တၢ်ကိၢ်ခါတၢ်မၤလိအကတီၢ်, ဘၣ်ဖဲမုၢ်နၤလၢခံအကတၢၢ်တနၤန့ၣ် ဒ်ယမ့ၢ်မုၣ်လိၣ်ဘိ တဂၤအသိး, ယသးကလၢၢ်ဘၣ်ယဲ ဒ်သိးဒီးယမ့ၢ်ပှၤအိၣ်ဂဲၤဆၢထၢၣ် ထဲတဂၤဧိၤလၢ ကရူၢ်ဖိတဖုအကျါန့ၣ်လီၤ. ဖဲပှၤကရူၢ်ဖိတဖၣ်အကျါတဂၤန့ၣ် နံၤဘၣ်ဖၣ်လဲယၤအဃိ, ယသးဘၣ်ဒိဘၣ်ထံးယဲဒၣ်န့ၣ်လီၤ. ယက့ၤဃ့ၢ်ဆူ ယဒဲဖိအပူၤ, ဒီးဖဲကရူၢ်ခိၣ် ဟဲကွၢ်စိကွၢ်ထံယၤန့ၣ်ဒီး, ယပာ်မံယသးန့ၣ်လီၤ. လၢခံတဂီၤ, ဖဲအဝဲဂုာ်ကျဲးစၢး စံးကတိၤသကိးလိာ်သးဒီးယၤလၢ တၢ်ဂ့ၢ်အံၤန့ၣ်ဒီး, ယဟးဆှဲးအီၤန့ၣ်လီၤ.

လၢခံ, အဝဲကွဲးဆှၢန့ၢ်ယၤလံာ်ပရၢ, ဒီးမၤစၢၤယၤ, ဒ်သိးယကသ့ၣ်ညါနၢ်ပၢၢ်ယဲလၢ ကစၢ်ယွၤ ကဟုကယာ်ယၤနီၢ်နီၢ်န့ၣ်လီၤ. အဝဲဟံးန့ၢ်ပာ်ဖျါ စီၤပီလူး အတၢ်ကွဲး, “… ပှၤလၢအမၤထီၣ်သီ တၢ်မၤဂ့ၤတမံၤလၢ သုပူၤတဂၤ, ကမၤလၢထီၣ်ပှဲၤထီၣ်ဝဲ တုၤလီၤလၢ ယ့ၣ်ရှူးခရံာ် အမုၢ်နံၤ” (ဖံလံး ၁:၆) န့ၣ်လီၤ. ယသးကလၢၢ်ဘၣ်ယဲလၢ, ပှၤတၢ်မၢဖိအတၢ်ကတိၤတဖၣ်န့ၣ်, လီၤဂာ်ဝဲဒၣ် ဒ်သိးတၢ်စံးကတိၤလီၤတၢ်လိၤလိၤဆူယအိၣ်န့ၣ်လီၤ.

လၢအပူၤကွံာ် နံၣ်လၢအဆံတဖၣ်န့ၣ်, ဖံလံးပံၤ အတၢ်အိၣ်ဖှိၣ်, လၢအသူၣ်ထီၣ်တ့ၢ်ဝဲအဂီၢ်, စီၤပီလူး ကွဲးဆှၢလီၤ လံာ်ပရၢ, လၢတၢ်ဟ့ၣ်ဂံၢ်ဟ့ၣ်ဘါ ဖံလံးပံၤ အတၢ်အိၣ်ဖှိၣ်ဖိ သ့ၣ်တဖၣ်, ကသူၣ်လီၤ အတၢ်အဲၣ်တၢ်ကွံအဂံၢ်န့ၣ်လၢ ကစၢ်ယွၤအဂီၢ်, ဒီးအဝဲသ့ၣ်ကဒဲကဒဲအဂီၢ်, “လၢတၢ်သ့ၣ်ညါအပူၤ, ဒီးလၢကယဲၢ်တၢ်နၢ်ပၢၢ်အပူၤ” န့ၣ်လီၤ. ဒ်ကစၢ်ယွၤ “မၤလၢထီၣ်ပှဲၤထီၣ်ဒီးတၢ်တီတၢ်လိၤအတၤသၣ်လၢ ယ့ၣ်ရှူးခရံာ်အဃိ, လၢယွၤအလၤကပီၤဒီးအတၢ်စံးထီၣ်ပတြၢၤအဂီၢ်” (:၁၁) လၢဖံလံးပံၤ အတၢ်အိၣ်ဖှိၣ်ဖိသ့ၣ်တဖၣ်အပူၤန့ၣ်ဝံၤ, ကစၢ်ယွၤ ကဖံးတၢ်မၤတၢ်တဖၣ်ဆူညါ ခီဖျိလၢအဝဲသ့ၣ်န့ၣ်လီၤ. စိၤဆၢကတီၢ်ဖဲန့ၣ်, တၢ်ဂ့ၢ်အခီၣ်ထံးခီၣ်ဘိ အတၢ်အိၣ်သးန့ၣ် ယတသ့ၣ်ညါနၢ်ပၢၢ်ယဲဘၣ်ဆၣ်, ယစးထီၣ် သ့ၣ်ညါယဲလၢ ယတၢ်မ့ၢ်တၢ်န့ၣ် မ့ၢ်ပှၤလၢ ကစၢ်ယွၤ အဲၣ်အီၤတဂၤ, အိၣ်ဟဲခီဖျိလၢ တၢ်သ့ၣ်ညါ, ဒီးတၢ်တူၢ်လိာ် ကစၢ်ယ့ၣ်ရှူး အတၢ်အဲၣ်န့ၣ်လီၤ.

ကစၢ်ယွၤ အဲၣ်ဒိးဝဲလၢ ပကဒိးန့ၢ် အတၢ်အဲၣ်, ဒ်သိးဒီးအတၢ်အဲၣ်န့ၣ် ကလၢဝဲပှဲၤဝဲ, ကဒိၣ်ထီၣ်အါထီၣ်ပှီၢ်ပှီၢ် လၢပသးကံၢ်ပူၤအဂီၢ်န့ၣ်လီၤ. ဒ်ကစၢ်ယွၤ မၤလၢပှဲၤပသူၣ်ပသးဒီးအတၢ်သးခု, ဒီးအတၢ်ဃူတၢ်မုာ်တဖၣ်န့ၣ်ဒီး, ပကသ့ၣ်ညါအါထီၣ် ကစၢ်ယွၤ,ဃုာ်ဒီးယွၤအတၢ်မၤဂ့ၤတဖၣ်လၢပပူၤစ့ၢ်ကီးန့ၣ်လီၤ.