သိလ့ၣ်လၢပလဲၤဒိးအီၤတခိၣ် ထီၣ်ဝဲဒၣ် ကစၢၢ် အဲ(န)ဒံး(စ) အကျဲ အံၣ်အံၣ်ဖိန့ၣ်တဆီဘၣ်တဆီ, ဒီးယတံၤသကိးလၢပလဲၤသကိးတၢ်တဖၣ် သူၣ်ဝံၣ်သးဆၢတၢ်လၢတၢ်နံၤတၢ်အ့အပူၤန့ၣ်လီၤ. မ့မ့ၢ်ယၤန့ၣ် ယကွၢ်လီၤဆူ တၢ်ချၢန့ၣ်ဒီး, သိလ့ၣ်ဒီးတြီၤလာ်အဘၢၣ်စၢၤ, လၢသိလ့ၣ်လဲၤတၢ်ကျဲအကပၤန့ၣ် တၢ်ကတြီဃာ်တၢ်အဂီၢ်, တၢ်တအိၣ်ဝဲဒၣ်နီတမံၤဘၣ်အဃိ, ယဖုးသံပျီၢ်သံဘၣ်ယသးန့ၣ်လီၤ. ဒ်ပသိလ့ၣ်လဲၤတုၤ ကစၢၢ်အလီၢ်ထီၣ်ထီတဆီဘၣ်တဆီန့ၣ်ဒီး, လၢယသးပူၤန့ၣ် ယပျံၤတၢ်, ဒီးယသူၣ်ကိၢ်သးဂီၤယဲဒၣ်, ဒီးယဆိကမိၣ်ထီၣ်ဝဲဒၣ်လၢ ပကရူၢ်ဖိတဖု ဒ်သိးပကမၤတၢ်သးခုကစီၣ်, လၢတၢ်ဆၢကတီၢ်ဖုၣ်ကိာ်ဖိအဂီၢ်န့ၣ် ဘၣ်မနုၤအဃိ, ပဘၣ်ဟဲဆူ အံၣ်ကွ့ၣ်ဒီ အကစၢၢ် ပှၢ်လၢ်ကျါလဲၣ်န့ၣ်လီၤ. ဖဲန့ၣ်, ပၢ်ယွၤ မ့ၢ်ဆှၢလီၤ အဖိခွါ ဒ်သိးကတူၢ်သံအသးလၢ ပှၤအိၣ်ဆိးဝဲလၢ တၢ်လီၢ်တၢ်ကျဲတဖၣ်အံၤအဂီၢ်န့ၣ်ဒီး, ကစၢ်ယွၤ ကအဲၣ်ဘၣ်အဝဲသ့ၣ်နီၢ်နီၢ်လီၤန့ၣ်, ယသ့ၣ်ညါနၢ်ပၢၢ်ဝဲဒၣ်န့ၣ်လီၤ. လၢတၢ်ကပာ်ဖျါထီၣ် ကစၢ်ယွၤအတၢ်အဲၣ်တၢ်ကွံအဂီၢ်, တၢ်ဒိးသိလ့ၣ်လၢ အလီၤပျံၤလီၤဖုးန့ၣ် ယလဲၤခီဖျိမၤနၢၤသ့ဝဲဒၣ်န့ၣ်လီၤ.
ပမၤဝံၤဝဲဒၣ် တၢ်သးခုကစီၣ်အတၢ်လဲၤတဘျီအံၤ, လၢတၢ်သူၣ်ခုသးခုအပူၤ, ခီဖျိလၢတနံၤဘၣ်တနံၤစုာ်စုာ် တၢ်မၤလိ ကစၢ်ယွၤအကလုၢ်ကထါဖုၣ်ကိာ်, တၢ်နီၤဟ့ၣ်ခီ ပတၢ်အုၣ်သးတဖၣ်, ဒီးဃ့ထုကဖၣ်သကိးတၢ်ဒီးပှၤဝ့ၢ်ဖိတဖၣ်လၢ အတူၢ်လိာ်မုာ်ပှၤ ဖဲပလဲၤတုၤ ဝ့ၢ်တဖျၢၣ်ဘၣ်တဖျၢၣ်န့ၣ်လီၤ.
ဒ်သိးပှၤလၢအနၢ်ဟူ တၢ်သးခုကစီၣ်တဖၣ်, ကစူၢ်က့ၤနာ်က့ၤ ကစၢ်ယ့ၣ်ရှူးအဂီၢ်, ပှၤတၢ်မၢဖိ စီၤပီလူး ဟ့ၣ်လီၤအသးလၢ တၢ်စံၣ်တဲၤတဲလီၤ ကစၢ်ယ့ၣ်ရှူး အဂ့ၢ်န့ၣ်လီၤ. ရိမ့ၤ ၁၀:၁၃ အပူၤန့ၣ် စီၤပီလူး စံးဝဲဒၣ် “ကယဲၢ်ပှၤလၢအကိးထီၣ် ကစၢ်အမံၤန့ၣ်, ကတုၤလၢ တၢ်အုၣ်က့ၤခီၣ်က့ၤအီၤ” န့ၣ်လီၤ. ဘၣ်ဆၣ်, စံးကဒီးဝဲလၢ, “မၤသးဒ်န့ၣ်ဒီး, အဝဲသ့ၣ်ကကိးထီၣ် ပှၤလၢအတနာ်ဘၣ်ဝဲန့ၣ်ဒ်လဲၣ်. ဒီးကနာ်ပှၤလၢအတနၢ်ဟူဘၣ်ဝဲအဂ့ၢ်န့ၣ်, ဒ်လဲၣ်. ဒီးပှၤမ့ၢ်တစံၣ်တဲၤတဲလီၤဘၣ်ဒီး, ကနၢ်ဟူဝဲဒ်လဲၣ်. ဒီးတၢ်မ့ၢ်တမၢလီၤအီၤဘၣ်ဒီး, ကစံၣ်တဲၤတဲလီၤဝဲဒ်လဲၣ်” (ရိ ၁၀:၁၄-၁၅) န့ၣ်လီၤ. လၢပခိၣ်ပဃၢၤန့ၣ် ပှၤအိၣ်ဝဲဒၣ်အါမး, လၢအတသ့ၣ်ညါကစၢ်ခရံာ်ဒံးဘၣ်န့ၣ်လီၤ.
မ်ပကဃ့သကိး ကစၢ်ယွၤ, ဒ်သိးကဟ့ၣ်ပှၤ တၢ်သးဒူ လၢတၢ်နီၤဟ့ၣ်ခီ ကစၢ်ယ့ၣ်ရှူး အတၢ်သးခုကစီၣ်ဆူပှၤဂၤအအိၣ်, ပကဃ့ထုကဖၣ်သကိး, ဒီးကွဲမုာ်အဝဲသ့ၣ်ဆူ တၢ်အိၣ်ဖှိၣ်တဖု အတၢ်ဘူၣ်တၢ်ဘါ (မ့) အတၢ်ဟူးတၢ်ဂဲၤန့ၣ်တက့ၢ်.
