ပှၤဖြ့ၣ်စ့ၣ်ဖိလၢ အဒိးကဘီတဂၤ,ဃုာ်ဒီးအသၣ်မံယီၤန့ၣ် ဒိးထီၣ်ဝဲအကဘီယၢ်, အိၣ်ဟးထီၣ်လၢ အလဲးစကး-ကလံၤထံး ဒၢးရှ်ကဘီသန့, ဆူ ဝ့ၢ် စၣ်ဒံၣ်ယ့ကိၣ် လၢကဲ(လ)ဖိနယၢၣ် ကီၢ်စဲၣ်အကတီၢ်, လပီဝါခိၣ်ဖးဒိၣ်တဖျၢၣ် မၤလီၤတကျၢၢ်ကွံာ် အကဘီယၢ်န့ၣ်လီၤ. ကဘီယၢ်အံၤ ထိၣ်လိၤအိၣ်ဂၢၢ်အသးဘၣ်ဆၣ်, ကဘီယၢ် အနီၣ်ထိၣ်ဘျၢန့ၣ် ထူၣ်ဖျဲးဝဲလၢ ပှၤဒိးကဘီဖိအစု, ဒီးလၢလပီဖးဒိၣ်တဖၣ်အကျါန့ၣ်တၢ်ပၢၤဃာ်ထိၣ်လိၤ ကဘီယၢ်တန့ၢ်လၢၤဘၣ်န့ၣ်လီၤ. “အဝဲဆှၢလီၤ အတၢ်အိၣ်သး အၢအၢသီသီနးနးကျံးကျံးအဂ့ၢ်အံၤဆူ ပှၤပၢၤထံဆၢကီၢ်ဆၢပီၣ်လဲၣ်နံၤတဖၣ်, ဒီးပာ်ဖျါထီၣ်ဝဲလၢ အစုကတၢၢ်ခီၣ်ကတၢၢ်, ထိၣ်လိၤပၢၤဃာ်အကဘီယၢ်တန့ၢ်လၢၤဘၣ်န့ၣ်လီၤ. အကတၢၢ်န့ၣ်, ပှၤပၢၤထံဆၢကီၢ်ဆၢပီၣ်လဲၣ်နံၤတဖၣ် ဆဲးကျိးန့ၢ်ဝဲ လၢအကပိာ်အကပၤ ကဘီလၢအခူၣ်ကျဲတံးသိအသံကစဲာ်တဘ့ၣ် ဒ်သိးဒီးကလဲၤမၤစၢၤ ပှၤဖြ့ၣ်စ့ၣ်ဖိလၢ အဒိးကဘီယၢ်တဂၤအတၢ်ထူၣ်ဖျဲးအဂီၢ်န့ၣ်လီၤ. ဘၣ်ဆၣ်, ပှၤဒိးကဘီဖိ,ဃုာ်ဒီးအသၣ်မံယီၤဖိလၢ အဆ့ကၤထၢၣ်ပူၤန့ၣ် ကဘၣ်ဟးထီၣ်ကွံာ်လၢ အကဘီယၢ်, ဒီးကဘၣ်စံၣ်ထီၣ်ဝဲလၢတၢ်နာ်ဆူ ကဘီလၢအဟဲမၤပူၤဖျဲးအဝဲသ့ၣ်အလိၤန့ၣ်လီၤ.
လံာ်အ့ဖ့းစူး အဆၢဒိၣ်၂ အပူၤန့ၣ်, စီၤပီလူး ပာ်ဖျါထီၣ် ပှၤဟီၣ်ခိၣ်ဖိတဖၣ် အတၢ်အိၣ်အသး လၢတၢ်ဒဲးဘးအပူၤ, ဒီးတၢ်မုၢ်လၢ်တအိၣ်ဝဲဒၣ်အဂ့ၢ်- ဒ်အမ့ၢ် နီၢ်သးအတၢ်သံလၢထံယိာ်, ဒီးတၢ်ဘၣ်အိၣ်လီၤဖးဒီးကစၢ်ယွၤ (:၁) န့ၣ်လီၤ. အါန့ၢ်အန့ၣ်, တၢ်လၢကစၢ်ယွၤဆၢမိၣ်န့ၢ် (:၂) တဖၣ်န့ၣ် ပတဒိကနၣ်ဝဲဘၣ်, ဒီးပတၢ်အိၣ်မူလီၤထွံလီၤယွၤဝဲဒၣ် အဃိ, ဒ်သိးပကတုၤဆူ တၢ်အုၣ်က့ၤခီၣ်က့ၤ (:၃) အဂီၢ်, ပကမၤစၢၤလီၤက့ၤပသး တန့ၢ်တသ့လၢၤဘၣ်. ဘၣ်ဆၣ်, ဒ်သိးပကဒိးန့ၢ် “တၢ်အုၣ်က့ၤခီၣ်က့ၤ ခီဖျိလၢတၢ်နာ်” အဂီၢ်, လၢ “တၢ်ဘျုးတၢ်ဖှိၣ်” အပူၤန့ၣ်, ကစၢ်ယ့ၣ်ရှူး မၤတ့ၢ်ဝဲလၢပဂီၢ်, ဒီးတၢ်အုၣ်က့ၤခီၣ်က့ၤတမံၤအံၤ မ့ၢ်ဝဲဒၣ် “ကစၢ်ယွၤ အတၢ်ဟ့ၣ်” (:၈) န့ၣ်လီၤ.
ပဝဲကိးဂၤဒဲး ပလီၤထွံလီၤယွၤဝဲလၢ တၢ်ဒဲးဘးဒီးတၢ်သံ, အပီၣ်လဲၣ်လပီစံၣ်စုာ်အပူၤဘၣ်ဆၣ်, ပကဘၣ်စံးဘျုးစံးထီၣ်ပတြၢၤ ကစၢ်ယွၤလၢ ပအိၣ်ဒီး တၢ်အုၣ်က့ၤခီၣ်က့ၤကစၢ်တဂၤ, လၢအမၤတ့ၢ်လံတၢ်လၢပဂီၢ်, ဒ်သိးပကစံၣ်ထီၣ်ဆူ ကစၢ်ယ့ၣ်ရှူး အတၢ်အုၣ်က့ၤခီၣ်က့ၤတၢ် အစုပူၤ, ခီဖျိလၢတၢ်နာ်န့ၣ်လီၤ. ထဲဒၣ်ကစၢ်ခရံာ်တဂၤဧိၤန့ၣ် မၤပူၤမၤဖျဲးပှၤသ့ဝဲ, ဒီးစိာ်ဆှၢပှၤဆူ တၢ်ဘံၣ်တၢ်ဘၢအလီၢ်အကျဲ သ့ဝဲဒၣ်န့ၣ်လီၤ.
