ပှၤနီၣ်ကဘီယူၤ ခံဂၤ မံဘၣ်အသး ဖဲအတၢ်လဲၤဆူ ကီၢ်အ့ဒိၢ်နံရှါ အကတီၢ်န့ၣ်လီၤ. ကဘီယူၤတဘ့ၣ်အံၤ အကစီၤတုၤထီၣ်ဘးဝဲဆူ ကလဲၤတၢ်အတၢ်ဒၣ်ဝဲန့ၣ်ဒီး, ပှၤနီၣ် ကဘီယူၤ အခိၣ်တဂၤ ဒိးန့ၢ်တၢ်ကအိၣ်ဘှံးမံဝဲဒၣ်အကတီၢ်တစိၤဖိ, ဒီးဖဲအဝဲ ဖုးပၢၢ်ထီၣ်ဝဲလၢ အတၢ်မံန့ၣ်ဒီး, ထံၣ်ဝဲဒၣ် ပှၤလၢအနီၣ်သဃဲၤ ကဘီယူၤဒီးအီၤတဂၤန့ၣ် မံခ့ဘၣ်အသးန့ၣ်လီၤ. ဖဲပှၤဒိးကဘီယူၤ အနီၣ်ဂံၢ် ကအိၣ်ဝဲဒၣ် ပှၤအဂၤ ၁၅၀ ဘျဲၣ်ဃုာ်ဒီး, ကဘီယူၤ အပှၤမၤတၢ်ဖိတဖၣ်, ဒီးကဘီယူၤအံၤ အကစီၤတုၤထီၣ်ဘးဝဲလၢ ပီၣ်လဲၣ်အမဲာ်ဖံးခိၣ်န့ၣ် ကအိၣ်ဝဲဒၣ် သၢကလးဃုကထိ ခီၣ်ယီၣ်အကတီၢ်, အဝဲသ့ၣ်ခံဂၤ မံဘၣ်အသးန့ၣ် ကအိၣ်ဝဲဒၣ် မံးနံး သၢဆံန့ၣ်လီၤ. ကဘီယူၤ လဲၤတၢ်အကျဲတလိၤလၢၤဘၣ်, ဘၣ်ဆၣ်, တၢ်လီၢ်လၢအကဘၣ်လဲၤဝဲန့ၣ် လဲၤတုၤဝဲဂ့ၤဂ့ၤဘၣ်ဘၣ်အဃိ, ပကဘၣ်စံးဘျုးဝဲဒၣ်န့ၣ်လီၤ. ဖဲကဘီယူၤ လဲၤတၢ်အကတီၢ်, ပှၤကညီလၢ အနီၣ်ကဘီယူၤတဖၣ် ကမံခ့မံသပ့ၤဝဲဘၣ်ဆၣ်, ကစၢ်ယွၤ တမံဝဲဒၣ်နီတစုဘၣ်န့ၣ် ပသ့ၣ်ညါလီၤတံၢ်လီၤဆဲးန့ၣ်လီၤ.

တၢ်မၤမုာ်ထီၣ်က့ၤပှၤအဂ့ၢ်အံၤ, ဘၣ်တၢ်ပာ်ဖျါန့ၢ်ပှၤလၢ ထါစံးထီၣ်ပတြၢၤအယုၢ် (၁၂၁) အပူၤန့ၣ်လီၤ. ဖဲအဆၢဖိ ဃိးဆၢန့ၣ် ဒုးသ့ၣ်နီၣ်ထီၣ်က့ၤပှၤလၢ ကစၢ်ယွၤ မ့ၢ်ပှၤလၢအသ့ၣ်ညါတၢ်ကိးမံၤဒဲး (omniscient), ကယဲၢ်ပတၢ်အိၣ်မူအိၣ်ဂဲၤခဲလၢာ်န့ၣ်, သ့ၣ်ညါဝဲဒၣ်, ကစၢ်ယွၤ အိၣ်ဆိးဝဲဒၣ်လၢ တၢ်လီၢ်ကိးပူၤဒဲး (omnipresent), ကိးမုၢ်နံၤမုၢ်နၤန့ၣ်, ကစၢ်ယွၤ အိၣ်ဒီးပှၤ, ဒီးသ့တၢ်လၢာ် ကစၢ်ယွၤ, အိၣ်ဒီးအစိအကမီၤခဲလၢာ် လၢကဒီတဒၢပှၤန့ၣ်လီၤ. ပှၤကွဲးထါ ဘိးဘၣ်သ့ၣ်ညါဝဲလၢ ပတၢ်မၤစၢၤန့ၣ် အိၣ်ဟဲလၢယွၤအအိၣ် (:၂) န့ၣ်လီၤ. ယွၤ မ့ၢ်ပှၤလၢအကွၢ်ထွဲပှၤ, ဒီး ပတၢ်အိၣ်ကဒုအလီၢ် (:၅), ဒီးကခိးတြီကွံာ် တၢ်အၢခဲလၢာ် ဖဲလၢအကအံးလီၤကွၢ်လီၤပသး (:၇) အကတီၢ်န့ၣ်လီၤ.

ကစၢ်ယွၤ တလီၤဘှံးလီၤဘှါနီတဘျီဘၣ်. “တဟ့ၣ်နခီၣ်လီၤတလံာ်ဘၣ်- ပှၤလၢအကွၢ်လီၤနၤတဂၤန့ၣ် တမံဘၣ်ဝဲဘၣ်” (:၃). ပှၤကွဲးထါ မၤကတၢၢ်ဝဲ အထါလၢ “နဟးထီၣ်တၢ်ဒီးနဟဲက့ၤတၢ်န့ၣ် တုၤအံၤဆူညါ ယွၤကအံးက့ၤကကွၢ်က့ၤဝဲလီၤထူလီၤယိာ်” (:၈) န့ၣ်လီၤ.

ဖဲပဆိကမိၣ် ကစၢ်ယွၤ သးပ့ၤနီၣ်ပှၤလံန့ၣ်ဒီး, အဝဲနီၣ်ဆှၢပှၤလီၤန့ၣ် ပနာ်န့ၢ်အီၤလီၤတံၢ်လီၤဆဲးသ့ဝဲဒၣ်န့ၣ်လီၤ. ထီဘိန့ၣ်, ကစၢ်ယွၤတမံဝဲဒၣ်ဘၣ်, ကစၢ်ယွၤခိးကွၢ်လီၤပှၤန့ၣ်လီၤ.