ဖဲယအိးထီၣ် တၢ်ဘုၣ်ကနဲ အတလါတဖျၢၣ်န့ၣ်ဒီး, ယထံၣ်လၢ ကနဲဒီတဖု သံလၢာ်စီကွံာ်သတူၢ်ကလာ်, ဒီးယထးခိၣ်ထီၣ်ဖျဲးဝဲလၢ “အိ… တၢ်အံၤတမ့ၢ်ဒံးဘၣ်” န့ၣ်လီၤ. တလါအံၤ မ့ၢ်ကနဲအထၢဖးဒိၣ်တဖျၢၣ်လၢ အိၣ်ပှဲၤဒီးကနဲစီအါမးန့ၣ်လီၤ. လၢတၢ်ခုၣ်ခါ ဒီတကတီၢ်ညါန့ၣ် ယကွၢ်ထွဲပၢၤဃာ်အီၤဂ့ၤဂ့ၤဘၣ်ဘၣ်, ဒီးဘူးတ့ၢ်မးလၢယကထုးထီၣ်ဘၣ်ကနဲစီန့ၣ်လီၤ. ဘၣ်ဆၣ်, တၢ်ခုၣ်ဟဲနုာ်လီၤဝဲဒၣ် ဖဲတၢ်ကိၢ်လၢၤထီၣ်အကတီၢ်အံၤ, ဒုးကဲထီၣ် တၢ်ဟးဂုာ်ဟးဂီၤန့ၣ်လီၤ.

ယသံကွၢ်သမံသမိး လီၢ်ကဝီၤ အပှၤစဲၣ်နီၤတဖၣ်န့ၣ်ဒီး, အဝဲသ့ၣ်စံးဘၣ်ယၤလၢ, “လၢတၢ်အကတီၢ်ဒ်သိးအံၤန့ၣ် ပှၤအါဒံအါဂၤ, လၢအဘုၣ်ကနဲတဖၣ် အတၢ်လီၤမၢ်အိၣ်ဝဲဒၣ်” န့ၣ်လီၤ. ကနဲအဒၢအဂ့ၤတဖၣ်ဒၣ်လဲာ်, တၢ်ခုၣ်အဆံးအစှၤန့ၣ်ကဲထီၣ်တၢ်တၤတဖၣ်လၢ ကနဲတဖၣ်အဂီၢ်န့ၣ်လီၤ. ဖဲ တၢ်ခုၣ်ဒိၣ်မးအကတီၢ်န့ၣ် ဒ်သိးကပၢၤဃာ် တၢ်အကိၢ်အခုၣ်အဂီၢ်, ကနဲတဖၣ် စူးကါဝဲ အဒံးခံခီဘၣ်ဆၣ်, ဖဲတၢ်ဟဲကသါထီၣ်လၢၤထီၣ်တစိၤဖိန့ၣ် အဝဲသ့ၣ် လူၤဃုအီၣ်ဖီအစီတဖၣ်အဃိ, လီၤဘှံးလီၤတီၤဝဲဒၣ်န့ၣ်လီၤ. တၢ်ခုၣ်မ့ၢ်ဟဲနုာ်လီၤချ့သဒံးန့ၣ်ဒီး, ဒ်သိးကမၤလၢၤထီၣ်တၢ် အဂီၢ်, ကနဲသ့ၣ်တဖၣ် အဂံၢ်အဘါတအိၣ်လၢၤဘၣ်န့ၣ်လီၤ. ကနဲတဖၣ် အသး “ဒံဝ့ၤဒံဝီၤ” တၢ်န့ၣ် နဲၣ်ဆှၢ အဝဲသ့ၣ်ဆူ တၢ်ဟးဂုာ်ဟးဂီၤန့ၣ်လီၤ.

တၢ်အဂ့ၤအဝါတဖၣ် မ့ၢ်မၤဒံဝ့ၤဒံဝီၤပှၤ, ဒ်သိးပကဃၣ်တရံးပသးဒီးတၢ်အကါဒိၣ်ကတၢၢ်လၢပဂီၢ်န့ၣ်ဒီး, တၢ်အဂ့ၤအဝါတဖၣ်ဒၣ်လဲာ်, ကဲထီၣ်တၢ်လီၤပျံၤလီၤဖုးသ့ဝဲဒၣ်န့ၣ်လီၤ. တၢ်ကမၤအသးဒ်သိးအံၤအဂ့ၢ်န့ၣ် စီၤမိၤရှ့ ဒုးသ့ၣ်ညါ ယွၤအပှၤဂီၢ်မုၢ်တဖၣ်, ဖဲအဝဲသ့ၣ် ဟးထီၣ် လၢကီၢ်အဲၤကူပတူးဝံၤ, တချုးလဲၤနုာ်ဝဲဆူကီၢ်တဘ့ၣ်လၢ ကစၢ်ယွၤ အကဟ့ၣ်လီၤအဝဲသ့ၣ်, တၢ်လီၢ်လၢ “ဟံၣ်တဖၣ်ပှဲၤဒီးတၢ်ဂ့ၤလၢနတမၤပှဲၤဘၣ်” (၅မိၤ ၆:၁၁) န့ၣ်လီၤ. စီၤမိၤရှ့ ဟ့ၣ်ပလီၢ်ပှၤဂီၢ်မုၢ်လၢ “တုၤနအီၣ်ဒီးဘျဲးအီၣ်ဒီး,- ပလီၢ်နသး ဒ်သိးနသုတသးပ့ၤနီၣ်ယွၤ…” (:၁၁-၁၂) တဂ့ၤန့ၣ်လီၤ.

အဂ့ၢ်ဒ်အံၤ, ယွၤ မ့ၢ် “ကယဲၢ်တၢ်ဟ့ၣ်အဂ့ၤအဝါ, ဒီးကယဲၢ်တၢ်ဟ့ၣ်အလၢအပှဲၤ” (ယၤ ၁:၁၇) အဂံၢ်ထံးအဃိ, တၢ်ဆိၣ်ဂ့ၤလၢပဒိးန့ၢ်တဖၣ်အဂီၢ်, တၢ်သ့ၣ်နီၣ်ထီၣ်က့ၤ ကစၢ်ယွၤန့ၣ် ကမၤစၢၤပှၤလၢ ပကသ့ၣ်ညါအတၢ်ဂ့ၤတၢ်ဝါန့ၣ်လီၤ. လၢတၢ်ဆီၣ်လီၤသး အပူၤ, ပမ့ၢ်စံးဆၢမၤဆၢ ယွၤအတၢ်ဂ့ၤတၢ်ဝါ ခီဖျိတၢ်အဲၣ်ကစၢ်ယွၤ လၢသူၣ်ဒီဖျၢၣ်သးဒီဖျၢၣ်, ဒီးလၢပဂံၢ်ပဘါခဲလၢာ် (၅ မိၤ ၆-၅) န့ၣ်ဒီး, ပကထံၣ်ဃုန့ၢ် တၢ်ဆိၣ်ဂ့ၤအဂ့ၤကတၢၢ်န့ၣ်လီၤ.