ခၠါ(စ) အိၣ်ဒီးဟံၣ်ဖိဃီဖိလၢအဲၣ်လိာ်ကွံလိာ်အသးဘၣ်ဆၣ်, အသးကလၢၢ်ဘၣ်လၢ ဘၣ်အိၣ်ဝဲဒၣ်ထဲတဂၤဧိၤအဃိ, အသးလီၤသယၢၣ်ဆူ တၢ်သးဟးဂီၤအပူၤန့ၣ်လီၤ. အဝဲစံးဝဲဒၣ် “တၢ်ဆီၣ်ထွဲမၤစၢၤ ဟံၣ်ဖိဃီဖိတဖၣ်န့ၣ် သးအတၢ်ဆီၣ်သနံးတဖၣ် ဒိၣ်ထီၣ် အါထီၣ်ကွ့ၢ်ကွ့ၢ်အဃိ, ယသးသမူဒၣ်လဲာ်, ယအဲၣ်ဒိးမၤကတၢၢ်ကွံာ်ယဲန့ၣ်လီၤ.” တၢ်လၢအလီၤကမၢကမၣ်န့ၣ်, ခၠါ(စ) မီရ့း(စ) (Charles Morris) တဂၤ မ့ၢ်စ့ၢ်ကီးခိၣ်နၢ်လၢ အပၢဆှၢ ပှၤခရံာ်ဖိ တၢ်သးခုကစီၣ်အတၢ်မၤန့ၣ်လီၤ.”

အတံၤသကိး ကူၣ်သ့ကူၣ်ဘၣ်တဂၤ တဲဘၣ်အီၤလၢ, ဖဲအဝဲဘၣ်ကွၢ်ဆၢၣ်မဲာ်ဒီး နီၢ်သးအတၢ်ဆီၣ်သနံးအကတီၢ်န့ၣ်, “ဂ့ၤလၢပမၤပှဲၤပသးဒီး ထါစံးထီၣ်ပတြၢၤတဖၣ်” န့ၣ်လီၤ. ခၠါ(စ) မၤနၢၤလဲၤခီဖျိန့ၢ် အတၢ်မုၢ်လၢ်လၢာ်, နီၢ်သးအတၢ်ဆီၣ်သနံးအကတီၢ်, ခီဖျိတၢ်ဖးလံာ်စီဆှံအဆၢတဖၣ် လၢအဘၣ်ထွဲလိာ်သးဒီးအတၢ်လဲၤခီဖျိ, တၢ်ဒိးကူစါယါဘျါအသး, တၢ်ဟံးန့ၢ်ကသံၣ်ကသီ လီၤတံၢ်လီၤဆဲး, ဒီးပာ်ဖျါထီၣ် အတၢ်ဂ့ၢ်ကီလၢ ယွၤအမဲာ်ညါန့ၣ်လီၤ.

ထါစံးထီၣ်ပတြၢၤတဖၣ် ပာ်ဖျါထီၣ် တၢ်ဂ့ၢ်တမုာ်တလၤတဖၣ်လိၤလိၤဘျၢဘျၢတလီၢ်လီၢ်န့ၣ်လီၤ. ပှၤအ့စရၤဃးဖိ စီၤဟ့မၣ် ကွဲးဝဲဒၣ် ထါအခၣ်ကတၢၢ်တဖၣ်အကျါတယုၢ်န့ၣ်လီၤ. ထါစံးထီၣ်ပတြၢၤ ၈၈ အပူၤန့ၣ်, ပကထံၣ်န့ၢ် တၢ်မုၢ်လၢ် ဖဲအဆိကတၢၢ်တကျိၤ, “ယွၤ, တၢ်အုၣ်က့ၤခီၣ်က့ၤယၤအကစၢ်” (၈၈:၁) န့ၣ်လီၤ. ဖျါလၢ စီၤဟ့မၣ် ပာ်ဒ့ၣ်ပာ်ကမၣ်ကစၢ်ယွၤ, ဒီးစံးဝဲဒၣ် “နပာ်လီၤယၤလၢတၢ်ပူၤအယိာ်ကတၢၢ်” (:၆), ဒီး “နတၢ်သးထီၣ်အိၣ်ဃၢလၢယလိၤ” (:၇) န့ၣ်လီၤ. ဒီးသံကွၢ်ဝဲဒၣ် “ယွၤဧၢ, နညိကွံာ်ယသး, ဒီးနပာ်တဒၢ နမဲာ်ဒီးယၤဘၣ်မနုၤလဲၣ်” (:၁၄) န့ၣ်လီၤ. ထါစံးထီၣ်ပတြၢၤတဖၣ်အါတက့ၢ်န့ၣ်, ကတၢၢ်ဝဲဒၣ်လၢ တၢ်မုၢ်လၢ်ဘၣ်ဆၣ်, မ့မ့ၢ်ထါတယုာ်အံၤန့ၣ်, ပတထံၣ်ဘၣ်. စီၤဟ့မၣ် မၤကတၢၢ်ဝဲဒၣ်လၢ “ပှၤသ့ၣ်ညါယၤန့ၣ် အိၣ်ဝဲလၢတၢ်ခံးကျါ” (:၁၈) န့ၣ်လီၤ. တၢ်အံၤ မ့ၢ်ပှၤလၢအတၢ်မုၢ်လၢ်လၢာ်နီၢ်နီၢ်တဂၤ အတၢ်ထုကဖၣ်န့ၣ်လီၤ. ဘၣ်ဆၣ်, စီၤဟ့မၣ် ပာ်ဖျါထီၣ် တၢ်လၢအတူၢ်ဘၣ်တဖၣ်ဆူ ယွၤအအိၣ်လိၤလိၤန့ၣ်လီၤ.

ဖဲပဖးထါစံးထီၣ်ပတြၢၤ ဒ်သိးအံၤတယုၢ်န့ၣ်ဒီး, ပကသ့ၣ်ညါဘၣ်လၢ ပတမ့ၢ်ဒၣ်ထဲတဂၤဧိၤဘၣ်န့ၣ်လီၤ. ပှၤအဂုၤအဂၤတဖၣ် လဲၤခီဖျိဘၣ် တၢ်မုၢ်လၢ် တအိၣ်လၢၤဘၣ်အကတီၢ်, ဒီးပာ်ဖျါထီၣ်ဝဲဒၣ်ဒူဒူန့ၣ်လီၤ. ကစၢ်ယွၤတူၢ်လိာ် တၢ်လၢ စီၤဟ့မၣ် ပာ်ဖျါထီၣ်ဝဲဒၣ်တီတီလိၤလိၤန့ၣ်လီၤ. ကစၢ်ယွၤ ကတူၢ်လိာ်စ့ၢ်ကီးနၤန့ၣ်လီၤ. ကစၢ်ယွၤ ကအိၣ် ဝဲဒၣ်ဖဲန့ၣ်, ဒီးကဒိကနၣ်ဝဲဒၣ်နၤန့ၣ်လီၤ.