မ့ၢ်နသးကလၢၢ်ဘၣ်တ့ၢ်နဲ ဒ်နမ့ၢ်ပှၤလီတၢ်ဖိတဂၤအသိးန့ၣ်ဧါ. တမ့ၢ်ထဲနၤတဂၤဧိၤဘၣ်. နံၣ်လၢ ၁၉၇၀ အနံၣ်တဖၣ် ဘူးထီၣ်ကလၢာ်န့ၣ် ပှၤဃိထံဃုသ့ၣ်ညါတၢ်ခံဂၤ ပာ်ဖျါထီၣ် ပှၤတဂၤအတၢ်အိၣ်အသးမၤအသးလၢ အိၣ်ဒီးတၢ်သးဒ့ဒီတဖၣ်, လၢအတၢ်သ့တၢ်ဘၣ်တဖၣ်, အတၤလၣ်တဖၣ်, (မ့) အတၢ်သ့မၤတၢ်တဖၣ်အလိၤ, ဒီးထံၣ်လီၤက့ၤအသး ဒ်အမ့ၢ်ပှၤလီတၢ်ဖိတဂၤအသိးန့ၣ် “တၢ်ပာ်မၤအသး ဒ်ပှၤအဂၤတဂၤ အတၢ်ပနီၣ်” န့ၣ်လီၤ. ပှၤလၢ အမၤန့ၢ်မၤနၢၤတၢ်, ဒီးအခိၣ်နုာ်ပ့ၢ်ချ့သ့ၣ်တဖၣ်ဒၣ်လဲာ်, ဘၣ်ဂဲၤပျုၢ်ဝဲဒၣ်ဒီးအတၢ်တလၢတပှဲၤ, ဒီးဘၣ်ယိၣ်ဝဲဒၣ်လၢ မ့ၢ်ပှၤအိၣ်ခူသူၣ်ခိးကွၢ် အဝဲသ့ၣ်အတၢ်အိၣ်မူအိၣ်ဂဲၤ လၢယၣ်ဘျးတဒၢတၢ်အလီၢ်ခံ, ဒီးပှၤကထံၣ်အဝဲသ့ၣ်ဒ်လဲၣ်န့ၣ် အဝဲသ့ၣ်တသ့ၣ်ညါဝဲဒၣ်ဘၣ်န့ၣ်လီၤ.

ဖဲနံၣ်ကယၤ တၢတဖၣ်အပူၤ, လၢဝ့ၢ် ရိမ့ၤ အပှၤစူၢ်က့ၤနာ်က့ၤတၢ်ဖိတဖၣ်န့ၣ် ဒ်သိး ကဆီၣ်လီၤအသးအဂီၢ်, စီၤပီလူး ဟ့ၣ်ဂံၢ်ဟ့ၣ်ဘါဝဲဒၣ်လၢ, “အသုတပာ်အသးထီန့ၢ်အဂ့ၤ ပာ်ဝဲန့ၣ်တဂ့ၤ, မ့မ့ၢ် ဒ်ယွၤဟ့ၣ်နီၤတၢ်နာ်လၢ ပှၤတဂၤဒီးတဂၤန့ၣ် ပာ်သုသးဖဲအဘၣ်အဘၣ်တက့ၢ်” (ရိမ့ၤ ၁၂:၃) န့ၣ်လီၤ. မ်ပသုတပာ်ထီၣ်ထီပသးလၢ ပတၢ်သ့မၤတၢ်တဖၣ်အလိၤတဂ့ၤန့ၣ် မ့ၢ်တၢ်အကါဒိၣ်တမံၤလီၤန့ၣ် ပသ့ၣ်ညါနၢ်ပၢၢ်ဝဲဒၣ်န့ၣ်လီၤ. ဒ်သိးပကမၤ ယွၤအတၢ်မၤအဂီၢ်, ကစၢ်ယွၤ အဲၣ်ဒိးဝဲလၢ ပကစူးကါ တၢ်ဟ့ၣ်တဖၣ်ဘၣ်ဆၣ်, ပမ့ၢ်သးဒ့ဒီဝဲဒၣ်လၢ ပလုၢ်ပပှ့ၤ အကတီၢ်န့ၣ်ဒီး, ကမ့ၢ်တၢ်စူးကွံာ်ညိကွံာ် တၢ်မၤဂ့ၤမၤစၢၤပှၤဂၤအဂီၢ်န့ၣ်လီၤ. ပထံၣ်ဆိကမိၣ်လီၤက့ၤပသးလၢ ပအိၣ်ဒီး “တၢ်ပာ်သးဖဲအဘၣ်အဘၣ်” (:၃) အဂီၢ်န့ၣ် ပကဘၣ်အိၣ်ဒီး တၢ်ထိၣ်ဒွးတၢ်ထံထံဆးဆး- တၢ်လၢပဟ့ၣ်ထီၣ်သ့ဝဲဒၣ်အမ့ၢ်အတီတဖၣ်န့ၣ်လီၤ. စီၤပီလူး ဟ့ၣ်ဂံၢ်ဟ့ၣ်ဘါပှၤ, ဒ်သိးပကမၤနၢၤ တၢ်သးဒ့ဒီ, ဒီးဟံးဃာ်ဂၢၢ်ကျၢၤပတၢ်မ့ၢ်တၢ်, “ဒ်ယွၤဟ့ၣ်နီၤတၢ်နာ်လၢ ပှၤတဂၤဒီးတဂၤအသိး” (:၃) န့ၣ်လီၤ. ခီဖျိလၢကျိၤကျဲဒ်သိးအံၤတဖၣ်အပူၤန့ၣ် ကစၢ်ယွၤ အနီၢ်ခိ, လၢအမ့ၢ် ပှၤစူၢ်က့ၤနာ်က့ၤတၢ်ဖိတဖၣ် (:၄-၈) ကဘၣ်တၢ်တ့ဒုးအိၣ်ထီၣ်ဝဲဒၣ်န့ၣ်လီၤ.

ပဟ့ၣ်ထီၣ် ပတၢ်လုၢ်တၢ်ပာ်တဖၣ် အလုၢ်အပှ့ၤန့ၣ် ပမၤဆံးလီၤစှၤလီၤအီၤ, ခီဖျိလၢ “တၢ်ပာ်မၤအသး ဒ်ပှၤအဂၤတဂၤ အတၢ်ပနီၣ်” အလီၢ်န့ၣ် မ်ပကဟံးဃာ်ဂၢၢ်ကျၢၤ ကစၢ်ယွၤ အတၢ်ဟ့ၣ်တဖၣ်န့ၣ် လၢပသးကံၢ်ပူၤန့ၣ်တက့ၢ်. ခီဖျိလၢပတူၢ်လိာ် ကစၢ်အဘျုးအဖှိၣ် အိၣ်ပှဲၤဝဲဒီးတၢ်စံးဘျုးစံးဖှိၣ်အပူၤန့ၣ်ဒီး, မ့ၢ်ပပာ်ထီၣ်ထီသး (မ့) မ့ၢ်ပထံၣ်ဆံးလီၤက့ၤပသးအဂ့ၢ်န့ၣ် ပထံၣ်ဆိကမိၣ်လီၤက့ၤပသးအဂီၢ်, အလီၢ်တအိၣ်လၢၤဘၣ်န့ၣ်လီၤ. ပမ့ၢ်မၤဝဲဒၣ် ဒ်သိးအံၤန့ၣ်ဒီး, ကမ့ၢ်ပမၤမံမၤမုာ် ပပၢ်ကစၢ်ယွၤအသး, ဒီးကမ့ၢ်တၢ်တ့ဒုးအိၣ်ထီၣ် ကစၢ်ခရံာ်အနီၢ်ခိ, ပှၤစူၢ်က့ၤနာ်က့ၤတၢ်ဖိတဖၣ်န့ၣ်လီၤ.