ပှၤခရံာ်ဖိအသီခါ လီရဲး(စ) (Brother Lawrence) အတၢ်ကွဲး, “တၢ်အိၣ်မူအလုၢ်လၢ် လၢကစၢ်ယွၤအမဲာ်ညါ” (The Practice of the Presence of God) န့ၣ် ဘၣ်တၢ်စဲကျံးထုးထီၣ်ရၤလီၤအီၤ အဆိကတၢၢ်, ဖဲ ၁၆၉၂ နံၣ်န့ၣ်လီၤ. လၢတနံၤဘၣ်တနံၤ, အတၢ်ဟူးတၢ်ဂဲၤတၢ်ဖံးတၢ်မၤအပူၤ, အဝဲ ကွဲမုာ်ဝဲဒၣ် ကစၢ်ယွၤ ဒ်လဲၣ်အဂ့ၢ်န့ၣ် လီရဲး(စ) ကွဲးပာ်ဖျါဝဲလၢ အလံာ်အပူၤန့ၣ်လီၤ. ပှၤခရံာ်ဖိသီခါ လီရဲး(စ) အတၢ်ကတိၤလၢအမ့ၢ်, ကယဲၢ်ပမၤတၢ်ကိးမံၤဒဲး, ဒ်အမ့ၢ်တၢ်ကူးတပံၢ်လၢကရၢၢ်အပူၤ, တၢ်လဲၤပှ့ၤန့ၢ် တၢ်အီၣ်တၢ်အီတဖၣ်လၢကျး, (မ့) တၢ်ဟးကသူၣ်ယုၤထွံၣ်, တၢ်မၤလၢပဖံးမၤတဖၣ်အပူၤ, ပကဃုယွၤ ခီဖျိလၢတၢ်ထုကဖၣ်န့ၣ် ကဲထီၣ်တၢ်တၤပှၤတထံၣ်အဖၢမုၢ်န့ၣ်လီၤ.

ယလဲၤဟးကသုၣ်ယုၤ ယထွံၣ်ဖိ ဝ့စတၢၣ် (Winston) လၢကျဲ, တနံၤဘၣ်တနံၤန့ၣ်လီၤ. ယတၢ်ပညိၣ် မ့ၢ်ဝဲဒၣ်လၢ ယထွံၣ်ဖိ ကဒိးန့ၢ် နီၢ်ခိအတၢ်ဟူးတၢ်ဂဲၤအဂီၢ်န့ၣ်လီၤ. မ့မ့ၢ် ဝ့စတၢၣ် အတၢ်ကွၢ်စိန့ၣ် ကမ့ၢ်တၢ်မနုၤလဲၣ်. မ့ၢ်တၢ်လူၤနၢကွၢ်တၢ်ကိးမံၤဒဲးန့ၣ်လီၤ. တၢ်ကကိးအကတီၢ်ဖိအံၤလၢ “တၢ်လဲၤဟးကသုၣ်ယုၤ” စံးတၢ်န့ၣ် ကမ့ၢ်တၢ်စံးကတိၤမုာ်နၢ်တမံၤန့ၣ်လီၤ. ပအိၣ်ပတုာ်တၢ်လဲၤန့ၣ် အါန့ၢ်ဒံး, ပတၢ်လဲၤဟးကျဲန့ၣ်လီၤ. လၢခံန့ၣ်ဒီး, တၢ်လဲၤလီၣ်လဲၤထီဆူညါတအိၣ်ဘၣ်အဃိ, လၢပသးကဘၣ်တံာ်တာ်တၢ်အလီၢ်န့ၣ်, ယဃ့ထုကဖၣ်ယဲလၢ ကစၢ်ယွၤ ကမၤစၢၤဒုးထံၣ်ယၤ တၢ်အကတီၢ်ဖိအံၤ, ဒ်တၢ်ဟ့ၣ်ပလီၢ်တမံၤအသိး, ပတၢ်အိၣ်မူန့ၣ် လီၤဂာ်ဒိၣ်မးဒီးတၢ်လူၤဟးကသုၣ်ယုၤထွံၣ်တဒုန့ၣ်လီၤ. လၢတၢ်သးတီအပူၤ, ပမ့ၢ်စူၢ်ဒိကနၣ်ကစၢ်ယွၤန့ၣ်ဒီး, ပကလဲၤခီဖျိကလၢၢ်ဘၣ်ယွၤအတၢ်အိၣ်ဒီးပှၤ လၢတနံၤဘၣ်တနံၤ, ပတၢ်အိၣ်မူအတၢ်ဟူးဂဲၤဖံးမၤတၢ်တဖၣ်အပူၤ,ဃုာ်ဒီးလၢတၢ်တပာ်သူၣ်ပာ်အပူၤ အနုာ်လီၤမၤတံာ်တာ်တၢ်တဖၣ်န့ၣ်လီၤ.

တၢ်မၤလိဒ်သိးအံၤ, လၢလံာ်ကတိၤဒိ ၆ အပူၤန့ၣ်, စီၤရှလိၤမိၤ ပာ်ဖျါဝဲ, ဒီးစူးကါဟ့ၣ်ဒိ တၢၢ်ဖိအတၢ်ဆီၣ်လီၤသးကိးမုၢ်နံၤအဂ့ၢ်, “လဲၤဆူတၢၢ်ဧိၤတြၤဧိၤအအိၣ်, ကွၢ်ဆိအကမိၣ်အကျဲဒီး ကူၣ်တၢ်သ့တက့ၢ်” (:၆), ဒ်သိးဒီးပကမၤတၢ်လၢတၢ်သးတီအဂီၢ်န့ၣ်, ဟ့ၣ်ကူၣ်ပှၤန့ၣ်လီၤ. စီၤပၤရှလိၤမိၤ စူးကါဝဲဒၣ် တၢၢ်ဖိတဖၣ်ဖံးတၢ်မၤတၢ် ကိးမုၢ်နံၤဒဲးလၢတၢ်သးစူၤအပူၤ, ဒ်အမ့ၢ်တၢ်အဒိအတဲာ်လၢ အလီၤကွၢ်လိတမံၤ (:၇-၈) န့ၣ်လီၤ.

ပတၢ်ရ့လိာ်သးဒီးယွၤန့ၣ် တလိၣ်ပကပာ်လီၤဆီ, ပာ်ပနီၣ်အီၤ, ဒ်တၢ်ဆၢကတီၢ်လၢ “သူၣ်ဂ့ၢ်သးကျိၤ” အဂီၢ်, တၢ်လဲၤဘါယွၤလၢသရိာ် (မ့) တၢ်အိၣ်ဘှ့ၣ်အိၣ်ဘှီၣ်အကတီၢ်ဖိဧိၤန့ၣ်ဘၣ်. တၢ်သ့ၣ်တဖၣ်အလီၢ်န့ၣ်, ပမ့ၢ်စူၢ်ဒိကနၣ်ယွၤလၢ တၢ်သးတီအပူၤန့ၣ်, ဒ်သိး ပကထံၣ်န့ၢ် အစုတၢ်ဘၣ်တ့တဖၣ်ကိးမုၢ်နံၤဒဲးအဂီၢ်, ယွၤကွဲမုာ်ပှၤန့ၣ်လီၤ.