ကၠ့စဲ(န) (Jason) ဒီး ပံၤယၢၣ် (Pierre) ဖံးသကိးမၤသကိးတၢ်တ့ဘှီထီၣ် တၢ်ဒီသဒၢဟံၣ်အတၢ်ဒူၣ်အတၢ်မၤ တပူၤဃီန့ၣ် အိၣ်ဝဲဒၣ် အနံၣ်တဆံလံန့ၣ်လီၤ. အဝဲသ့ၣ် မ့ၢ်ပှၤဒီတံၤသကိးအဂ့ၤတဖၣ်ဘၣ်ဆၣ်, ခံဂၤလိာ်န့ၣ် တစံးကတိၤတၢ်အါအါဘၣ်. ဖဲအဝဲသ့ၣ် ဖံးတၢ်မၤတၢ်အကတီၢ်ဒၣ်လဲာ်, တညီနုာ်စံးကတိၤလိာ်သးဘၣ်န့ၣ်လီၤ. ဘၣ်ဆၣ်, တဂၤဒီးတဂၤအဂ့ၢ်န့ၣ် သ့ၣ်ညါလိာ်အသးဂ့ၤဂ့ၤဘၣ်ဘၣ်အဃိ, တၢ်တစံးတကတိၤတၢ်န့ၣ် တမ့ၢ်တၢ်ဂ့ၢ်ကီ လၢအဝဲသ့ၣ်အဂီၢ်ဘၣ်. လၢတၢ်ဆဲးကျိးလိာ်သး, အဂီၢ်န့ၣ်, ထဲဒၣ်တၢ်ဖျးလီၤအခိၣ် (မ့) လၢမဲာ်ချံအတၢ်ကွၢ်တစိၤဖိဧိၤန့ၣ်, တဂၤဒီးတဂၤ သ့ၣ်ညါဝဲ တၢ်လၢကဘၣ်မၤဝဲတဖၣ်န့ၣ်လီၤ. တၢ်စံးတၢ်ကတိၤတအိၣ်ဘၣ်ဆၣ်, တၢ်နဲၣ်စုနဲၣ်ခီၣ်န့ၣ် ပာ်ဖျါထီၣ်တၢ်အါမးန့ၣ်လီၤ.
ထါစံးထီၣ်ပတြၢၤ ၃၂ ပာ်ဖျါထီၣ်ဝဲ ယွၤဒီးပှၤကွဲးထါအဘၢၣ်စၢၤ တၢ်သ့ၣ်ညါရ့လိာ်သးဘူးဘူးတံၢ်တံၢ် အပတီၢ်ဒ်သိးအံၤန့ၣ်လီၤ. အဆၢဖိ (၈) ပာ်ဖျါဝဲ “ယကဟ့ၣ်ကူၣ်နၤလၢယမဲာ်” န့ၣ်လီၤ. ယွၤတအိၣ်ခိးကွၢ်ဝဲလၢတၢ်လီၢ်အယံၤန့ၣ်ဘၣ်. ယွၤမ့ၢ် ပၢ်ကစၢ်လၢအအဲၣ်တၢ်တဂၤ, လၢအမၤသကိးတၢ်ဒီးအဖိန့ၣ်လီၤ. ထါတယုၢ်အံၤ စးထီၣ်ဝဲဒၣ်လၢတၢ်တဲလီၤကျဲၤလီၤ တၢ်ဒဲးဘး (:၁-၅), ဒီးအတၢ်ပညိၣ်န့ၣ် တမ့ၢ်လၢယွၤအတၢ်စံၣ်ညီၣ်အဖီခိၣ်ဘၣ်, မ့မ့ၢ်လၢတၢ်မၤလိၤမၤဘၣ်က့ၤကျဲ လၢတၢ်အဲၣ်အပူၤ, ဒ်ကစၢ်ယွၤသိၣ်လိနဲၣ်လိ ကျဲအဂ့ၤအဘၣ် လၢအဖိအဂီၢ် (:၆-၇) အသိးန့ၣ်လီၤ.
ပှၤကွဲးထါ ပာ်ဖျါကဒီးဝဲလၢ ပာ်သုသး, ဒ်ကသ့ၣ်လၤ “…အကယၢကယဲမ့ၢ်နိာ်ထး, ဒီးနိာ်ပျံၤလၢ တြီတၢ်အဂီၢ်, လၢအတဟဲဘူးဘၣ်ဒီးနၤအဃိ” (:၉) န့ၣ်လီၤ. က့ၢ်ဂီၤဟ့ၣ်ဒိတမံၤအံၤ ပာ်ဖျါထီၣ် ပတၢ်ဂ့ၢ်လိာ်ထီဒါ, ဒီးပတသ့ၣ်ညါနၢ်ပၢၢ်ယွၤအကျဲဖျိဖျိဖျါဖျါဘၣ်န့ၣ်လီၤ. ဒ်ပမ့ၢ်ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, ဒ်သိးပကဘၣ်လိာ်ဖိးမံဒီးယွၤအတၢ်ဒုးနဲၣ်ပှၤကပုာ်လုးအဂီၢ်, ပကဘၣ်မၤအါထီၣ်မၤယိာ်ထီၣ် ပတၢ်ရ့လိာ်သးဘူးဘူးတံၢ်တံၢ်ဒီးကစၢ်ယွၤန့ၣ်လီၤ. ခီဖျိတၢ်ဖးကစၢ်ယွၤအကလုာ်ကထါန့ၣ် မ့ၢ်ကျိၤကျဲတထံၣ်လၢ ပကမၤယိာ်ထီၣ်ပတၢ်ရ့လိာ်သးဘူးဘူးတံၢ်တံၢ်ဒီးယွၤန့ၣ်လီၤ. ဒ်သိးပက “လဲၤတၢ်လၢသးန့ၣ်အပူၤ” (ကလၤ ၅:၂၅) အဂီၢ်, တၢ်ဖးလံာ်စီဆှံန့ၣ် ကမၤစၢၤပှၤ, ဒီးတၢ်လၢကစၢ်ယွၤအဲၣ်ဝဲတဖၣ်န့ၣ် ပကအဲၣ်ဝဲဒၣ်န့ၣ်လီၤ. ဝံၤန့ၣ်ဒီး, “ပသးခုလၢယွၤအပူၤ, ဒီးသူၣ်ဖှံသးညီ” (စံး ၃၂:၁၁) သ့ဝဲဒၣ်န့ၣ်လီၤ.
