ဖဲပိာ်မုၣ်တဂၤ ဆ့ၣ်နီၤဝဲလၢ မဲကသံၣ်သရၣ် အလီၢ်ဆ့ၣ်နီၤအကတီၢ်, ပျံၤတၢ်ဖုးတၢ်န့ၣ်အသူၣ်တတုၤလီၤအသးတတုၤလီၤဘၣ်န့ၣ်လီၤ. အဟံၣ်ဖိဃီဖိ အတၢ်ဝံဃၢတဖၣ်န့ၣ်မၤကိာ်မၤဂီၤအီၤဒိၣ်မး, ဒီးအတၢ်အိၣ်အသးန့ၣ် ပှၤပာ်သူၣ်ပာ်သးဝဲဒၣ်န့ၣ်လီၤ. အမဲကသံၣ်သရၣ်န့ၣ် အသးကလၢၢ်ဘၣ် ပိာ်မုၣ်အံၤအတၢ်သူၣ်ကိၢ်သးဂီၤအဃိ, သံကွၢ်ဝဲ အတၢ်ဂ့ၢ်တၢ်ကျိၤန့ၣ်လီၤ. ဖဲအနၢ်ဟူဘၣ်ဝဲ တၢ်ဂ့ၢ်တၢ်ကျိၤတဖၣ်ဝံၤန့ၣ်ဒီး, ကသံၣ်သရၣ်သံကွၢ်အီၤလၢ “ယဃ့ဘါထုကဖၣ်န့ၢ်တၢ်လၢနဂီၢ် မ့ၢ်ကသ့ဧါ”န့ၣ်လီၤ. ဖဲပှၤမၤကဆှဲကဆှီ မဲ (dental hygienist) ဟဲနုာ်လီၤဆူဒၢးပူၤန့ၣ်ဒီး, အဝဲစ့ၢ်ကီး ဃ့ထုကဖၣ်လၢ ပိာ်မုၣ်အံၤအဂီၢ်န့ၣ်လီၤ. ပှၤခံဂၤ အတၢ်ထုကဖၣ်ခံထံၣ်, ဒီးပိာ်မုၣ်အတၢ်ဟဲဒုးနဲၣ် အမဲ
ကသံၣ်သရၣ်န့ၣ် ဝံၤဝဲဒၣ်ဂ့ၤဂ့ၤဘၣ်ဘၣ်, ဒီးပိာ်မုၣ်တဂၤအံၤ လၢတၢ်သ့ၣ်ညါ ပှၤကဟုကယာ်အီၤနီၢ်နီၢ်အပူၤန့ၣ် က့ၤဟးထီၣ်ဝဲဒၣ်န့ၣ်လီၤ.

ပဃ့ထုကဖၣ်န့ၢ်တၢ်လၢ ပှၤဂၤအဂီၢ်န့ၣ် မ့ၢ်ကျဲအဂ့ၤကတၢၢ်တဖၣ်အကျါတဘိ, လၢပဂီၢ် ဒ်သိးပကဒုးနဲၣ် ပတၢ်ကဟုကယာ်ပှၤဂၤန့ၣ်လီၤ. အဂ့ၢ်ဒ်အံၤ, တၢ်ထုကဖၣ် မ့ၢ်တၢ်ကိးထီၣ် ပၢ်အိၣ်လၢမူခိၣ်, လၢအမ့ၢ်တၢ်ဂံၢ်ထံးအဒိၣ်ကတၢၢ်လၢပသ့ၣ်ညါ, ဒ်သိးကနုာ်လီၤမၤတၢ်လၢ ပှၤဂၤတဖၣ် အတၢ်အိၣ်မူအပူၤအဂီၢ်န့ၣ်လီၤ. လၢလံာ် ၁ ရှမူၤအ့လး ၁၂ အပူၤန့ၣ်, ဝံရှမူၤအ့လး ဘၣ်ကွၢ်ဆၢၣ်မဲာ်ဒီးပှၤဂီၢ်မုၢ်တဖုလၢ အသူၣ်ကိၢ်သးဂီၤ (:၁၉) တဖၣ်န့ၣ်လီၤ. ပှၤအံၣ်စရ့လးဖိတဖၣ် မၤကမၣ်တၢ် ခီဖျိလၢအဃ့တ့ၢ်ဝဲ စီၤပၤတဂၤအဃိ, ဒီးလၢအဝဲသ့ၣ်အနီၢ်ကစၢ်ဒၣ်ဝဲအဂီၢ်, တၢ်ကမၤအသးဒ်လဲၣ်န့ၣ် ပျံၤဝဲဒၣ်န့ၣ်လီၤ. ဝံစံးဘၣ်အဝဲသ့ၣ်လၢ, “ပျံၤတဂ့ၤ” (:၂၀), ဒီးမၤဂၢၢ်မၤကျၢၤ ပှၤဂီၢ်မုၢ်လၢ ကစၢ်ယွၤ အတၢ်ဂ့ၤတၢ်ဝါ, ဒ်ပထံၣ်ဘၣ်လၢ အတၢ်ကတိၤတဖၣ်အံၤအပူၤအသိး, “မ့မ့ၢ် ယဲဒၣ်အံၤ လၢယဘါထုကဖၣ်န့ၢ် သုဂီၢ်န့ၣ် မ်ယသုတဆိတ့ၢ်ဒီး မၤကမၣ်ဘၣ်ယွၤတဂ့ၤ” (:၂၃) န့ၣ်လီၤ.

ပဝဲနၤယၤစ့ၢ်ကီး, ပအိၣ်ဒီးခွဲးယာ်လီၤဆီ, ဒီးကစၢ်ယွၤ အဲၣ်ဒိးဝဲလၢ ပကဃ့ ဘါထုကဖၣ်န့ၢ်တၢ်လၢ ပှၤဂၤအဂီၢ်န့ၣ်လီၤ. ပှၤလၢအလိၣ်ဘၣ် တၢ်မၤစၢၤတဖၣ်အဂီၢ်, ဖဲပဃ့သကွံာ်ကညး ကစၢ်ယွၤအတၢ်မၤစၢၤ, ဘၣ်တဘျီဘျီန့ၣ် လၢတၢ်အိၣ်ဘှ့ၣ်အိၣ်ဘှီၣ်အပူၤ, ဒီးလၢတၢ်ဆၢကတီၢ်အဂၤန့ၣ် ပကကိးပသူဃ့ထုကဖၣ်တၢ်န့ၣ်ဒီး, ကမ့ၢ်ဒၣ်ပမၤလၤကပီၤယွၤန့ၣ်လီၤ.