ်အါအါဘၣ်. လၢပျၢၤပၢ်ဖးဒိၣ်သ့ၣ်တဖၣ် အတၢ်စူၢ်တၢ်နာ် (၁၅:၆) န့ၣ်, ဒုးသ့ၣ်နီၣ်က့ၤယၤ ပှၤကွဲးလံာ်စံၣ်တဲၤတဲလီၤတၢ် အတၢ်ကတိၤ, ဖဲအကွၢ်ထံဆိကမိၣ် သးသမူအခီပညီ, ဒီးပှၤဃုထံၣ်န့ၢ် တၢ်သးခုသးမုာ်, လၢအတၢ်ဖံးတၢ်မၤအပူၤ, (မ့) လၢတၢ်သူၣ်လီၤဘှံးသးလီၤတီၤအပူၤ, သ့ဝဲဒၣ်ဒ်လဲၣ်ဝံၤ (၂:၂၄-၂၅),သရၣ်တဂၤအံၤ မၤကတၢၢ်အတၢ်ကွဲးလၢ “ယွၤဟ့ၣ်လီၤပှၤကညီလၢအဂ့ၤ လၢအမဲာ်ညါ လၢတၢ်ကူၣ်သ့, ဒီးတၢ်သ့ၣ်ညါ, ဒီးတၢ်သးခု” (၂:၂၆) န့ၣ်လီၤ.
ခီဖျိလၢတၢ်ဖံးတၢ်မၤတအိၣ်ဘၣ်အဃိ, ဖဲလၢတၢ်လီၤမၢ်, ဒီးတၢ်သူၣ်ကိၢ်သးဂီၤအကတီၢ်တဖၣ်အပူၤဒၣ်လဲာ်, လၢတၢ်ကွၢ်ထံဆိကမိၣ် စီၤအၤဘြၤဟၣ်အတၢ်အိၣ်မူ, ဒီးပှၤကွဲးလံာ်တၢ်စံၣ်တဲၤတဲလီၤတၢ်အတၢ်ကတိၤတဖၣ်- အတၢ်ဒိတၢ်တဲာ်န့ၣ် ကကဲဘျုးကဲဖှိၣ်ဝဲဒၣ်လၢပဂီၢ်, ဒီးကနဲၣ်ပှၤဆူ တၢ်သးမံနီၢ်နီၢ်အိၣ်တၢ်အလီၢ်, ပဃုထံၣ်န့ၢ်အီၤသ့ဝဲဒၣ် ထဲလၢကစၢ်ယွၤအအိၣ်န့ၣ်လီၤ.
