ပအိၣ်မူလၢ ဟီၣ်ခိၣ်တဘ့ၣ် ဖဲအ့ထၢၣ်နဲးတသးပ့ၤနီၣ်တၢ်နီတမံၤဘၣ်န့ၣ်လီၤ. တၢ်ဂီၤ, တၢ်လၢပပာ်ထီၣ်လၢအ့ထၢၣ်နဲးအလိၤ (post), ဒီးတၢ်ကွဲးထီၣ်လံာ်ဧိၤလဲၢ်ဧိၤလၢပှၢ်ယဲၤသန့ (blog entry) ကိးဘ့ၣ်ဒဲးန့ၣ် ဖျါလၢ အဘၣ်တၢ်ပာ်ဖှိၣ်ပာ်တံၤဃာ်အီၤ လီၤစိၤလီၤထီန့ၣ်လီၤ. ဘၣ်ဆၣ်, ခီၣ်ခၠူထၢၣ်တၢ်ရဲၣ်တၢ်ကျဲၤလၢအဃုတၢ် (Search Engine) အမိၢ်ပှၢ်တခါန့ၣ် ဒုးအိၣ်ထီၣ် တၢ်အိၣ်သဒၢသးအလီၢ် (Privacy), ဒီးဟ့ၣ်ခွဲးဟ့ၣ်ယာ် ပှၤစူးကါတၢ်ဖိတဖၣ်လၢ ကထုးထီၣ်ကွံာ် အနီၢ်ကစၢ်အဂ့ၢ်အကျိၤတဖၣ် ဒ်အမ့ၢ် ကွဲၤဒီနၢ်အနီၢ်ဂံၢ်, လီၢ်အိၣ်လီၢ်ဆိး, ဒီးအဂုၤအဂၤတဖၣ်န့ၣ်လီၤ. တၢ်သ့ၣ်တဖၣ်အံၤ တတြူာ်စီကွံာ် တၢ်ဂ့ၢ်ထၢဖှိၣ်တဖၣ် (data) လၢအ့ထၢၣ်နဲး ခဲလၢာ်ခဲဆ့ဘၣ်ဆၣ်, တၢ်လၢပှၤထံၣ်သ့တဖၣ်န့ၣ် မၤစှၤလီၤဝဲ ဒိၣ်ဒိၣ်မုၢ်မုၢ်, ဒီးဒုးကလၢၢ်ဘၣ်ပှၤတဖၣ်ဒ်အဝဲသ့ၣ်အိၣ်ဒီးတၢ်ပၢၤဃာ် အနီၢ်ဂံၢ်ပနီၣ် (digital) အခီၣ်လီၢ်တဖၣ်အသိးန့ၣ်လီၤ.
တၢ်တြူာ်စီကွံာ် တၢ်လၢအပူၤကွံာ်တဖၣ်, ခီဖျိလၢကျိၤကျဲဒ်သိးအံၤန့ၣ် ဒုးသ့ၣ်နီၣ်ပှၤ ဝံအတၢ်ကတိၤ ဖဲလံာ်ယရှါယၤ ၄၃:၁၈-၁၉ န့ၣ်လီၤ. ယွၤစံးဝဲဒၣ် “တၢ်လၢအခီၣ်ထံးတဖၣ်, သ့ၣ်နီၣ်ထီၣ်က့ၤအီၤတဂ့ၤ, ဒီးတၢ်လၢပျၢၤလၢသီတဖၣ်, ဆိကမိၣ်လၢအဂ့ၢ်တဂ့ၤ. ကွၢ်ကွၢ်, ယမၤတၢ်အသီတမံၤ” န့ၣ်လီၤ. ဖဲပှၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်လၢ ဘၤဘူၤလိၣ်, ဒီးဖဲပှၤဂီၢ်မုၢ်တဖၣ် အသူၣ်အသးဟးဂီၤဒိၣ်ဒိၣ်ကလဲာ်, ဒီးဆၢမိၣ်န့ၢ်ဝဲလၢတၢ်သူၣ်ထီၣ်ဘှီထီၣ်က့ၤတၢ်အကတီၢ်, လံာ်စီဆှံအဆၢဖိတဖၣ်အံၤ ဘၣ်တၢ်စံးကတိၤလီၤဝဲဒၣ်န့ၣ်လီၤ. ယွၤမၤလိာ် အပှၤဂီၢ်မုၢ်တဖၣ် ဒ်သိးအသုတသးစဲထီဃာ်အသးဒီး တၢ်လၢအပူၤကွံာ် ပှၤဂီၢ်မုၢ်အတၢ်လီၤတူာ်လီၤကာ်တဖၣ် (မ့) တၢ်စိာ်မၢကဲကုၢ်လၢအမၤဘၣ်ဒိဆါ အပှၤဂီၢ်မုၢ်န့ၣ်တဂ့ၤ. မ့မ့ၢ်ကကွၢ်စိဃီၤဝဲဆူညါ, တၢ်မၤအသီလၢယွၤကမၤဝဲဒၣ်န့ၣ်လီၤ. ယွၤကဒုးအိၣ်ထီၣ် တၢ်ဟးထီၣ်ပူၤဖျဲးအသီလၢ အကါဒိၣ်န့ၢ်အန့ၣ်, ယွၤ ကမၤပူၤဖျဲးအပှၤဂီၢ်မုၢ်လၢ ဘၤဘူၤလိၣ်တၢ်စိာ်မၢကဲကုၢ်အလီၢ်, ဒီးကဘၣ်က့ၤဝဲဆူ အထံအကီၢ် န့ၣ်လီၤ. တမ့ၢ်ထဲကစၢ်ယွၤ တြူၢ်စီကွံာ် တၢ်လၢအပူၤကွံာ်တဖၣ်န့ၣ်ဘၣ်, တၢ်အိၣ်မူ ခါဆူညါလၢအပှဲၤဒီးတၢ်မုၢ်လၢ်, ဒီးတၢ်တိာ်အဂီၢ်, ယွၤ “ကပာ်ကျဲ” (:၁၉) န့ၣ်လီၤ.
ပကအိၣ်မူအိၣ်ဂဲၤလၢ ပတၢ်လီၤတူၢ်လီၤကာ်, (မ့) တၢ်ပီၢ်ယၢ်လီၤက့ၤသး အလီၢ်န့ၣ်, မ်ပကနာ်သန့ၤ ယွၤ “တြူာ်စီ” တ့ၢ်လံ ပတၢ်ဒဲးဘး, ပတၢ်ပီၢ်ယၢ်လီၤသး, ဒီးပတၢ်မဲာ်ဆှးလၢအပူၤကွံာ်တဖၣ်, ခီဖျိလၢ ကစၢ်ယ့ၣ်ရှူး အတၢ်လုၢ်ထီၣ်ဟ့ၣ်လီၤအသး (ဧ့ၤ ၁၀:၁၀) ဝံၤန့ၣ်ဒီး, ယွၤ “တသ့ၣ်နီၣ်ထီၣ်က့ၤဘၣ် (ပ)တၢ်ဒဲးဘး” (ယရှါ ၄၃:၂၅) လၢၤဘၣ်န့ၣ်လီၤ. ယွၤ နဲၣ်ဆှၢပှၤဆူ ခါဆူညါလၢ အကတဲာ်ကတီၤန့ၢ်ပှၤန့ၣ်လီၤ.
