ဖဲဒၣ်တၢ်တယံာ်ဒံးဘၣ်န့ၣ် ယသ့ၣ်ညါဘၣ် တၢ်ဘိၣ် အမံၤ “ခဲ” (Care) န့ၣ် မ့ၢ်ဝဲဒၣ် လံာ်မဲာ်ဖျၢၣ်ကွဲးဖုၣ်, ဒီးလံာ်ဖျၢၣ်အလၢအပှဲၤန့ၣ် “တၢ်ပာ်ဖှိၣ်မၤသကိး ပှၤအမဲရကၤဖိအစ့, လၢတၢ်ဆှၢအီၤဆူ ကီၢ်မိၢ်ပှၢ်ယူရပၤ” (Coorperative for American Remittances to Europe), ဖဲဟီၣ်ခိၣ်ဒီဘ့ၣ်တၢ်ဒုးဖးဒိၣ် ခံဘျီတဘျီအကတီၢ်, ဒ်သိးတၢ်ကမၤစၢၤ ပှၤယူရပၤဖိ, လၢအဘၣ်သုးလီၢ်သုးကျဲတဖၣ်အဂီၢ်, ပှၤအိၣ်ဝဲတကရူၢ် လၢအဆှၢလီၤ တၢ်အီၣ်အဘိၣ်တဖၣ်န့ၣ်လီၤ. ဖဲယဖိတဖၣ် လဲၤထီၣ် ခီလ့ၣ်အကတီၢ်, ယဆှၢဟ့ၣ်လီၤ တၢ်သးအိၣ်အဘိၣ်အပူၤန့ၣ် အါတက့ၢ်, အိၣ်ပှဲၤဒီးဟံၣ်အတၢ်အီၣ်တၢ်အီ, ဒီးတၢ်ဆၢ ကိၢ်လိၣ်,ဃုာ်ဒီး ကၠိအတၢ်ပိးလီ အဘျဲၣ်အစဲၢ် လၢအလိၣ်နီၢ်နီၢ်တဖၣ်, (မ) ဆ့ကၤအိၣ်တ့ၢ်လၢဟံၣ်တဖၣ်, လၢအဘၣ်ယဖိတဖၣ်အသးအဒိၣ်ကတၢၢ်န့ၣ်လီၤ.

မံၤ “တၢ်သးအိၣ်အတၢ်ဘိၣ်” န့ၣ် ကမ့ၢ် စိၤခဲအံၤ အတၢ်ကိးဘၣ်ဆၣ်, တၢ်မၤဒ်အမ့ၢ် တၢ်ဆှၢထီၣ်ဆှၢလီၤ ပိးလီတဖၣ်လၢအကကဲထီၣ် တၢ်မၤစၢၤန့ၣ် ဘၣ်တၢ်မၤတ့ၢ်ဝဲလၢပျၢၤန့ၣ်လီၤ. တၢ်ဂ့ၢ်အံၤ ပကထံၣ်ဘၣ် ဖဲလံာ် ၂ တံၤမသ့း အကတၢၢ်ဖိန့ၣ်လီၤ. ဖဲ စီၤပီလူး ဘၣ်တၢ်စၢဃာ်အီၤ ဖဲ ဝ့ၢ် ရိမ့ၤ အကတီၢ်, ကွဲးဆှၢလီၤ အတၢ်ပရၢဆူ အပျဲၢ်လၢအနာ်န့ၢ်ဝဲ တဂၤအအိၣ်န့ၣ် ကွဲးကတၢၢ်ဝဲဒၣ်,ဃုာ်ဒီးအနီၢ်ကစၢ်အတၢ်ဃ့ထီၣ်တနီၤန့ၣ်လီၤ. စီၤပီလူး မၢဝဲဒၣ် စီၤတံၤမသ့း ကဟဲဆူအအိၣ်, ဒီးကဟဲကိး စီၤမၢ်ကူးဒ်သိး ကမၤစၢၤအီၤ (၄:၁၁)အဂီၢ်န့ၣ်လီၤ. လၢအဂီၢ်န့ၣ် ဃ့ဝဲဒၣ် အတၢ်ဖိတၢ်လံၤတနီၤ, အဆ့ဖးဒိၣ်, ဒီးလံာ်ဧိၤလဲၢ်ဧိၤလီၤဆီဒၣ်တၢ်လံာ်တၢ်ဖံးတဖၣ်” (:၁၃) န့ၣ်လီၤ. တၢ်ဂိၢ်အကတီၢ်ကတုၤဝဲ, ဒီးကလိၣ်ဘၣ် ဆ့ကၤဖးဒိၣ်သ့ၣ်သ့ၣ်, ဒီးလံာ်လဲၢ်တဖၣ်န့ၣ် ကမ့ၢ် လံာ်စီဆှံအလီၢ်လံၤသ့ၣ်သ့ၣ်န့ၣ်လီၤ. တၢ်ကမ့ၢ်ဝဲ ဒ်လဲၣ်ဂ့ၤဒ်လဲၣ်ဂ့ၤ, ဒ်သိးတၢ်ကမၤသီထီၣ်က့ၤအီၤ, ဒီးတၢ်ဟ့ၣ်ဂံၢ်ဟ့ၣ်ဘါအီၤ
အဂီၢ်, စီၤပီလူး ဆၢမိၣ်န့ၢ် တၢ်ရ့လိာ်သကိး, ဒီးပီးလိလၢစူးကါဝဲကန့ၢ်နီၢ်နီၢ်တဖၣ်န့ၣ်လီၤ.

ပှၤအိၣ်ဆိးဝဲလၢ တၢ်လီၢ်အဘူးမ့ၢ်ဂ့ၤ, အယံၤမ့ၢ်ဂ့ၤ, မ့ၢ်ဒိးန့ၢ် တၢ်သးအိၣ်အတၢ်ဟ့ၣ် လၢပဖီၣ်န့ၢ်ပထံၣ်သ့နီၢ်နီၢ်တဖၣ်န့ၣ်, ဒုးအိၣ်ထီၣ်တၢ်ကဲဘျုးဒိၣ်ဒိၣ်ကလဲာ်ဆူ ပှၤတဂၤဂၤလၢအလိၣ်ဘၣ် တၢ်ကဟ့ၣ်ဂံၢ်ဟ့ၣ်ဘါအဝဲသ့ၣ်အဂီၢ်သ့ဝဲဒၣ်န့ၣ်လီၤ. ပှၤအိၣ်ဆိးလၢပဟံၣ်အခိၣ်အဃၢၤတဖၣ်အဂီၢ်, တၢ်အီၣ်တၢ်အီအတၢ်ဟ့ၣ်, ပှၤလၢပအဲၣ်ဘၣ်တဂၤ (မ့) ပှၤလၢပသ့ၣ်ညါလိာ်သးတဂၤအဂီၢ်, တၢ်ကွဲးပာ်ဖျါ တၢ်သူၣ်အိၣ်သးအိၣ်အတၢ်ဆိကမိၣ်လၢလံာ်က့ခးဖိတဘ့ၣ်အလိၤ, (မ့) တၢ်ဆှၢလီၤ တၢ်ဘိၣ် အိၣ်ပှဲၤဒီးပိးလီလၢတၢ်စူးကါန့ၢ်အီၤတဖၣ်ဆူ တံၤသကိးအိၣ်ဆိးဝဲလၢ တၢ်လီၢ်အယံၤတဖၣ်န့ၣ် မၤလဲၣ်ထီၣ်မၤအါထီၣ် ယွၤအတၢ်အဲၣ် လၢအအိၣ်ဖျိထံၣ်ဖျါနီၢ်နီၢ်အပူၤ သ့ဝဲဒၣ်န့ၣ်လီၤ.