ဝ့ၢ်လိဒိၣ် (Landon) မ့ၢ် ဝ့ၢ်ဖးဒိၣ်တဖျၢၣ်လၢ ပှၤကညီအိၣ်ဆိးဝဲ အါကလုာ်အါမၠိန့ၣ်လီၤ. ပှၤကညီတဖၣ် အိၣ်ဟဲလၢ ထံကီၢ်အါဘ့ၣ်, ဒီးအိၣ်ဆိးအိၣ်သဃဲၤလိာ်သးန့ၣ်လီၤ. ပှၤအါဒံအါဂၤ လၢဟီၣ်ခိၣ်ဒီဘ့ၣ် ဟဲပာ်ဖှိၣ်ထီၣ်အသးန့ၣ် ဟဲစိာ်တၢ်ဂ့ၢ်လီၤဆီတဖၣ် သ့ဝဲဒၣ်, ပာ်ဃုာ်ဒီးတၢ်အီၣ်တၢ်အီလၢ အလီၤကမၢကမၣ်တဖၣ်, ဒီးတၢ်တၤသ့ၣ်တဖၣ်န့ၣ်လီၤ. အဒိ, ဖဲတၢ်တယံာ်ဒံးဘၣ်န့ၣ် ယတံၤသကိးတဂၤ အိၣ်ဟဲလၢ ယူရပၤအထံကီၢ်တဘ့ၣ်န့ၣ် တၢ်ပျဲနုာ်လီၤ အထံကီၢ်ဆူ “ယူရပၤ ကီၢ်စၢဖှိၣ်ကရၢ” (European Union), ဒီးလၢဝ့ၢ်လိဒိၣ်န့ၣ် အသးကလၢၢ်ဘၣ်ဝဲလၢ အဝဲသ့ၣ်မ့ၢ် ပှၤတကလုာ်လၢ ပှၤတပးကဲ အဒိၣ်ကတၢၢ်အဃိ, ယသးတမုာ်ဘၣ်ယဲလၢအဂီၢ်န့ၣ်လီၤ. အဝဲသ့ၣ်အသးကလၢၢ်ဘၣ်ဝဲလၢ ပှၤကွၢ်ကပာ်အီၤ, ဘၣ်တၢ်ပာ်ဒ့ၣ်ပာ်ကမၣ် လၢတၢ်ကီတၢ်ခဲတဖၣ်အဂီၢ်, ဒီးတၢ်ဖံးတၢ်မၤလၢ အဘၣ်မၤဝဲတဖၣ်အဃိ, တူၢ်တန့ၢ်ခီၣ်တကဲလၢၤဘၣ်န့ၣ်လီၤ.
မ့ၢ်လၢကစၢ်ယွၤ တအိၣ်ဒီးတၢ်ကွၢ်မဲာ်အဃိ, ပဝဲစ့ၢ်ကီး တကြၢးပအိၣ်ဒီးတၢ်ကွၢ်မဲာ်ဘၣ်န့ၣ်လီၤ. ပှၤကညီတဖၣ်အဘၢၣ်စၢၤ တၢ်အဒူၣ်အဆၢတဖၣ်န့ၣ် ကစၢ်ယွၤ မၤလီၤပှီၢ်ကွံာ်လံန့ၣ်လီၤ. ဖဲ စီၤပ့းတရူး ဃ့ထုကဖၣ်တၢ်လၢ ဟံၣ်ခိၣ်ဒုးအဖီခိၣ်အကတီၢ်, ဒီးဒိးန့ၢ်ဝဲ အတၢ်ထံၣ်လၢညါခီအပူၤန့ၣ် ကစၢ်ယွၤ အသးစီဆှံ မၤလိာ်ဝဲ စီၤပ့းတရူးလၢ ကစံးဘၣ်တဲဘၣ် တၢ်သးခုအကစီၣ်အဂ့ၢ်ဆူ စီၤကန့လံး, ပှၤကလုာ်ဂၤလၢ အပျံၤယွၤတဂၤအအိၣ်ဒ်လဲၣ်န့ၣ် ပကထံၣ်ဘၣ် သးစီဆှံ အတၢ်မၤန့ၣ်လီၤ. ပှၤယူဒၤဖိအတၢ်သိၣ်တၢ်ဘျၢတထံၣ် ဘၣ်ဃးဒီးတၢ်တမၤဘၣ်ထွဲလိာ်သးဒီးပှၤကလုာ်အဂုၤအဂၤအဂ့ၢ်န့ၣ် ဒ်သိးဒီးစီၤပ့းတရူး ကဆိကမိၣ်ကွၢ်ထံက့ၤဝဲအဂီၢ်, ကစၢ်ယွၤ မၤစၢၤဝဲဒၣ်န့ၣ်လီၤ. ပှၤတၢ်မၢဖိန့ၣ် ဒိကနၣ်ဝဲ, ဒီးလဲၤဝဲဆူ စီၤကန့လံး အဟံၣ်, ဒီးဟ့ၣ်နီၤလီၤ ကစၢ်ယ့ၣ်ရှူး အတၢ်သးခုကစီၣ်အဂ့ၢ်, ဒီးစံးဝဲဒၣ် “ယထံၣ်နီၢ်နီၢ်လၢ ယွၤတကွၢ်ဒိၣ်ဆံးအါစှၤဘၣ်ပှၤကညီဘၣ်. မ့ၢ်အတူၢ်လိာ်ပှၤလၢ အပျံၤအီၤဒီး မၤတၢ်တီတၢ်လိၤလၢပှၤကိးကလုာ်ဒဲးအကျါ” (မၤ ၁၀:၃၄-၃၅) န့ၣ်လီၤ.
ပှၤပိာ်ကစၢ်ယ့ၣ်ရှူးအခံတဖၣ်န့ၣ် ကဘၣ်အဲၣ်, ဒီးကဘၣ်မၤတၢ်လၢ ပှၤသ့ၣ်တဖၣ်လၢအဘၣ်တၢ်တ့အီၤ ဒ်ကစၢ်ခရံာ်အက့ၢ်အဂီၤအသိးတဖၣ်အဂီၢ်န့ၣ်လီၤ. တၢ်မၤကစၢ်ယွၤ အတၢ်မၤတဖၣ်အကျါတမံၤန့ၣ် မ့ၢ်တၢ်တကွၢ်ဒိၣ်ဆံးအါစှၤဆူ ပှၤကညီလၢထံကီၢ်တနီၤ (မ့) ပှၤလၢအဖံးညၣ်လွဲၢ် လီၤဆီတဖၣ်အအိၣ်ဘၣ်န့ၣ်လီၤ. ဒ်ကစၢ်ယွၤ ဒုးနဲၣ်ပှၤ အသိး, မ်ပကမၤလိ ဃုထံၣ်န့ၢ်တၢ်တီတၢ်လိၤ, ဒီးထီဒါဒီသဒၢ ပှၤဘၣ်တၢ်ဆီၣ်ဘံၣ် ဆီၣ်သနံးတဖၣ်အဂီၢ် (ယရှါ ၁:၁၇) န့ၣ်တက့ၢ်.
