ဖဲ ၂၀၂၃ နံၣ်, လါယနူၤအါရံၤန့ၣ်, တၢ်ဒုးနဲၣ် တၢ်လိာ်ကွဲဖျၢၣ်ထူ လၢကွဲၤဟူဖျါအကတီၢ်, ဘၢးဖလိ ဘ့(လ) (Buffalo Bills) အပှၤလိာ်ကွဲတၢ်ဖိ ဒၣ်မၣ် ဟဲ(မ)လ့ (Damar Hamlin) တဂၤ, လဲၤဂုာ်ဟံးန့ၢ်ဖျၢၣ်ထူ လၢဖျၢၣ်ထူအဂၤတဖု အပှၤလိာ်ကွဲတၢ်ဖိအအိၣ်ဝံၤန့ၣ်ဒီး, လီၤဃံၤဝဲဒၣ်ဆူ ဟီၣ်ခိၣ်လိၤအဃိ, ကမျၢၢ်ဟ့ၣ်ဂံၢ်ဟ့ၣ်ဘါတၢ်တဖၣ် သံတယူာ်ဘၣ်အသးန့ၣ်လီၤ. ပှၤသးစၢ် ခံဆံလွံၢ်နံၣ်ဖိတဂၤအံၤ ဖဲအလိာ်ကွဲဖျၢၣ်ထူအကတီၢ်န့ၣ်, တူၢ်ဘၣ် အသးဖျၢၣ်တၢ်ဆါသတူၢ်ကလာ်န့ၣ်လီၤ. ဖဲအအိၣ်ဝဲလၢ ဖျၢၣ်ထူပျီအဖၢမုၢ်န့ၣ်, ကသံၣ်သရၣ် လၢအပတီၢ်ထီစဲၣ်နီၤတဖၣ် ကူစါယါဘျါက့ၤအီၤတကီၢ်ခါန့ၣ်လီၤ. အပူၤကွံာ် သၢလါန့ၣ်, ဟဲ(မ)လ့ ဘူးတ့ၢ်မးလၢအကသံဝဲဒၣ်တဂၤ လၢတၢ်လီၤကမၢကမၣ်ဖးဒိၣ်အပူၤန့ၣ် ကလိာ်ကွဲကဒါက့ၤ ဖျၢၣ်ထူအဂီၢ်, အတၢ်အိၣ်ဆူၣ်အိၣ်ချ့ဂ့ၤက့ၤဝဲဒၣ်န့ၣ်လီၤ.
ဟဲ(မ)လ့ ပာ်ဖျါထီၣ် အတၢ်စံးဘျုးစံးဖှိၣ်ဆူ ကစၢ်ယွၤ,ဃုာ်ဒီးကသံၣ်သရၣ်လၢ အပတီၢ်ထီစဲၣ်နီၤတဖၣ် လၢအအုၣ်က့ၤခီၣ်က့ၤအသးမူန့ၣ်လီၤ. ဟဲ(မ)လ့ ကတဲာ်ကတီၤအတၢ်အိၣ်မူလၢ ခါဆူညါအကမ့ၢ်ပှၤလၢ အထိၣ်ဟူးထိၣ်ဂဲၤပှၤဂုၤပှၤဂၤအဂီၢ်န့ၣ်လီၤ. လံာ်ယိၤဟၣ် အဆၢဒိၣ် ၁၁ အပူၤန့ၣ်, စီၤလါစရူး ဂဲၤဆၢထၢၣ်သမူထီၣ်က့ၤအဂ့ၢ် စ့ၢ်ကီး, မ့ၢ်တၢ်လၢအလီၤကမၢကမၣ်လီၤလီၤဆီဆီတမံၤန့ၣ်လီၤ.
ဖဲ ကစၢ်ယ့ၣ်ရှူး လဲၤတုၤဝဲဒၣ်ဆူ ဘ့ၤသနံး အကတီၢ်, စီၤလါစရူး သံတ့ၢ်ဝဲန့ၣ်အိၣ်လွံၢ်သီလံန့ၣ်လီၤ. စီၤလါစရူး အဒီပုၢ်ဝဲၢ်မုၣ် နီၢ်မၤရံဒီးနီၢ်မၤသၤ လၢအသူၣ်အုးသးအုး ခံဂၤန့ၣ်, ထံၣ်သ့ၣ်ညါဝဲဒၣ်လၢ ကစၢ်ယ့ၣ်ရှူး အတၢ်စိတၢ်ကမီၤ လၢတၢ်သံအဖီခိၣ်, ဒီးကစၢ်ယ့ၣ်ရှူးန့ၣ် မ့ၢ်ဝဲ “တၢ်ဂဲၤဆၢထၢၣ်က့ၤဒီးတၢ်မူ” (ယိၤ ၁၁:၂၅) အဃိန့ၣ်လီၤ. ကစၢ်ယ့ၣ်ရှူး “ကိးပသူထီၣ်လၢအကလုၢ်ဖးဒိၣ်, စီၤလါစရူးဧၢ, ဟဲက့ၤထီၣ်တက့ၢ်. ဒီးပှၤလၢအသံတ့ၢ်တဂၤန့ၣ်, ဟဲက့ၤထီၣ်ဒီး အစုအခီၣ်ဘိၣ်ဃာ်အသးလၢ တၢ်ကံးညာ်ဒီး အမဲာ်ကျၢၤဘၢအသးလၢတၢ်စှၢၤ” (:၄၃-၄၄) န့ၣ်လီၤ.
ပဝဲနၤယၤစ့ၢ်ကီး, ပမ့ၢ်တၢ်အဒိအတဲာ်တဖၣ် လၢကစၢ်ခရံာ် အတၢ်ဂဲၤဆၢထၢၣ် သမူထီၣ်က့ၤ အစိအကမီၤန့ၣ်လီၤ. တဘျီန့ၣ်, ပမ့ၢ်ပှၤလၢအသံတ့ၢ်ဝဲလၢတၢ်ဒဲးဘး ဘၣ်ဆၣ်, ခဲကနံၣ်အံၤ, ပမူဝဲလၢ ခရံာ်အပူၤ (ရိမ့ၤ ၆:၁-၁၁) န့ၣ်လီၤ. ဒ်ပမ့ၢ်ပှၤစူၢ်က့ၤ နာ်က့ၤတဖၣ်အသိး, သးစီဆှံ တဂၤဃီ, လၢအဒုးမူထီၣ်က့ၤ ကစၢ်ယ့ၣ်ရှူး လၢတၢ်သံန့ၣ် အိၣ်မူအိၣ်ဂဲၤဝဲလၢပပူၤ (၈:၁၀-၁၁) န့ၣ်လီၤ. ပာ်ဆူၣ်ထီၣ်နသးတက့ၢ်. ပဝဲကိးဂၤဒဲး ပကသံဝဲလၢ နီၢ်ခိအတၢ်သံ, ဒီးပတၢ်သံအံၤ တမ့ၢ်တၢ်အကတၢၢ်ဘၣ်. ကစၢ်ယွၤအၢၣ်လီၤပှၤလၢ တၢ်မူအထူအယိာ်,ဃုာ်ဒီးကစၢ်ယ့ၣ်ရှူးန့ၣ်လီၤ.
