ယဖိမုၢ်အဆံးကတၢၢ်တဂၤ စံးဘၣ်ယၤလၢ “ပါဧၢ, နဟဲစိာ်န့ၢ်ယၤထံအီ ကသ့ဧါ” န့ၣ်လီၤ. ယစံးဘၣ်အီၤ, “သ့ဝဲသၢၣ်” ဝံၤ, ယဟဲစိာ်န့ၢ်အီၤထံလီခီအပှဲၤန့ၣ်လီၤ. အဝဲဟံးန့ၢ်အီဝံၤ, လၢအထးခိၣ်န့ၣ် တအဲးထီၣ်ဝဲတၢ်နီတမံၤဘၣ်. ဝံန့ၣ်ဒီး, ယဖိမုၣ်အဒိၣ်ကတၢၢ်တဂၤ ဃ့အီယၤထံ, ဒ်အဒ့မုၣ်အသိးန့ၣ်လီၤ. ယလဲၤစိာ်ဆှၢထံအီ လၢအဂီၢ်န့ၣ်ဝံၤ, အဝဲစ့ၢ်ကီး တတဲဆၢယၤတၢ်နီတမံၤဘၣ်န့ၣ်လီၤ. လၢတၢ်သးတံာ်တာ်အပူၤန့ၣ်, ယထးခိၣ်အဲးထီၣ်အသးလၢ, “မတၤတဂၤမး တစံးကတိၤပာ်ဖျါ “တၢ်ဘျုး” န့ၣ်လဲၣ်. ပှၤကစံးကတိၤ “တၢ်ဘျုး” အဂီၢ်, ဘၣ်မနုၤအဃိကီခဲဝဲဒၣ်လဲၣ်” န့ၣ်လီၤ.
ဘၣ်တဘျီဘျီ, တၢ်ကအိးထီၣ်တြဲၤလၢယွၤကမၤတၢ်အဂီၢ်, တၢ်အကတီၢ်ဂ့ၤန့ၢ်ဒံး မိၢ်ပၢ်သ့ၣ်တဖၣ် အသးဘၣ်တံာ်တာ်အကတီၢ်န့ၣ် တၢ်တအိၣ်ဝဲဒၣ်နီတမံၤဘၣ်န့ၣ်လီၤ. တကီၢ်ခါန့ၣ် ယသးကလၢၢ်ဘၣ် သးစီဆှံ ထိၣ်ဂဲၤယၤ ကပုာ်လုာ်ဖိ, ဒီးစံးဘၣ်ယၤလၢ, မ့ၢ်ဝဲလီၤ. အဒါ(မ်) (Adam) ဧၢ, ပကစံး “တၢ်ဘျုး” အဂီၢ်န့ၣ် ဘၣ်မနုၤအဃိ, ကီခဲဝဲဒိၣ်မးန့ၣ်လဲၣ်. တၢ်တအိၣ်ဒီး သးလၢအသ့စံးဘျုးစံးဖှိၣ်တၢ်န့ၣ် တမ့ၢ်တၢ်ဂ့ၢ်ကီ ထဲလၢယဖိတဖၣ်အဂီၢ်န့ၣ်ဘၣ်. မ့ၢ်ဝဲယတၢ်ဂ့ၢ်ကီစ့ၢ်ကီးန့ၣ်လီၤ.
လၢပဂီၢ်, ပကစံးကတိၤပာ်ဖျါ “တၢ်ဘျုး” န့ၣ် ဘၣ်မနုၤအဃိ, ကီဝဲခဲဝဲဒၣ်လဲၣ်န့ၣ် ယတသ့ၣ်ညါယဲဘၣ်ဆၣ်, ကမ့ၢ်ဝဲဒၣ် ပှၤဟီၣ်ခိၣ်ဖိတဖၣ် အတၢ်အိၣ်သးနီၢ်နီၢ် အပတီၢ်တပတီၢ်န့ၣ်လီၤ. လၢထါစံးထီၣ်ပတြၢၤတဖၣ်အပူၤန့ၣ် ပကထံၣ်ဘၣ် တၢ်အိၣ်မူဟ့ၣ်ဒိလၢ အမၤဒိၣ်ထီၣ်မၤအါထီၣ် သးလၢအသ့စံးဘျုးစံးဖှိၣ်က့ၤတၢ်တမံၤန့ၣ်လီၤ. လၢတၢ်ကီတၢ်ခဲအကတီၢ်, စီၤဒၤဝံးဒီးပှၤအဂုၤအဂၤတဖၣ် အါစုအါဘျီန့ၣ် စံးဘျုးစံးဖှိၣ်စံးထီၣ်ပတြၢၤ ကစၢ်ယွၤအဂ့ၢ်န့ၣ် ထါစံးထီၣ်ပတြၢၤတဖၣ် ပာ်ဖျါဝဲဒၣ်န့ၣ်လီၤ. ဖဲအဝဲသ့ၣ် အတၢ်စံးထီၣ်ပတြၢၤယွၤတဖၣ်အမဲာ်ညါန့ၣ် အိၣ်ဒီးတၢ်ကတိၤလီၤဆီလၢအမ့ၢ် “ယက….” န့ၣ်လီၤ.
စံး ၉:၁ အပူၤန့ၣ် ပကထံၣ်ဘၣ် စီၤဒၤဝံး ဃုထၢဝဲ အတၢ်စံးဘျုးစံးထီၣ်ပတြၢၤကစၢ်ယွၤ ထံထံဆးဆး, “ယကစံးထီၣ်ပတြၢၤယွၤလၢ ယသးဒီဖျၢၣ်ညါ, ယကဒုးနဲၣ် နတၢ်မၤလီၤလးခဲလၢာ်” န့ၣ်လီၤ. သးလၢအသ့စံးဘျုးစံးဖှိၣ်တၢ် အခီၣ်ထံးခီၣ်ဘိန့ၣ် ပထံၣ်ဆိကမိၣ်အီၤ ဒ်အမ့ၢ်သးအတၢ်သ့ၣ်ညါတမံၤန့ၣ်လီၤ. ဘၣ်ဆၣ်, စီၤဒၤဝံး ဒုးသ့ၣ်နီၣ်ထီၣ်က့ၤပှၤလၢ သးလၢအသ့စံးဘျုးစံးဖှိၣ်တၢ်န့ၣ် မ့ၢ်တၢ်ဃုထၢတမံၤစ့ၢ်ကီးန့ၣ်လီၤ.
ဒ်စီၤဒၤဝံးအသိး, ဖဲပဃုထၢလုၢ်လၢ်လၢ အကမၤဒိၣ်မၤအါထီၣ် သးလၢအသ့စံးဘျုးစံးဖှိၣ်တၢ်န့ၣ်ဒီး, ပကဒိၣ်ထီၣ်ကယီကယီ လၢတၢ်သ့ၣ်ညါပာ်ပနီၣ်, ဒီးအၢၣ်လီၤတူၢ်လိာ် ကစၢ်ယွၤအတၢ်ဂ့ၤတၢ်ဝါ လၢပတၢ်အိၣ်မူ ကိးကပၤဒဲးသ့ဝဲဒၣ်န့ၣ်လီၤ.
