ဖဲ နယူ အီၣ်လံ (New Orleans) တၢ်ပာ်ကွၢ်ကီအလီၢ် တၢ်သူၣ်ထီၣ်အပူၤန့ၣ်, ဒွဲလၤစုသ့အတၢ်မၤတဖၣ် ဘၣ်တၢ်တ့အီၤ ခီဖျိတၢ်ဒီၣ်တဲာ် ပလးစတ့း (plastic) ပလီလီၢ်လံၤတဖၣ်, ဒီးဒုးကဲထီၣ် ပိးလီလၢအလီၤဂာ်ဒီးထိၣ်ဆူၣ်တဖၣ်, ဒီးတၢ်ဒီတဒၢမၤစၢ်လီၤ မ့ၣ်အူအတၢ်ကပီၤတဖၣ်န့ၣ်, အိၣ်ဒီးအလွဲၢ်အကလုာ်ကလုာ်န့ၣ်လီၤ. ပှၤနဲၣ်ဆှၢပှၤဟးဆှၣ်ကီၢ် (tour guide) တဂၤ ဟ့ၣ်ခီနီၤဝဲ တၢ်ထံၣ်ဆိကမိၣ် ဘၣ်ဃးဒီး တၢ်စူးကါ ပိးလီဒ်သိးအံၤတဖၣ်အဂ့ၢ်န့ၣ်လီၤ. “ဝ့ၢ်တဖျၢၣ်လၢ အအိၣ်ဒီးတၢ်ဂ့ၢ်ကီဒ်သိးအံၤတဖၣ်အဂီၢ်, တၢ်လၢ အအိၣ်ဒီးပှၤန့ၣ် ဒ်သိးပကစူးကါအီၤ, ဒီးဒုးကဲထီၣ် တၢ်သူၣ်ဖှံသးညီ, ဒီးတၢ်ဃံတၢ်လၤအဂီၢ်န့ၣ် ပမၤလိန့ၢ်ဝဲဒၣ်စ့ၢ်ကီးန့ၣ်လီၤ. ပတပညိၣ်ဒၣ်ထဲလၢ တၢ်ဆၢကတီၢ်ကီခဲတဖၣ်အပူၤန့ၣ်ဘၣ်, ပသ့ၣ်နီၣ်မၤလၤကပီၤစ့ၢ်ကီး, တၢ်သ့တူၢ်ခီၣ်န့ၢ်တၢ်” အဂီၢ်န့ၣ်လီၤ.

စီၤနဃ့မယၤဒီးပှၤအံၣ်စရ့လးဖိတဖၣ် ဘၣ်ကွၢ်ဆၢၣ်မဲာ်ဝဲစ့ၢ်ကီး, တၢ်အိၣ်အသးအကီအခဲတဖၣ်ဘၣ်ဆၣ်, လၢတၢ်သ့တူၢ်ခီၣ်န့ၢ်တၢ်အပူၤ မၤဆူၣ်ထီၣ်အသးလၢ တၢ်သူၣ်ခုသးခုဟဲခီဖျိလၢယွၤန့ၣ်လီၤ. ဒုၣ်ဒါတဖၣ် ဖီၣ်န့ၢ်, ဒီးစိာ်ဆှၢပှၤဂီၢ်မုၢ်ဆူတၢ်လီၢ်အိၣ်ယံၤဒီး အဟံၣ်အဃီန့ၣ်လီၤ. အကတၢၢ်န့ၣ် ပှၤဂီၢ်မုၢ်တဖၣ် ဟဲက့ၤဆူ ဝ့ၢ်ယရူၤရှလ့ၣ် လၢတၢ်စိာ်မၢကဲကုၢ်အလီၢ် (နဃ့ ၄:၇-၁၂) န့ၣ်လီၤ. ဘၣ်ဆၣ်, ဖဲပှၤဂီၢ်မုၢ် ဟဲက့ၤတုၤဝဲန့ၣ်ဒီး, အဝဲသ့ၣ်ဘၣ်ကွၢ်ဆၢၣ်မဲာ် တၢ်တြီဆၢထီဒါ လၢတၢ်တ့ဘှီထီၣ် ဝ့ၢ်ခိၣ်ဒူလၢ ဒီတဒၢ ဝ့ၢ်ယရူၤရှလ့ၣ် (နဃ့ ၆) န့ၣ်လီၤ. တၢ်တ့ဘှီထီၣ် ဝ့ၢ်ခိၣ်ဒူ ဝံၤဝဲ, ဒီးပှၤဂီၢ်မုၢ်တဖၣ်ပာ်ဖှိၣ်ထီၣ်အသး, ဒ်သိး ကမၤလၤကပီၤယွၤ, ဒီးဒိကနၣ်ယွၤအတၢ်သိၣ်တၢ်သီအကတီၢ်ဒၣ်လဲာ်, တၢ်သူၣ်ဖှံသးညီတအိၣ်လၢ ပှၤဂီၢ်မုၢ်အကျါဘၣ်. “တုၤပှၤဂီၢ်မုၢ် နၢ်ဟူတၢ်သိၣ်တၢ်သီအတၢ်ကတိၤန့ၣ်ဒီး, အမဲာ်ထံလီၤခဲလၢာ်” (၃:၉) န့ၣ်လီၤ. ဘၣ်ဆၣ်, နဃ့မယၤ မၤသ့ၣ်နီၣ်က့ၤ ပှၤဂီၢ်မုၢ်, ခီဖျိလၢတၢ်သ့ၣ်နီၣ်ထီၣ်က့ၤ ယွၤ မ့ၢ်မတၤတဂၤလဲၣ်, ဒီးတၢ်လၢယွၤ ဒုးလဲၤခီဖျိ ပှၤဂီၢ်မုၢ်တဖၣ်အဂ့ၢ်, ဒီးဃုထံၣ်န့ၢ်တၢ်သးခု, ဒီးတၢ်ဂံၢ်တၢ်ဘါလၢကစၢ်ယွၤအပူၤသ့ဝဲဒၣ်န့ၣ်လီၤ. စီၤနဃ့မယၤ တဲဘၣ် အဝဲသ့ၣ်လၢ, “ယွၤအတၢ်သူၣ်ခုသးခုန့ၣ် မ့ၢ်သုဂံၢ်သုဘါ” (:၁၀) န့ၣ်လီၤ.

လီၤဆီဒၣ်တၢ် ဖဲတၢ်အိၣ်အသးမၤအသးတဖၣ် ဖျါတဂ့ၤတဝါလၢပဂီၢ်ဒၣ်လဲာ်, ပမ့ၢ်ပာ်ဖှိၣ်ပညိၣ်ပသးလၢ ကစၢ်ယွၤ ဟ့ၣ်ပှၤ “တၢ်သူၣ်ခုသးခုဖးဒိၣ်,” ဃုာ်ဒီးတၢ်ဂံၢ်တၢ်ဘါသ့ဝဲဒၣ်န့ၣ်လီၤ. ကစၢ်ယွၤ အတၢ်သ့တၢ်ဘၣ်, သူးသ့ၣ်ကံၢ်စီ, ဒီးယွၤအကလုၢ်အကထါတဖၣ် ကမၤသီထီၣ်က့ၤပသူၣ်ပသး, ဒီးကဟဲစိာ်န့ၢ်ပှၤ တၢ်သူၣ်ခုသးခု (:၁၂), မၤလၢပှဲၤန့ၢ်ပှၤတၢ်ဂံၢ်တၢ်ဘါ, ဒီးတၢ်သ့တူၢ်ခီၣ်န့ၢ်တၢ် လၢပလိၣ်ဘၣ်တဖၣ်န့ၣ်လီၤ.