ပှၤဘံၣ်ယးနၣ်ဖိ ဖါ(မ) (Pham) လၢအသးစဲထၢဖှိၣ်တၢ်တဂၤန့ၣ် လူၤဃုထၢဖှိၣ် တၢ်ဘါသရိာ် အနၣ်ရံၣ်တဖၣ်လၢ အဟးဂူာ်ဟးဂီၤ လီၤမူၤလီၤမၢ် အဖျၢၣ်ခံဆံ လၢယူရပၤ ဒီဘ့ၣ်, ဒီးလၢအကျါ နၣ်ရံၣ်အါဖျၢၣ်အလီၢ်န့ၣ် ဘၣ်တၢ်ပာ်က့ၤဒီး လီသဟီၣ် (electronic) နၣ်ရံၣ်တဖၣ်န့ၣ်လီၤ. မ့မ့ၢ် နၣ်ရံၣ်တဖျၢၣ်လၢ အဘၣ်တၢ်မၤအီၤလၢ ၁၇၅၀ နံၣ်လၢ ကီၢ်အံၣ်တလံၣ်န့ၣ် လီၤလီၤဆီဆီ ပၢၤဃာ်ဒံး တၢ်ဆၢကတီၢ် လီၤတံၢ်လီၤဆဲးအဖၢမုၢ်န့ၣ်လီၤ. ဖါ(မ) သးခု ဘှီဂ့ၤက့ၤဒီး ပာ်ကီၤနၣ်ရံၣ်တဖၣ်, ဒီးစံးဝဲလၢ နၣ်ရံၣ်တဖၣ်န့ၣ် ဒုးသ့ၣ်နီၣ်ထီၣ်အီၤလၢ တၢ်ဆၢကတီၢ်န့ၣ် လုၢ်ပှ့ၤဒိၣ်ဆံးအါ ဒီးကဘၣ်မုာ်လၤကိးဆၢကိးကတီၢ်ဒဲးအဂီၢ်န့ၣ်လီၤ.

လၢလံာ်ယၤကိာ် ၄ အပူၤ, ပှၤကွဲးတၢ် ဟ့ၣ်ဂံၢ်ဟ့ၣ်ဘါပှၤဖးတၢ်ဖိတဖၣ်လၢ ကတူၢ်လိာ် ပးကဲတၢ်ဆၢကတီၢ် အတၢ်လုၢ်ဒိၣ်ပှ့ၤဒိၣ်အဂီၢ်လီၤ. အဝဲမၤသ့ၣ်နီၣ်ထီၣ်က့ၤ အဝဲသ့ၣ်လၢ အဝဲသ့ၣ် အသးသမူန့ၣ် မ့ၢ်ဒ် “တၢ်ဘှ့ၣ်လၢ အအိၣ်ဖျါ တစိၢ်ဖိ” တချုးအဟါမၢ်ကွံာ်ဝဲ (ယၤ ၄:၁၄) န့ၣ်လီၤ. စီၤယၤကိာ် ဟ့ၣ်ပလီၢ် အဝဲသ့ၣ်လၢ အသုတတိာ်ကျဲၤလၢ က “လဲၤဆူဝ့ၢ်ပူၤအံၤ, ဒီးအိၣ်ဖဲန့ၣ် တနံၣ်, ဒီးကၤတၢ်, ဒီးမၤအါထီၣ် ပတၢ်” (:၁၃), လၢအတအိၣ်ဒီး တၢ်ဃုယွၤအတၢ်ကူၣ်လိာ်ဘၣ်န့ၣ်တဂ့ၤ, မ့မ့ၢ်အဝဲသ့ၣ် အတၢ်ပနံာ်တၢ်ကၤအတၢ်တိာ်ကျဲၤအဂီၢ်, ကဘၣ်
တူၢ်လိာ်အၢၣ်လီၤယွၤအတၢ်ဆၢကတီၢ်ဒီး အတၢ်မၤကကဲထီၣ်လိၣ်ထီၣ်တၢ်အဂီၢ် န့ၣ်လီၤ. ဖဲအဆၢဖိ ၁၄ နံၣ်, အဝဲမၤသ့ၣ်နီၣ်ထီၣ် အဝဲသ့ၣ်ဒီးစံး, “သုတၢ်အိၣ်မူ ခဲမုၢ်ဆ့ၣ် ကမ့ၢ်တၢ်ဒ်လဲၣ်န့ၣ်, သုတသ့ၣ်ညါဒၣ်လဲာ်ဘၣ်” (ခ့ခါ) န့ၣ်လီၤ. ပမ့ၢ်တဒုးပာ်ဃုာ်ယွၤလၢ တၢ်တ့တိာ်ကျဲၤ ပတၢ်ကဲထီၣ်လိၣ်ထီၣ်ဒၣ်ပဝဲအပူၤဘၣ်န့ၣ်, နီၢ်နီၢ်တခီ မ့ၢ်ဒၣ် ပပာ်ကဖၢလၢပသးဒီး ဆိကမိၣ်ဒိၣ်လီၤပသးန့ၣ်လီၤ.

ဖဲပသ့ၣ်ညါနီၣ်လၢ ပတၢ်အိၣ်မူမ့ၢ်ဒၣ် တၢ်တစိၢ်တလီၢ်လီၤန့ၣ်, ပတစှီဃံးဃာ် ပတၢ်တိာ်ကျဲၤလၢခါဆူညါအဂီၢ်တဖၣ်ဘၣ်, ဒီးပဂ့ၤဖိးဟုတူၢ်လိာ်အါထီၣ် ဆၢကတီၢ် ခဲအံၤန့ၣ်လီၤ. ပအိၣ်မူဒီး မၤတၢ်လၢယွၤအတၢ်တ့တိာ်ကျဲၤဒီးအတၢ်တိာ်အပူၤန့ၣ်လီၤ. တၢ်အံၤအခီပညီမ့ၢ်ဝဲ တၢ်ကမၤအသးမနုၤဂ့ၤမနုၤဂ့ၤ, လၢတၢ်နာ်အပူၤ ပဟ့ၣ်လီၤ ပတၢ်အိၣ်မူခါဆူညါဆူ ယွၤအအိၣ်သ့, ဒီးမုာ်လၤကိးမုၢ်နံၤ ဒ်တၢ်ဟ့ၣ်ဟဲလၢယွၤန့ၣ်လီၤ.