ယနီၢ်ကစၢ် အတၢ်တိာ်ကျဲၤ (freelance project) တၢ်ဖံးတၢ်မၤန့ၣ် တၢ်ဘၣ်လိာ်ဘၣ်စးတအိၣ်ဝဲဒၣ်ဘၣ်. ပှၤလၢအဟဲမၢပှၤတဖၣ် အဲၣ်ဒိးဝဲဒၣ်န့ၣ် ဖျါလၢပမၤတန့ၢ်တသ့တညီဘၣ်အဃိ, ယသးတူၢ်ဘၣ်ယဲလၢ နီၢ်သးအတၢ်ဆီၣ်သနံး, ဒီးတၢ်သးဟးဂီၤန့ၣ်လီၤ. ယမၤဆၢက့ၤတၢ် အဆိကတၢၢ်န့ၣ် မ့ၢ်တၢ်ဆိကတီၢ် တၢ်တိာ်ကျဲၤအတၢ်မၤအံၤ, အခီပညီ ကမ့ၢ်ဝဲဒၣ် ယတဒိးန့ၢ် တၢ်မၤအဘူးအလဲလၢ ယမၤတ့ၢ်ဝဲတဖၣ်အဂီၢ်ဘၣ်. ဒီးမၤကတၢၢ် တၢ်မၤသကိး ခါဆူညါတၢ်တိာ်ကျဲၤအတၢ်ဖံးတၢ်မၤတဖၣ်ဒီးအဝဲသ့ၣ်န့ၣ်လီၤ. အကတီၢ်ဖဲန့ၣ် တၢ်ဆိကမိၣ်ဟဲနုာ်လီၤလၢယသးပူၤ, မ့ၢ်နဃ့ထုကဖၣ် ကစၢ်ယွၤ လံဧၣ်န့ၣ်လီၤ.

ယကဃ့ယွၤအတၢ်မၤစၢၤအဂီၢ်, ယလဲၤကပာ်ကွံာ်ဝဲဒၣ်လံန့ၣ် မ့ၢ်လၢယသ့ၣ်ညါလီၤက့ၤယသးအဃိ, ယတီၢ်လီၤယခီၣ်တိသၣ်န့ၣ်လီၤ. လၢတၢ်န့ၣ်အဃိ, ယဃ့ထုကဖၣ်ယဲ…, ဒီးယသးမုာ်ထီၣ်က့ၤတကီၢ်ခါန့ၣ်လီၤ. တၢ်ဆီတလဲတအိၣ်ဝဲဒၣ် နီတမံၤဘၣ်. တၢ်တိာ်ကျဲၤစ့ၢ်ကီး အိၣ်ဝဲဒီးတၢ်ဂ့ၢ်ကီသ့ၣ်တဖၣ်န့ၣ်လီၤ. ဘၣ်ဆၣ်, ယသးကလၢၢ်ဘၣ်လၢ သးအတၢ်မုာ်တၢ်ပၢၤ လုၣ်ဘၢကွံာ်ယၤန့ၣ်လီၤ. ခဲကနံၣ်အံၤ, ယသ့ၣ်ညါ ယအိၣ်ဘှံးလၢ ကစၢ်အပူသ့ဝဲဒၣ်- ကယဲၢ်တၢ်လၢယမၤသ့တဖၣ်န့ၣ်ယကမၤယဲ, ဒီးတၢ်အစဲန့ၣ် ယကပာ်ယဲလၢ ကစၢ်ယွၤအစုပူၤန့ၣ်လီၤ.

ဖဲ စီၤဒၤဝံး ဟ့ၣ်လီၤအးလီၤ အတၢ်ပျံၤတၢ်ဖုးတဖၣ်, ဒီးအတၢ်ဘၣ်ယိၣ်ဘၣ်ဘီတဖၣ်ဆူ ယွၤအစုပူၤအကတီၢ်, အသးကကလၢၢ်ဘၣ်ဝဲ ဒ်သိးအံၤသ့ၣ်သ့ၣ်န့ၣ်လီၤ. ထါစံးထီၣ်ပတြၢၤ ၆ အပူၤန့ၣ် စီၤဒၤဝံး စးထီၣ်ပာ်ဖျါဝဲ အတၢ်သူၣ်ကိၢ်သးဂီၤ ခီဖျိအဒုၣ်အဒါတဖၣ် လူၤမၤသံအီၤအဃိ (:၃,၇) န့ၣ်လီၤ. ဘၣ်ဆၣ်, လၢတၢ်မၤစၢၤအဂီၢ်, ဃ့ဝဲဒၣ် ကစၢ်ယွၤ တပယူာ်ဃီ, ဒီးစံးဝဲဒၣ်, “ယွၤနၢ်ဟူလံယဃ့ကညးတၢ်လံ, ယွၤကတူၢ်လိာ်ယတၢ်ထုကဖၣ်” (:၉), ဒီးအသးမုာ်ထီၣ်က့ၤဝဲဒၣ်န့ၣ်လီၤ.

တၢ်မ့ၢ်တၢ်တီတမံၤအံၤ, ဟဲစိာ်ဃုာ်ဝဲဒီး တၢ်မုၢ်လၢ်လၢ ကစၢ်ယွၤ ကအုၣ်က့ၤခီၣ်က့ၤတၢ်န့ၣ် လၢအဆၢကတီၢ်, ဒီးလၢအကျဲဒၣ်ဝဲအပူၤ (:၁၀) န့ၣ်လီၤ. တၢ်ထုကဖၣ်န့ၣ်တမ့ၢ်ကျိၤကျဲလီၤဆီလၢ တၢ်ကမၤမုာ်ထီၣ်က့ၤပသးအဂီၢ်ဘၣ်. မ့မ့ၢ်တၢ်ရ့လိာ်သးလိၤလိၤဒီးကစၢ်ယွၤ, လၢအထံၣ်တၢ်ကိးမံၤဒဲး, သ့တၢ်လၢာ်ကစၢ်, ကမၤစၢၤပှၤလၢ အဆၢကတီၢ်ဒၣ်ဝဲ, ဒီးအကျဲဒၣ်ဝဲအပူၤန့ၣ်လီၤ. မ့ၢ်နသူၣ်ကၢ်သးလီၤဘှါ (မ့) မ့ၢ်နသူၣ်ကိၢ်သးဟးဂီၤဧါ. ဃ့ထုကဖၣ်နဲတက့ၢ်. ကစၢ်ယွၤ ကဒိကနၣ်ဝဲဒၣ်န့ၣ်လီၤ.