ဝ့ၢ်လၢ ယအိၣ်ဆိးန့ၣ် ကရဲ အၣ်ဒံၢ်ယၢၣ် ဖီကရၢၢ် (Grand Ideas Garden), ဒီး လီၢ်ကဝီၤအပဒိၣ်တၢ်ပၢအဃိာ် (County Jail), တၢ်လီၢ်ခံခါ အိၣ်သူၣ်လီၤအသးလၢ ဘီ(လ) (Ball) အကျဲမုၢ်တခီတကပၤန့ၣ်လီၤ. ယတံၤသကိးမုၣ် ကၠိန်အဲ(န) (Joann) ဘၣ်သူၣ်ဘၣ်သးဝဲဒၣ် တၢ်လီၢ်ခံတီၤလိာ်န့ၣ်လီၤ. အသးအိၣ်ဆ့ၣ်နီၤဝဲဒၣ်လၢ ဖီကရၢၢ်အပူၤ, ကွၢ်ဆိကမိၣ် ကစၢ်ယွၤ အတၢ်ဂ့ၤတၢ်ဝါ, ဒီးအတၢ်အဲၣ်ကစၢ်ယွၤ, မ့ၢ်လၢ ယွၤမၤတၢ်အဒိၣ်တဖၣ် လၢအတၢ်အိၣ်မူအပူၤအဃိန့ၣ်လီၤ. လၢအတၢ်အိၣ်မူအပူၤ, တၢ်ဃုထၢကမၣ်တဖၣ်, ဒီးဟးဖျိးကျဲ, အိၣ်ယံၤဝဲဒီးကစၢ်ယွၤအကတီၢ်, ကစၢ်ယွၤ ပှ့ၤက့ၤအီၤအဂ့ၢ်န့ၣ် အဝဲအဲၣ်ဒိးနီၤဟ့ၣ်ခီစ့ၢ်ကီးဒီးပိာ်မုၣ်လၢ အလီၤဘၣ်ဃိာ်တဖၣ်န့ၣ်လီၤ. လၢတၢ်သူၣ်ဆူၣ်သးဆူၣ်အပူၤ, အဝဲစံးဘၣ်တဲဘၣ်ယၤတလီၢ်လီၢ်န့ၣ် အဝဲအိၣ်ဒီးတၢ်မံမီၢ်လၢ မုၢ်တနံၤန့ၣ်, ကယဲၢ်ပိာ်မုၣ်ကိးဂၤဒဲး လၢဃိာ်ပူၤတဖၣ်န့ၣ် ကနၢ်ပၢၢ်က့ၤဝဲ, ဒီးကလဲၤခီဖျိကလၢၢ်ဘၣ်ဝဲ ကစၢ်ယွၤအတၢ်အဲၣ်လၢ အဝဲသ့ၣ်အနီၢ်ကစၢ်ဒၣ်ဝဲစုာ်စုာ်န့ၣ်လီၤ.

ပှၤကွဲးထါစံးထီၣ်ပတြၢၤ စံးဘၣ်တဲဘၣ် အပှၤအံၣ်စရ့လးဖိကဒဲကဒဲလၢ “စံးထီၣ်ပတြၢၤယွၤ, ပှၤလၢအပှ့ၤက့ၤအဝဲသ့ၣ်လၢဒုၣ်ဒါအစုအပူၤ” (စံး ၁၀၇:၂) န့ၣ်လီၤ. အဝဲသ့ၣ် “လဲၤဝ့ၤဝီၤတၢ်လၢပှၢ်မုၢ်ကနၢ, လၢအလီၢ်အိၣ်သယုၢ်အပူၤ,” “တၢ်သၣ်ဝံၤအသး, ဒီးတၢ်သူအသးလၢထံ, အသးလၢအပူၤ လီၤဘှါဝဲ” (:၄-၅) န့ၣ်လီၤ. ဖဲအဝဲသ့ၣ် ပူထီၣ်ဝဲဒၣ် ကစၢ်ယွၤ အကတီၢ်တဖၣ်န့ၣ်ဒီး, ကစၢ်ယွၤ သိၣ်လိနဲၣ်ယုၤအဝဲသ့ၣ် (:၁၀-၁၂) န့ၣ်လီၤ. ဖဲလၢတၢ်ကီၢ်တၢ်ဂီၤလီၤဘၣ် အဝဲသ့ၣ် တဘျီလၢ်လၢ်န့ၣ် ကိးထီၣ်ယွၤ, ဒီး “အဝဲဒၣ်မၤပူၤမၤဖျဲးအီၤလၢ အတၢ်နးတၢ်ဖှီၣ်” (:၆) န့ၣ်လီၤ. အဝဲသ့ၣ် အိၣ်ဒီးတၢ်ဂ့ၢ်တၢ်ကျိၤအါမံၤလၢ ကစံးဘျုးစံးဖှိၣ် ကစၢ်ယွၤ, ဒီးကစံးဘၣ်တဲဘၣ် ကစၢ်ယွၤအဂ့ၢ်တဖၣ်ဆူ ပှၤဂုၤပှၤဂၤအအိၣ်န့ၣ်လီၤ. ဒ်ပှၤအံၣ်စရ့လးဖိတဖၣ် မၤလိန့ၢ် ဝဲဒၣ်အသိး, ပကမၤလိန့ၢ်စ့ၢ်ကီးလၢ, ကစၢ်ယွၤန့ၣ် အိၣ်ဒီးအတၢ်အဲၣ်တၢ်သးအိၣ်လၢအတပျဲပျၢ်ကွံာ်ပှၤနီတစုဘၣ်န့ၣ်လီၤ.

ပဝဲစ့ၢ်ကီး, ပဟံးန့ၢ်တၢ်ခွဲးတၢ်ယာ်တဖၣ် သ့ဝဲဒၣ်, ဒ်သိးပကသ့ၣ်ညါနၢ်ပၢၢ်, ဒီးတိၢ်န့ၢ် “ယွၤအတၢ်အဲၣ်အတၢ်မၤဂ့ၤတၢ်တဖၣ်” (:၄၃) လၢပဂီၢ်, ဒီးပကစံးဘျုးစံးဖှိၣ်က့ၤယွၤ, ဒီးစံးဘၣ်တဲဘၣ် ယွၤအုၣ်က့ၤခီၣ်က့ၤ ပနီၢ်ကစၢ်အဂ့ၢ်န့ၣ်လီၤ.