ဖဲလါဒံၢ်စ့ဘၢၣ် (၉) သီ, ၁၉၈၇ နံၣ်, လၢ ကီၤနဲးတံးကး (Connecticus) န့ၣ်, လံၣ်ပအီဖိတဘ့ၣ် အ့ၣ်ဂံၢ်ဘျဲးဖျိ လီဂံၢ်ပျံၤတဘိဒီး, Nasdaq (National Association of Securities Dealers Automated Quotations) အကျိၣ်စ့ဂ့ၢ်ဝီ ကဟၣ်ဖးဒိၣ်န့ၣ် ကပီၤ ပံာ်လ့ပံာ်လ့, သီၣ်သဖှိ, ဒီးတၢ်ခံးသူဝဲဒီတဝ့ၢ်န့ၣ်လီၤ. ခီၣ်ပရ့ရှၣ် အဒိၣ်ကတၢၢ်လၢဟီၣ်ခိၣ်ချၢတနီၤန့ၣ် ဂံၢ်သဟီၣ်စှၤလီၤဝဲန့ၣ်လီၤ. လၢတၢ်သူၣ်ကိၢ်သးဂီၤအပူၤ, ဟီၣ်ခိၣ်ဒီဘ့ၣ် မုၢ်ကျိၤဝဲကွာ်တဖၣ် ခိးကွၢ်ဝဲတၢ်မၤအသးန့ၣ် တၢ်ဆၢကတီၢ် ကယံာ်ဝဲဒၣ် တနၣ်ရံၣ်တခီန့ၣ်လီၤ. ကယဲၢ်တၢ်မၤအသးခဲလၢာ်န့ၣ် ကဲထီၣ်အသး ခီဖျိဆၣ်ဖိကီၢ်ဖိလၢ အဆူၣ်ကပုာ်လုး, အိၣ်ဒီးအမဲလၢအအ့ၣ်, ဒီးမၤတၢ်စွံကတုၤ ဆံးဆံးဖိတဒုအဃိန့ၣ်လီၤ.

ယွၤအကလုၢ်ကထါ ပာ်ဖျါဝဲ ပူအါယုၢ်ဘၣ်ဃးဒီးတၢ်အဆံးတမံၤမံၤ (မ့) ပှၤအဆံးတဂၤဂၤ ဒုးအိၣ်ထီၣ်တၢ်ဘၣ်ဒိဘၣ်ထံးလၢ အသဟီၣ်ဆူၣ်တမံၤန့ၣ်လီၤ. မ့မ့ၢ်တၢ်အိၣ်ဆံးအိၣ်စှၤတမံၤမံၤန့ၣ် ကစၢ်ယွၤ ဆီတလဲဒုးကဲထီၣ်ဝဲဆူ တၢ်ဂံၢ်ဆူၣ်ဘါဆူၣ် ဒိၣ်ဒိၣ်သွါသွါတမံၤ သ့ဝဲဒၣ်န့ၣ်လီၤ. ဖဲဖိသၣ်ဖိတဂၤ ဟ့ၣ်လီၤဝဲ အတၢ်အီၣ်တၢ်အီ လၢမုၢ်ဆါခီအဂီၢ်, “ကိၣ်ယဲၢ်ဖျၢၣ်, ဒီးအညၣ်ခံဘ့ၣ်” န့ၣ်ဒီး, ကစၢ်ယ့ၣ်ရှူး လုၢ်အီၣ်လုၢ်အီ ပှၤဂီၢ်မုၢ်လၢအသၣ်ဝံၤသၣ်စ့ၤတဖၣ်ဒ်လဲၣ် (ပိာ်ခွါအဂၤ ယဲၢ်ကထိ, ပိာ်မုၣ်ဒီးဖိသၣ် မ့ၢ်ပၣ်ဃုာ်န့ၣ်ဒီး, ခဲလၢာ်ပှၤတကလးယဲၢ်ကထိ) (ယိၤ ၆:၉) အဂ့ၢ်န့ၣ် စီၤယိၤဟၣ် ပာ်ဖျါဝဲဒၣ်န့ၣ်လီၤ. လၢလံာ်စီဆှံအလီၢ်လံၤ တကတြူၢ်အပူၤ ပကသ့ၣ်နီၣ်က့ၤ စီၤဒၤဝံး, လၢအမ့ၢ် ပှၤကွၢ်သိ ပိာ်ခွါသးစၢ်ဖိတဂၤ နာ်သန့ၤအသးလၢ ကစၢ်ယွၤ, ဒီးမၤသံပှၤအနီၢ်ကစၢ်ဖးဒိၣ်တဂၤ ( ၁ရှမူၤ ၁၇) အဂ့ၢ် န့ၣ်လီၤ. ဒီးကစၢ်ခရံာ် စံးဝဲဒၣ်တလီၢ်လီၢ်, “တၢ်လၢမူခိၣ်အဘီအမုၢ်အံၤ မၤသးဒ်သဘၣ်အချံ…, ပြံန့ၢ်တၢ်ဂၤအချံခဲလၢာ်” (မး ၁၃:၃၂) န့ၣ်လီၤ.

ဖဲပကွၢ်ထံဆိကမိၣ် ဟီၣ်ခိၣ်ဒီဘ့ၣ် တၢ်သဘံၣ်ဘုၣ်အကီအခဲအဂ့ၢ်အါမးတဖၣ်, တကးဒ်ဘၣ်န့ၣ် ပခိၣ်ပဃၢၤ, ဒီးပဟံၣ်ဖိဃီဖိ အတၢ်ဘၣ်ယိၣ်ဘၣ်ဘီ လၢအမၤကဒံကဒါပသးတဖၣ်န့ၣ်ဒီး, တၢ်လ့ပစီကလီၤဘၣ်ပှၤ, ဒ်သိးပကနာ်တ့ၢ်ဝဲ ပတၢ်ကျဲးစၢးအဆံးတဖၣ်န့ၣ် ကဖျါလၢအတအိၣ်ဒီးအစိကမီၤဘၣ်န့ၣ်လီၤ. ဘၣ်ဆၣ်, ယွၤအကလုၢ်ကထါစံးဘၣ်ပှၤလၢ ပကဘၣ်အိၣ်မူအိၣ်ဂဲၤလၢ တၢ်ဒိကနၣ်, ဒီးတၢ်နာ်သန့ၤယွၤ, ဒ်ယွၤမၤစၢၤပှၤအသိး, မၤလီၤတံၢ်ပှၤလၢ ယွၤမ့ၢ်အိၣ်ဒီးပှၤန့ၣ်, တၢ်အဆံးတဖၣ်ကဲထီၣ် တၢ်ဂံၢ်ဆူၣ်ဒိၣ်ဒိၣ်သွါသွါသ့ဝဲဒၣ် (ယိၤ ၆:၁၀-၁၂) န့ၣ်လီၤ.