ဖဲအိၣ်ဘှံးနံၤ တၢ်မၤလိအကတီၢ်န့ၣ်, ဖိသၣ်ဆံး သၢနံၣ်ဖိ ဖံထၢၣ် (Peter) အဂီၢ်, ယဝံသးစူၤတၢ်န့ၣ် ဆံးလီၤစှၤလီၤဝဲဒၣ်လံန့ၣ်လီၤ. အနီၢ်ကစၢ် တၢ်သးတခုတအိၣ်, တၢ်သူၣ်တအိၣ်သးတအိၣ် ပှၤဖိသၣ်အဂုၤအဂၤတဖၣ်န့ၣ်ဘၣ်. ဒီးဖဲပဟ့ၣ်အီၤ တၢ်ဂီၤတၢ်လိာ်ကွဲဖိလၢ အသးကွံကတၢၢ်တဖၣ်ဒၣ်လဲာ်, အသးတသးမံဝဲဒၣ်လ့ၤတက့ၢ်ဘၣ်န့ၣ်လီၤ. ယတၢ်သးကညီၤလၢအဂီၢ်န့ၣ် ကဲထီၣ်ဝဲဒၣ် တၢ်သးအ့န့န့ၣ်လီၤ. အဝဲမ့ၢ် မၤကိၤအခိၣ်, ဒီးမၤကီမၤခဲတၢ် ဒ်သိးအံၤန့ၣ်ဒီး, တၢ်ဂ့ၢ်ကီတအိၣ်ဘၣ်. ယကဆှၢက့ၤအီၤဆူ အမိၢ်အပၢ်အအိၣ်, ဒီးကလဲၤပူၤကွံာ်ဝဲဒၣ် တၢ်လၢအမုာ်လၤသးခုဝဲခဲလၢာ်တဖၣ်န့ၣ်လီၤ.
ယတၢ်သးကညီၤန့ၣ် အိၣ်ဒီးတၢ်ဂ့ၢ်တၢ်ကျိၤတဖၣ်အလိၤန့ၣ် ယဃုထံၣ်န့ၢ်ဘၣ်ယဲ တလီၢ်လီၢ်န့ၣ်လီၤ. ပှၤတဂၤဂၤ မ့ၢ်တကနၣ်ဃုာ် ယတၢ်ဟ့ၣ်ကူၣ်, (မ့) မ့ၢ်တတူၢ်လိာ်ယတၢ်မၤစၢၤဘၣ်န့ၣ်ဒီး, မ့ၢ်လၢအဝဲသ့ၣ် တကြၢးဝဲဒၣ်ဒီးယတၢ်သူၣ်အိၣ်သးအိၣ်တဖၣ်အဃိန့ၣ်လီၤ. တၢ်အဂ့ၤတမံၤလၢပဂီၢ်န့ၣ်, ကစၢ်ယွၤ တမၤဝဲဒၣ်ပှၤလၢ ကျိၤကျဲဒ်သိးအံၤအပူၤဘၣ်. ဖဲကစၢ်ယွၤ မၢလီၤ ဝံယိၤနါလၢ အကဘၣ်လဲၤ, ဒီးစံၣ်တဲၤတဲလီၤ ဝ့ၢ် နံၤနဝ့ အကတီၢ် (ယိၤနါ ၁:၂), ဝံယိၤနါ မၤကိၤအခိၣ်, ဒီးတစူၢ်ဒိကနၣ်ယွၤအကလုၢ်ဘၣ်ဆၣ်, ဒိးန့ၢ်ဝဲဒၣ် ယွၤအတၢ်သးကညီၤဖးဒိၣ်န့ၣ်လီၤ. လၢတၢ်ဂ့ၢ်လိာ်ထီဒါအပူၤ, မ့ၢ်လၢ ဝံယိၤနါ ဃုထၢလဲၤဝဲဒၣ် ကျဲအဂၤအဃိ, စီၤယိၤနါ ဘၣ်ကွၢ်ဆၢၣ်မဲာ်ဒီးကလံၤမုၢ်ဖးဒိၣ်တဖျၢၣ်, လီၤထွံဝဲလၢ ပီၣ်လဲၣ်ပူၤ, ဒီးဘၣ်တၢ်ယူၢ်လီၤလၢ ညၣ်ဖးဒိၣ်တဘ့ၣ်- ဒ်အမ့ၢ် အနီၢ်ကစၢ် အတၢ်မၤဟးဂီၤလီၤအသးဒၣ်ဝဲ (:၄,၁၅-၁၇) န့ၣ်လီၤ အကတၢၢ်န့ၣ် ဖဲ စီၤယိၤနါ “ဘါထုကဖၣ်ယွၤ” (၂:၁), ဒီးကစၢ်ယွၤ ဒိကနၣ် အတၢ်ထုကဖၣ်အဖၢမုၢ်, ကစၢ်ယွၤအိၣ်ကတဲာ်ကတီၤပာ်အသး ဒ်သိးကပျၢ်ဝဲဒၣ် အဝံလၢ အသူၣ်ဃၢအသးဃၢတဂၤအတၢ်ကမၣ်န့ၣ်လီၤ. ယွၤ မၤပူၤဖျဲးထီၣ် စီၤယိၤနါလၢ ညၣ်အဟၢဖၢပူၤ, ဒီးလၢတၢ်ဘျုးတၢ်ဖှိၣ်အပူၤန့ၣ် ဒိးန့ၢ်ဝဲ တၢ်ခွဲးတၢ်ယာ်ခံဘျီတဘျီ ဒ်သိးကလဲၤဝဲဆူ ဝ့ၢ် နံၤနဝ့ (၃:၁)န့ၣ်လီၤ.
ဘၣ်ဃးဒီးဖိသၣ်ဆံးဖံထၢၣ်အဂ့ၢ်န့ၣ် ဒ်ပှၤမၤစၢၤတၢ်လၢ အတၢ်သူၣ်စူၤသးစူၤအါန့ၢ်ဒံးယၤတဂၤ ဟ့ၣ်ကူၣ်ဝဲအသိး, ပတၢ်လဲၤဟးဆူ တၢ်လိာ်ကွဲလီၢ်တတီၤန့ၣ်မၤမုာ်ထီၣ်က့ၤ ဖံထၢၣ် အသးန့ၣ်လီၤ. လၢပနီၢ်ကစၢ်ဒၣ်ဝဲ အတၢ်ဂ့ၢ်ကီအပူၤဒၣ်လဲာ်, တၢ်သးကညီၤလၢအဃုထံၣ်န့ၢ်ပှၤထီဘိအံၤန့ၣ် ဃံဝဲလၤဝဲဒၣ်ထဲလဲၣ်.