ဒ်ပှၤသးစၢ်တဂၤလၢ အထၢဖှိၣ်ကွဲးပာ်ဖျါ တၢ်ကစီၣ်တဖၣ်အသိး, “ပှၤကွဲးတၢ်ကစီၣ် အလံာ်က့အုၣ်ခီၣ်သး” (press pass) အစိကမီၤ ယမၤလိန့ၢ်ဝဲဒၣ်ချ့ချ့န့ၣ်လီၤ. လံာ်က့အုၣ်ခီၣ်သးဖိလၢ အပာ်ဖျါထီၣ် ယမံၤ, ယတၢ်ဂီၤ, ဒီးတၢ်ကစီၣ်ကရၢန့ၣ် ဟ့ၣ်ယၤခွဲးယာ်, တချုးလၢ တၢ်လိာ်ကွဲပြၢစးထီၣ်, (မ့) ဝံၤဝဲအလီၢ်ခံန့ၣ် ဒ်သိးယကနုာ်လီၤထံၣ်, ဒီးသံကွၢ်သံဒိး ပှၤလိာ်ကွဲတၢ်ဖိတဖၣ် (မ့) ပှၤမံၤဟူသၣ်ဖျါတဖၣ်အဂီၢ်န့ၣ်လီၤ.
ဘၣ်ဆၣ်, ဖဲယတူၢ်လိာ် ကစၢ်ယ့ၣ်ရှူး ဒ်တၢ်အုၣ်က့ၤခီၣ်က့ၤကစၢ်အသိးန့ၣ်ဒီး, ယထံၣ်သ့ၣ်ညါက့ၤယဲလၢ တၢ်လိာ်ခိၣ်လိာ်ကွဲ, ဒီးယတၢ်ဖံးတၢ်မၤန့ၣ် ကဲထီၣ်ဝဲ တၢ်ဂီၤတၢ်ဖီၣ်တဖၣ် လၢယတၢ်အိၣ်မူအပူၤန့ၣ်လီၤ. ဖဲယလူၤပိာ် ယွၤအတၢ်ကိး လၢတၢ်လီၢ် အဂၤန့ၣ်ဒီး, ယလီၤမၢ် ပှၤကွဲးတၢ်ကစီၣ် အလံာ်က့အုၣ်ခီၣ်သးဘၣ်ဆၣ်, မ့ၢ်လၢ ကစၢ်ယ့ၣ်ရှူး အတၢ်တူၢ်သံအသး, ဒီးအတၢ်ဂဲၤထၢၣ်သမူထီၣ်က့ၤအဃိ, ယဒိးန့ၢ်ဘၣ်ခွဲးယာ်, ဒ်သိးဒီးယကလဲၤနုာ်ဆူ ကစၢ်ယွၤ မူခိၣ်အလီၢ်ပစိာ်ဒၢး ခီဖျိလၢတၢ်ထုကဖၣ်န့ၣ်လီၤ.
ပှၤကွဲးလံာ်ဧ့ၤဘြံၤ ပာ်ဖျါဝဲလၢ ပှၤအံၣ်စရ့လးဖိတဖၣ်အကျါ, တၢ်ဃုထၢပှၤလုၢ်တၢ်အဒိၣ်, လီဆီဒၣ်တၢ် လၢစီၤအၤဟရိၣ် အစၢၤအသွဲၣ်အကျါတဂၤ, ဒီးကဘၣ်မ့ၢ်ဝဲဒၣ် ပှၤဂီၢ်မုၢ်အခၢၣ်စး လၢယွၤအမဲာ်ညါန့ၣ်လီၤ. အဂ့ၢ်ဒ်အံၤ, အဝဲမ့ၢ်စ့ၢ်ကီး ပှၤကညီလၢအသံဝဲသ့တဂၤအဃိ, အနီၢ်ကစၢ်ဒီးပှၤဂီၢ်မုၢ်တဖၣ် ကပူၤဖျဲးလၢတၢ်ဒဲးဘးအဂီၢ်, “ကပာ်ထီၣ် တၢ်မၤဘူၣ်, ဒီးတၢ်လုၢ်” (ဧ့ၤဘြံၤ ၅:၁) တနံၣ်တဘျီဆူ တၢ်လုၢ်ဟံၣ် အတၢ်လီၢ်အစီအဆှံကတၢၢ် (Most Holy Place) အပူၤ, ထဲအဝဲတဂၤဧိၤ နုာ်လီၤသ့ဝဲဒၣ်န့ၣ်လီၤ.
ဝံၤန့ၣ်ဒီး, ကစၢ်ခရံာ် လၢအမ့ၢ်ပပှၤလုၢ်တၢ်အဒိၣ်, အခိၣ်, ဒီးအလၢအပှဲၤတဂၤ ဟဲဝဲဒၣ်န့ၣ်လီၤ. ဖဲကစၢ်ခရံာ် သံဝဲဒၣ်န့ၣ်, တၢ်လုၢ်ဟံၣ်အယၣ်ဘျးန့ၣ် သ့ၣ်ဖးခံခီ, ဒီးတၢ်လၢအတြီဃာ်ယွၤဒီးပှၤကညီ အဘၢၣ်စၢၤန့ၣ် ဘၣ်တၢ်သုးကွံာ်အီၤ (မး ၂၇:၅၁) န့ၣ်လီၤ.
မ့ၢ်လၢ ပတၢ်အုၣ်က့ၤခီၣ်က့ၤ လၢပအဲၣ်ဘၣ်တဂၤန့ၣ် မၤဘၣ်လိာ်ဖိးဒ့လိာ်က့ၤပှၤဒီးအပၢ်ကစၢ်ယွၤလံအဃိ, ပဘါထုကဖၣ်ဆူယွၤအအိၣ်လၢ တၢ်သဘျ့အပူၤသ့ဝဲဒၣ်, ဒ်လံာ်ဧ့ၤဘြံၤ ၄:၁၆ ပာ်ဖျါဝဲ, “ဒ်သိးပကဒိးန့ၢ်တၢ်သးကညီၤ, ဒီးထံၣ်န့ၢ်တၢ်ဘျုးတၢ်ဖှိၣ် ဖဲတၢ်မၤစၢၤအဆၢအကတီၢ်အပူၤဒီး, မ်ပသုးဘူးပသးအိၣ်ဒီးပသးခူတလ့ၢ်ဆူ တၢ်ဘျုးတၢ်ဖှိၣ်အလီၢ်ပစိာ်န့ၣ်တက့ၢ်” န့ၣ်လီၤ.
ပလဲၤနုာ်လီၤဆူ ကစၢ်ယွၤ အလီၢ်ပစိာ်အဒၢးပူၤ, စံးကတိၤတၢ်ဒီးကစၢ်ယွၤ ခီဖျိလၢတၢ်ထုကဖၣ်အပူၤန့ၣ် မ့ၢ်တၢ်အခွဲးအယာ်လီၤဆီလၢပဂီၢ်န့ၣ်လီၤ.
