လၢပကၠိန့ၣ် ကီၢ်ရ့ၣ်အပတီၢ်, တၢ်ကနိလိာ်သး အတၢ်လိာ်ကွဲပြၢန့ၣ်, ဖိသၣ်အသးအနံၣ်အလါ ၈ နံၣ် ထဲသိးသိးတဖၣ် ဂဲၤပျုၢ်ကျဲးစၢးမၤနၢၤတၢ် လၢလီၢ်ဂဲၤလိနီၢ်ခိအဒါတဖၣ်အလိၤ, ဒ်သိးဒီးကမၤနၢၤဝဲ ပှၤသတြီၤထီဒါတၢ်တဂၤအဂီၢ်, စူးကါဝဲ တၢ်ဖီၣ်စှီၤဃာ် ကနိလိာ်သး လၢတၢ်ကူၣ်သ့အပူၤန့ၣ်လီၤ. တၢ်ကနိလိာ်သးန့ၣ် မ့ၢ်လၢပျၢၤတၢ်လိာ်ကွဲလၢ အလိၣ်ဘၣ် တၢ်ပာ်ဖှိၣ်မၤ တၢ်သ့တၢ်ဘၣ်တဖၣ်, ဒ်အမ့ၢ်တၢ်ထဲးလီၤ, တၢ်ဂုာ်ထူၣ်ဖျဲးသး, တၢ်ဆီၣ်ကျံၤတံၢ်ဃာ်တၢ်, ဒီးတၢ်ဟူးဂဲၤဃၣ်တရံးလၢ တၢ်ပလီၢ်သူၣ်ပလီၢ်သး လၢအဒုးမၤန့ၢ်အဖီးတဖၣ်, ဒ်သိးကမၤနၢၤတၢ်ပြၢအဂီၢ်န့ၣ်လီၤ. ပိာ်မုၣ်ဖိသၣ် သၢတီၤဖိ, လၢကမျၢၢ်ဘၣ်အသးတဂၤန့ၣ်, ချ့န့ၢ်ဖျဲၣ်န့ၢ်ပှၤပြၢတၢ်ဒီးအီၤတဖၣ်, ဒီးအဝဲစူးကါ တၢ်သုးအသးချ့သဒံးတဖၣ် လၢအမၤတရံး ပှၤပြၢတၢ်ဒီးအီၤအမဲာ်, ဒီးမၤနၢၤဝဲဒၣ်န့ၣ်လီၤ.
စီၤယၤကိာ် စူးကါဝဲ တၢ်ကူၣ်တရံးအကျိၤအကျဲတဖၣ် ဒ်သိးကမၤန့ၢ် အဒီပုၢ်ဝဲၢ် အတဃံာ် စီၤဧ့ၤရှီၤ အတၢ်အဂ့ၤကတၢၢ်, ခီဖျိ “တၢ်ကနိ” ထုးထီၣ်ကွံာ် စီၤဧ့ၤရှီ လၢအတၢ်န့ၢ်သါခွဲးယာ် လၢအပၢ်အအိၣ် ( ၁ မိၤ ၂၅:၃၃), ဒီးတၢ်အိၣ်မူအတၢ်ဆိၣ်ဂ့ၤ (၂၇:၂၇-၄၀) န့ၣ်လီၤ. ဘၣ်ဆၣ်, တၢ်ဟုၣ်န့ၢ် တၢ်ဆိၣ်ဂ့ၤအဃိ, စီၤယၤကိာ် ဘၣ်ဃ့ၢ်ပူၤဖျဲးအသး, ဒီးဘၣ်ဃၢ်ကွံာ်အသးလၢ အပၢ်ဟံၣ်ဖိဃီဖိ, ဘၣ်သန့ၤအသးဒီးအမံၤပှၢ်လၢ အကူၣ်တရံးလီၤန့ၢ်တၢ်တဂၤအလိၤ, ဒီးဘၣ်အိၣ်မူဝဲလၢ တၢ်ပျံၤအဝဲၢ်ခွါအတၢ်သးထီၣ်အပူၤန့ၣ်လီၤ.
လၢခံန့ၣ်, ဖဲ စီၤယၤကိာ် ဘၣ်အိၣ်ဝဲဒၣ်ထဲတဂၤဧိၤအကတီၢ်, ဘၣ်ကနိလိာ်သး ဒီတနၤဒီးပှၤကညီတဂၤ လၢအမ့ၢ် ယွၤအနီၢ်ကစၢ်ဒၣ်ဝဲန့ၣ်လီၤ. ပှၤတဂၤအံၤ စံးဘၣ်အီၤ, “ပျၢ်ယၤတက့ၢ်. အဂ့ၢ်ဒ်အံၤ မုၢ်ဆ့ၣ်ဝါထီၣ်လံ” (၃၂:၂၆) န့ၣ်လီၤ. ဘၣ်ဆၣ်, စီၤယၤကိာ် စံးဆၢအီၤလၢ “နမ့ၢ်တဆိၣ်ဂ့ၤဘၣ်ယၤဘၣ်ဒီး, ယတပျၢ်ဘၣ်နၤဘၣ်” (:၂၆) န့ၣ်လီၤ. အကတၢၢ်န့ၣ်, စီၤယၤကိာ် ဃုထံၣ်န့ၢ် အကစၢ်ဒၣ်ဝဲအတၢ်ဆိၣ်ဂ့ၤ, ဖီၣ်စှီၤဃာ် ကစၢ်ယွၤဃံးဃံး, တုၤဒၣ်လဲာ် တၢ်ဆီတလဲလိာ်ကွံာ်အမံၤ လၢအနဲၣ်ဖျါထီၣ် အသးဆီတလဲလံန့ၣ်လီၤ.
ဒ်သိးပကဒိးန့ၢ်ဘၣ် တၢ်ဆိၣ်ဂ့ၤထူးထူးတီၤတီၤလၢယွၤအအိၣ်န့ၣ်, တၢ်ကူၣ်တရံးလီန့ၢ်တၢ်အဂီၢ်, အလီၢ်တအိၣ်ဘၣ်. တၢ်လိၣ်ဝဲဒၣ်ထဲ တၢ်ပာ်သးစွံကတုၤန့ၣ်လီၤ. စီၤယၤကိာ် မၤလိန့ၢ် တၢ်အိၣ်မူရ့လိာ်သးဒီးကစၢ်ယွၤန့ၣ်လီၤ. တၢ်ဖီၣ်စှီၤဃာ်ယွၤလၢ
တၢ်သးစွံကတုၤ, ဒီးတၢ်သးတီအပူၤန့ၣ် မ့ၢ်တၢ်မၤနၢၤလၢ ယွၤကဟ့ၣ်ခိၣ်ဖးန့ၣ်လီၤ.