ပလဲၤဟးသကိး ပိာ်ခွါဖိလၢ ပဟံၣ်ဖိဃီဖိ အံးထွဲကွၢ်ထွဲတဂၤဆူ တၤသၣ်လီၢ်, အမံၤဟူသၣ်ဖျါတတီၤ လၢတအိၣ်ယံၤဝဲဒီးပဟံၣ်, တလီၢ်လီၢ်န့ၣ်လီၤ. တၢ်လီၢ်လၢ အဝဲဘၣ်အသးအဒိၣ်ကတၢၢ်န့ၣ် မ့ၢ်ဝဲဒၣ် ဖိသၣ်အတၢ်လိာ်ကွဲလီၢ်, လၢအအိၣ်ဒီးတြဲၤဆံးဆံးဖိလၢ အနီၢ်ကစၢ်တဂၤ ကလဲၤနုာ်လီၤဝဲအဂီၢ်န့ၣ်လီၤ. ဘၣ်ဆၣ်, မ့မ့ၢ်ယၤန့ၣ်, ဒ်သိးယကနုာ်လီၤဆူ တၢ်လိာ်ကွဲလီၢ်အဂီၢ်, ယဘၣ်သကူးလီၤယနီၢ်ကစၢ်န့ၣ်လီၤ. ယကလူၤပိာ်အခံအဂီၢ်, ယချံးလီၤယခီၣ်လ့ၣ်ခိၣ်, ဒီးတီၤလီၤနုာ်လီၤလူၤပိာ်အခံန့ၣ်ဒီး, အဝဲနံၤဘၣ်ယၤန့ၣ်လီၤ.

တၢ်လိာ်ကွဲလီၢ် အတြဲၤဆံးဆံးဖိအံၤ ဒုးသ့ၣ်နီၣ်ထီၣ်ယၤလၢ ကစၢ်ယ့ၣ်ရှူး ပညိၣ်သိၣ်လိဝဲဒၣ် ဖျါဖဲ လံာ်မးသဲ ၁၈ အပူၤ, ဖဲအကိးန့ၢ် ဖိသၣ်တဂၤဆူအအိၣ်, ဒ်သိးကပာ်ဖျါဆှဲထီၣ် မ့ၢ်ပှၤဒ်လဲၣ်တကလုာ်န့ၣ် ကဘၣ်လဲၤနုာ်ဆူ မူခိၣ်ဘီမုၢ် (:၂) အဂ့ၢ်န့ၣ်လီၤ. မ့ၢ်လၢကစၢ်ခရံာ်အစိၤဆၢကတီၢ်, ဖိသၣ်စံးတၢ်န့ၣ် ပှၤတထံၣ်အဝဲသ့ၣ် ဒ်တၢ်အကါတဒိၣ်, (မ့) ဘၣ်တၢ်ကွၢ်ကပာ်ကွံာ် တမံၤအဃိ, အတၢ်သိၣ်လိန့ၣ် မ့ၢ်တၢ်ဟ့ၣ်ဒိပာ်ဖျါဒူဒူတမံၤန့ၣ်လီၤ. တၢ်လၢတဒ်သိးလိာ်အသးဒီးစိၤခဲအံၤန့ၣ် ဖိသၣ်တဖၣ် အတၢ်ထံၣ်, ဒီးအတၢ်ဆၢမိၣ်န့ၢ် တဖၣ်န့ၣ် တမ့ၢ်တၢ်လၢအကါဒိၣ်တဖၣ်ဘၣ်. ဒ်သိးဒီးကပာ်ဖျါထီၣ် ပှၤဟီၣ်ခိၣ်ဖိတဖၣ် အသးဆၢမၤတၢ်တဖၣ်, ဒ်အမ့ၢ် တၢ်ကဘၣ်ပာ်သူၣ်ပာ်သး, တၢ်ဃုမၤန့ၢ် တၢ်စိတၢ်ကမီၤ, ဒီးကဒိၣ်စိလုာ်ဘၢတၢ်အဂ့ၢ်အဂီၢ်, ကစၢ်ယ့ၣ်ရှူး စူးကါဝဲဒၣ် က့ၢ်ဂီၤအံၤန့ၣ်လီၤ.

တၢ်ဂ့ၢ်အံၤ တမ့ၢ်လၢ ကစၢ်ယ့ၣ်ရှူး အဲၣ်ဒိး အပျဲၢ်အဘီၣ်တဖၣ် ကဘၣ်ကဲထီၣ်က့ၤ ဖိသၣ်န့ၣ်ဘၣ်. မ့မ့ၢ်, ကဒုးနဲၣ်ဖျါထီၣ် ပှၤလၢအမၤအတၢ်မၤတဖၣ် အသူးသ့ၣ်ကံၢ်စီအတၢ်ပနီၣ်န့ၣ် မ့ၢ်တၢ်ဒ်လဲၣ်န့ၣ်လီၤ. တၢ်ပနီၣ်အဒိၣ်ကတၢၢ်အံၤ မ့ၢ်ဝဲဒၣ် တၢ်ဆီၣ်လီၤသး- “ပှၤလၢအဆီၣ်လီၤသး” (:၄), ဒီးမၤတၢ်ခ့တၢ်ပှၤအတၢ်မၤလၢ ပှၤဂုၤပှၤဂၤအဂီၢ်န့ၣ်လီၤ.

တၢ်လိာ်ကွဲလီၢ် အတြဲၤဆံးဖိအံၤ မ့ၢ်တၢ်ဒုးသ့ၣ်နီၣ်တမံၤ, လၢအမ့ၢ် တၢ်ဆီၣ်လီၤသးစံးတၢ်န့ၣ် တဟဲဃီၤဆူပအိၣ် အကစၢ်ဒၣ်ဝဲန့ၣ်ဘၣ်. ဘၣ်ဆၣ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်န့ၣ် ကဘၣ်ဆီၣ်လီၤအသး ဒ်သိးအံၤန့ၣ်လီၤ. ပကဘၣ်လူၤပိာ် ပကစၢ်လၢ အအုၣ်က့ၤခီၣ်က့ၤပှၤတဂၤအခံ, လၢအိၣ်မူပာ်ဖျါထီၣ် တၢ်အိၣ်မူက့ၢ်ဂီၤဒ်သိးအံၤ, ခီဖျိလၢ “ညိကွံာ်အလၤကပီၤ, ဒီးလိၣ်ထီၣ်အသးလၢပှၤကညီ, ဒီးဒိးန့ၢ်ကုၢ်အက့ၢ်အဂီၤ (ဖံလံး ၂:၇) န့ၣ်လီၤ.