ဒဲၣ်အိၣ်ကနံတး (Diognetus) မ့ၢ် ၦၤသူခိၣ်ဖိလၢ နံၣ်ကယၤခံအစိၤတဂၤ ပာ်သူၣ်ပာ်သးဝဲလၢ ၦၤပိာ်ကစၢ်ခရံာ်အခံတဖၣ် “ယံာ်ထီၣ်အါထီၣ်ဝဲဒၣ်တနံၤဘၣ်တနံၤ” အဂ့ၢ်န့ၣ်လီၤ. တၢ်မၤအသးအံၤ ပှၤစူၢ်က့ၤနာ်က့ၤတၢ်ဖိတဖၣ် တူၢ်ခီၣ်ဘၣ်ဝဲလၢ ၦၤရိမ့ၤဖိတဖၣ် အတၢ်မၤအၢမၤနး အဖီလာ် တပယူာ်ဃီဒၣ်လဲာ်န့ၣ်လီၤ. ဒဲၣ်အိၣ်ကနံတး သံကွၢ်ဝဲဒၣ် ၦၤစူၢ်က့ၤနာ်က့ၤ ကစၢ်ယ့ၣ်ရှူးတဂၤ ဘၣ်မနုၤအဃိ တၢ်ဂ့ၢ်အံၤမ့ၢ်ဝဲတီဝဲလဲၣ် န့ၣ်လီၤ. လံာ်တၢ်ကွဲးနီၣ်ကွဲးဃါ, ပသ့ၣ်ညါအီၤလၢ လံာ်ပရၢဆူ ဒဲၣ်အိၣ်ကနံတး အပူၤန့ၣ်, တၢ်အိၣ်ဖှိၣ်အဆိကတၢၢ်အပၢ်တဂၤ ကွဲးတဲဘၣ်အီၤလၢ, “အဝဲသ့ၣ်ဘၣ်တၢ်မၤအၢမၤနးဒံးအါထီၣ်, ၦၤလၢအိၣ်တ့ၢ်အနီၢ်ဂံၢ်တဖၣ်ဒံးအါထီၣ်ဝဲန့ၣ် နတထံၣ်ဘၣ်ဧါ. တၢ်မၤအံၤတလီးဂာ်ဒီးၦၤကညီအတၢ်မၤဘၣ်. တၢ်အံၤကမ့ၢ် ကစၢ်ယွၤအစိအကမီၤန့ၣ်လီၤ.
တချုးလၢကစၢ်ယ့ၣ်ၡူး က့ၤထီၣ်ဆူမူခိၣ်, ကတိၤလီၤတ့ၢ်ဝဲ အတၢ်ကတိၤလၢခံကတၢၢ်ဆူ အပျဲၢ်အဘီၣ်တဖၣ်အအိၣ်န့ၣ်ဒီး, နံၣ်ကယၤလၢအကဟဲတဖၣ်န့ၣ် အပျဲၢ်အဘီၣ်တဖၣ် ကထံၣ်ဘၣ် ခရံာ်အတၢ်အိၣ်ဖှိၣ်ကဒိၣ်ထီၣ်အါထီၣ်ဝဲဒၣ်န့ၣ် တမ့ၢ်လၢအဝဲသ့ၣ်ကထံၣ်ဆိကမိၣ်မှံပာ်ဝဲဘၣ်န့ၣ်လီၤ. ကစၢ်ယ့ၣ်ရှူး စံးကတိၤတ့ၢ် အပျဲၢ်အဘီၣ်တဖၣ်လၢ, “လဲၤဒုးကဲထီၣ်ၦၤအကလုာ်တဖၣ်ခဲလၢာ်လၢယပျဲၢ်ယဘီၣ်တက့ၢ်. ဒီးဘျၢအီၤလၢပၢ်, ဒီးဖိခွါႇ ဒီးသးစီဆှံအမံၤအပူၤတက့ၢ်” (မး ၂၈:၁၉) န့ၣ်လီၤ. တၢ်ကတိၤတမံၤအံၤ ဘၣ်တၢ်သ့ၣ်ညါအီၤလၢ တၢ်မၤလိာ်ဖးဒိၣ်ဘၣ်ဆၣ်, ကစၢ်ယ့ၣ်ရှူး စူးကါအီၤ ဒ်သိး
ကပာ်ဖျါ အတၢ်ကတိၤလၢခံကတၢၢ်ဆူ အပျဲၢ်အဘီၣ်တဖၣ်အအိၣ်န့ၣ် ကဲထီၣ် တၢ်ဝံဃၢ လၢအပျဲၢ်အဘီၣ်တဖၣ်အဂီၢ် သ့ဝဲဒၣ်န့ၣ်လီၤ. နီၢ်နီၢ်န့ၣ်, တၢ်ကတိၤအံၤ ကစၢ်ယ့ၣ်ရှူး စံးကတိၤလီၤဝဲဒၣ်ဆူ ၦၤပိာ်အခံတဖၣ် ကိးဂၤဒဲး, ဒ်သိးကမၤဝဲအဂီၢ်န့ၣ်လီၤ. တနံၤဘၣ်တနံၤ, လၢပတၢ်အိၣ်မူအိၣ်ဂဲၤအပူၤ, ပကဘၣ်ဒုးကဲထီၣ် ခရံာ်အပျဲၢ်အဘီၣ်တဖၣ်န့ၣ်လီၤ. တလိၣ်ပကဘၣ်လဲၤဆူ ဟီၣ်ခိၣ်အကတၢၢ်န့ၣ်ဘၣ်. ဖဲပလဲၤတပူၤလၢ်လၢ်, ပမ့ၢ်လဲၤစိာ်ဃုာ်တၢ်သးခုကစီၣ်န့ၣ်ဒီး, တၢ်သးခုကစီၣ်န့ၣ် ကလဲၤတၢ်ဒီးၦၤန့ၣ်လီၤ.
တၢ်ကီတၢ်ခဲ တစိၤတလီၢ်ဖိအဂီၢ် ပသးဟးဂီၤအလီၢ်တအိၣ်ဘၣ်. ကစၢ်ယ့ၣ်ၡူး စံးကတိၤပာ်ဖျါစ့ၢ်ကီးဝဲလၢ “ယအိၣ်ဒီးသု ကိးမုၢ်နံၤမုၢ်နၤဒဲးႇ တုၤတၢ်အစိၤကတၢၢ်” (:၂ဝ) န့ၣ်လီၤ. ဖဲပလဲၤတၢ်တပူၤလၢ်လၢ်, ပကစိာ် ကစၢ်ယ့ၣ်ရှူးဒီးၦၤန့ၣ်လီၤ.
