လၢကီၢ်စီဆှံ (Holy Land) အပူၤန့ၣ်, ပမုာ်လၤသးခု လဲၤကွၢ်ဟးကွၢ် ကျဲလၢ ကစၢ်ယ့ၣ်ရှူး လဲၤဟးတ့ၢ်ဝဲတဖၣ်န့ၣ်လီၤ. ခဲကနံၣ်အံၤ, ယထံၣ်ဆိကမိၣ်ယဲ ကစၢ်ယ့ၣ်ရှူး အတၢ်အိၣ်မူ လၢဟီၣ်ခိၣ်ချၢ တၢ်လၢအထံၣ်ဝဲ, ဒီးတၢ်လၢအနၢ်ဟူဝဲတဖၣ်န့ၣ် ညီဒိၣ်ဝဲလၢယဂီၢ်န့ၣ်လီၤ. ဘၣ်ဆၣ်, မ့ၢ်လၢယလဲၤထီၣ်က့ၤလီၤလၢ တၢ်ဘါသရိာ်တဖၣ်, ဒီးဒူသဝီ လၢၢ်လ့အကျဲတဖၣ်အဃိ, ယက့ၤတုၤဟံၣ်န့ၣ်ဒီး, ယခီၣ်လ့ၢ်ခိၣ်ခံခီန့ၣ် ဆါဝဲဒၣ်န့ၣ်လီၤ. ဘၣ်ဆၣ်, ယခီၣ်လ့ၢ်ခိၣ်လၢအဆါန့ၣ် တၢ်မ့ၢ်ထိၣ်သတြီၤအီၤဒီး ခါလၢအပူၤကွံာ် ပှၤလဲၤတၢ်က့ၤဖိတဖၣ်န့ၣ်ဒီး, ကမ့ၢ်တၢ်လၢအဆံးအစှၤန့ၣ်လီၤ. အဝဲသ့ၣ် အစုဆၢခီၣ်ဆၢအထူၢ်ပျၢ်တဖၣ်န့ၣ် ကဆူးကဆါ, ကဘၣ်နးဘၣ်ဖှီၣ်နးနးကျံၤကျံၤ- တၢ်သံတၢ်ပှၢ်ဒၣ်လဲာ် ကဘၣ်ကွၢ်ဆၢၣ်မဲာ်ဝဲဒၣ်န့ၣ်လီၤ. ဘၣ်ဆၣ်, ကစၢ်ယွၤအိၣ်ဒီးအဝဲသ့ၣ်န့ၣ်လီၤ.
ကစၢ်ယွၤ ကိးဝဲဒၣ် အပှၤဂီၢ်မုၢ်လၢ ကပိာ်ထီၣ်အခံ, ဒီးကွဲမုာ်ဝဲဒၣ်လၢ ကနုာ်လီၤအိၣ်ဆိးဘၣ် ဖဲကီၢ်တဘ့ၣ်လၢ “အယွၤဝဲဒီးတၢ်နုၢ်ထံဒီးကနဲစီ” (၂ မိၤ ၃:၈) အဂီၢ်န့ၣ်လီၤ. ကစၢ်ယွၤ သ့ၣ်ညါဝဲလၢ ပှၤဂီၢ်မုၢ်တဖၣ် မ့ၢ်လဲၤတုၤ ကီၢ်တၢ်စံးပာ်န့ၣ်ဒီး, ကဘၣ်ကွၢ်ဆၢၣ်မဲာ် သုးမုၢ်လၢကထီဒါအဝဲသ့ၣ်, ဒီးဝ့ၢ်အခိၣ်ဒူဖးဒိၣ်ဖးထီတဖၣ်လၢကမၤကီမၤခဲအဝဲသ့ၣ်န့ၣ်လီၤ. လၢပှၢ်မုၢ်ကနၢန့ၣ် ကစၢ်ယွၤ လဲၤတၢ်ဒီးအပှၤဂီၢ်မုၢ် အနံၣ်လွံၢ်ဆံ, ဒီးခဲကနံၣ်အံၤ, တလဲၤကပာ် အပှၤဂီၢ်မုၢ်ဘၣ်. ကစၢ်ယွၤ ကအိၣ်ဒီး အပှၤဂီၢ်မုၢ်န့ၣ်, အၢၣ်လီၤဝဲ ခိၣ်နၢ်သီသံၣ်ဘှဲ, စီၤယိၤရှူ, ဒီးစံးဝဲဒၣ် “ယကအိၣ်ဒီးနၤ… ယတလဲၤသဒၣ်ဘၣ်နၤဘၣ်” (ယိၤ ၁:၅) န့ၣ်လီၤ. စီၤယိၤရှူ ကဘၣ်ကွၢ်ဆၢၣ်မဲာ် တၢ်တၤတဖၣ်, ဒီးတၢ်ကီတၢ်ခဲတဖၣ်အဃိ, ဒ်သိးကပာ်ဆူၣ်အသး, ဒီးကတံးတဟီၣ်အဂီၢ်, ကစၢ်ယွၤ ကမၤစၢၤအီၤန့ၣ်လီၤ.
ပဝဲနၤယၤ, လၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်, ကစၢ်ယွၤ မၢပှၤလၢ ပကဘၣ်အိၣ်ဃိကလာ်မ့ၢ်ဂ့ၤ, ပကဘၣ်လဲၤတၢ်ဆူညါမ့ၢ်ဂ့ၤ, ပကဘၣ်ကွၢ်ဆၢၣ်မဲာ် တၢ်လီၤပျံၤလီၤဖုး, ဒီးတၢ်လၢအတၤပှၤ, ဒီးတၢ်နးတၢ်ဖှီၣ်တဖၣ် လၢပသးသမူအပူၤန့ၣ်လီၤ. ဘၣ်ဆၣ်, ပကစၢ်ယွၤ အတၢ်အၢၣ်လီၤ, လၢအတလဲၤသဒၣ်ပှၤနီတစုဘၣ်န့ၣ် ပဟံးဃာ်ဂၢၢ်ကျၢၤအီၤသ့ဝဲဒၣ်န့ၣ်လီၤ. ပဝဲနၤယၤစ့ၢ်ကီး, ခီဖျိလၢ ကစၢ်ယွၤန့ၣ် ပပာ်ဆူၣ်ပသး, ဒီးပတံးတဟီၣ် သ့ဝဲဒၣ်န့ၣ်လီၤ.