ဖဲ ကၠဲး(စ) (Jess) ဟံးဃာ် တၢ်သံကွၢ်အလံာ်ကဘျံးလၢအစုပူၤ, ဒီးအသးပူၤန့ၣ်စံးဝဲဒၣ်, အစှၤကတၢၢ်, ယဖိခွါကဖျိထီၣ်တၢ်ဒိးစဲးန့ၣ်လီၤ. လၢလံာ်တၢ်ဒွးအဂီၢ်န့ၣ်, မၤစၢၤဝဲ အဖိခွါဘၣ်ဆၣ်, မ့ၢ်လၢဟံၣ်ဃီအတၢ်မၤ, ဒီးအတၢ်မၤအါဝဲလၢ အတၢ်မၤအကစၢ် မၢအီၤတဖၣ်အဃိ, တၢ်မၤသကိးလံာ်ဒီးအဖိခွါန့ၣ် ကဲထီၣ်တၢ်ဂ့ၢ်ကီန့ၣ်လီၤ. လၢတၢ်သးဟးဂီၤအပူၤန့ၣ် ဆိကမိၣ်ထီၣ်အမါ, လၢအလဲၤပူၤကွံာ်ဟီၣ်ခိၣ်တဂၤ, ဒီးစံးဝဲ “လံစၣ်ဧၢ, နကဘၣ်မၤမနုၤလဲၣ်န့ၣ် နသ့ၣ်ညါနဲန့ၣ်လီၤ. ယတမ့ၢ် ပှၤကွၢ်ထွဲဟံၣ်ဃီ သ့ဝဲဒၣ် ဒ်နၤအသိးဘၣ်” န့ၣ်လီၤ.

တၢ်အိၣ်အသးဒိၣ်န့ၢ်ဒံး တၢ်သးဟးဂီၤဒ်သိးအံၤန့ၣ် စီၤစရူၤဘၤဘ့လး ကတူၢ်ဘၣ်ခီၣ်ဘၣ်ဝဲစ့ၢ်ကီးန့ၣ်လီၤ. ဘၤဘူၤလိၣ် အတၢ်စိာ်မၢကဲကုၢ်ဝံၤ, ယွၤ မၢ ပှၤယူၤဒၤဖိ အဝ့ၢ်ခိၣ် ဒ်သိးကကဲခိၣ်ကဲနၢ် ပှၤအံၣ်စရ့လးဖိတဖၣ်လၢ တၢ်တ့သူၣ်ထီၣ်က့ၤ ယွၤအတၢ်လုၢ်ဟံၣ်န့ၣ်လီၤ. ဖဲအဝဲသ့ၣ် ပာ်လီၤတၢ်အခီၣ်ထံးန့ၣ်ဒီး, ပှၤအါဂၤလၢ “……ထံၣ်တ့ၢ်ဟံၣ်အဂံၢ်ခိၣ်တဖျၢၣ်န့ၣ် တုၤပှၤပာ်လီၤဟံၣ်တဖျၢၣ် အခီၣ်ထံးလၢအမဲာ်ညါ, ဒီးဟီၣ်ဝဲလၢအသီၣ်ဖးဒိၣ်…” (ဧ့ၤ ၃:၁၂) န့ၣ်လီၤ. ခဲကနံၣ်အံၤ, ဒ်တၢ်တ့သူၣ်ထီၣ် တၢ်လုၢ်ဟံၣ်လၢ အဆံးန့ၢ်ဒံး စီၤရှလိၤမိၤအစိၤအဃိ, ပှၤဂီၢ်မုၢ်တဖၣ် သ့ၣ်နီၣ်ထီၣ်က့ၤ စီၤရှလိၤမိၤ တ့သူၣ်ထီၣ်ဝဲဒၣ် ယွၤအတၢ်လုၢ်ဟံၣ်လၢ အိၣ်ပှဲၤဒီးတၢ်လၤတၢ်ကပီၤန့ၣ်လီၤ. ကယဲၢ်ပှၤကိးဂၤဒဲး, ဃုာ်ဒီးစီၤစရူၤဘၤဘ့လး, ကဆိကမိၣ်ထီၣ်ဝဲသ့ၣ်သ့ၣ်, ယွၤအတၢ်လုၢ်ဟံၣ်လၢ ပတ့သူၣ်ထီၣ် တဖျၢၣ်န့ၣ်, တဂ့ၤဝဲဒၣ် ဒ်အပူၤကွံာ်တၢ်လုၢ်ဟံၣ်ဘၣ်န့ၣ်လီၤ.

“ဘၣ်ဆၣ်ဒီးခဲကနံၣ်အံၤပာ်ဆူၣ်နသး, စီၤစရူၤဘၤဘ့လးဧၢ, ယွၤစံးဝဲဒၣ်, ဒီးပှၤဂီၢ်မုၢ်လၢကီၢ်ပူၤခဲလၢာ်သ့ၣ်ဧၢ,… ယအိၣ်ဒီးသုလီၤ…., ယသးအိၣ်ဂၢၢ်ဆိးကျၢၤလၢသုကျါလီၤ. ပျံၤတၢ်တဂ့ၤ” (ဃးကဲ ၂:၄-၅) န့ၣ်လီၤ. လၢအသးပူၤန့ၣ် စီၤစရူၤဘၤဘ့လး တိၢ်န့ၢ်ဟံးဃာ် ယွၤကနဲၣ်ဆှၢအိၣ်ဆိးဒီးအဝဲသ့ၣ်, ဒ်ကစၢ်ယွၤအၢၣ်လီၤတ့ၢ်ဝဲအသိး (:၅) န့ၣ်လီၤ. ဒ်န့ၣ်အသိး, တၢ်သုးမုၢ်ဂီၢ်မုၢ်အယွၤစံးဝဲဒၣ်လၢ “ဟံၣ်အံၤအလၤကပီၤလၢခံ ကဒိၣ်န့ၢ် အလၤကပီၤ လၢညါတက့ၢ်” (:၉) န့ၣ် မ့ၢ်တၢ်ကတိၤလၢ အနဲၣ်ဆိဝဲဆူ တၢ်အကတီၢ်လၢခံ ဖဲကစၢ်ယ့ၣ်ရှူး လဲၤဝဲဆူ တၢ်လုၢ်ဟံၣ်အဂ့ၢ် (ယိၤ ၂:၁၃-၂၅) န့ၣ်လီၤ.

ဖဲကစၢ်ယွၤ မၢပကမၤ တၢ်မၤလၢပကဘၣ်မၤတဖၣ်န့ၣ် ပမ့ၢ်ထိၣ်သတြီၤ ပတၢ်မၤအစၢတဖၣ်ဒီးအပူၤကွံာ်ပှၤမၤတ့ၢ်တဖၣ်အတၢ်မၤန့ၣ်ဒီး, ပသးကဟးဂီၤသ့ၣ်သ့ၣ်န့ၣ်လီၤ. မ့ၢ်လၢတၢ်ဖံးတၢ်မၤ, ဒီးတၢ်တိာ်ပာ်တဖၣ်န့ၣ် မ့ၢ်ယွၤအတၢ်မၤ, ဒီးတမ့ၢ်ဘၣ်ပတၢ်မၤအဃိ, မ်ပကပညိၣ်ပာ်ဖှိၣ်ပသးဆူ ယွၤအတၢ်ရဲၣ်တၢ်ကျဲၤလၢ ခ့ခါအကတီၢ်အဂီၢ်န့ၣ်တက့ၢ်.