လၢကီၢ်အဲကလံးန့ၣ် ဟံၣ်ဖိဃီဖိလၢ ယူၢ်.ခ့ၣ် (UK) တဖၣ် ဘၣ်သူၣ်ဘၣ်သးမုာ်ဒိၣ်မးလၢတၢ်လဲၤဟးလိာ်ကွဲ ခီၣ်နံးစတၢၣ် ဝီ(လ)ထၢၣ် (Coniston Water) ကမါအဃံအလၤအိၣ်တၢ် အလီၢ်အကျဲကီၢ်ရ့ၣ်န့ၣ်လီၤ. ထံကမါအတၢ်လီၢ်တၢ်ကျဲတဖၣ်န့ၣ် ဂ့ၤဝဲလၢ တၢ်ဒိးလိာ်ကွဲ ချံ, တၢ်ပီၢ်ထံမၤမုာ်သး, ဒီးထံအတၢ်လိၣ်ကွဲအကလုာ်ကလုာ်တဖၣ်န့ၣ်လီၤ. ဘၣ်ဆၣ်, တၢ်လီၢ်အဃံအလၤတတီၤအံၤ ကဲထီၣ်ဝဲစ့ၢ်ကီး တၢ်သူၣ်အုးသးအုးဖးဒိၣ် အလီၢ်တတီၤန့ၣ်လီၤ. ဖဲ ၁၉၆၇ နံၣ်န့ၣ်, ဒ်သိးဒီးကဒိးန့ၢ် ထံမဲာ်ဖံးခိၣ် အတၢ်လဲၤတၢ်အချ့ လၢဟီၣ်ခိၣ်ဒီဘ့ၣ် တၢ်ကွဲးနီၣ်ကွဲးကါအဂီၢ်, ဒီနၢၣ် ခဲဘဲ(လ) (Donald Campbell) ဒိးထီၣ်နီၣ်ဝဲဒၣ် အထံကဟၣ်ယူၤ ဘလူဘၢး ခ့ၣ်.၇ (Bluebird K7) န့ၣ်လီၤ. အဝဲနီၣ် ထံကဟၣ်ယူၤ လဲၤတၢ်အချ့တုၤဃီၤဝဲအအါကတၢၢ်လၢ တနၣ်ရံၣ်န့ၣ် ၃၂၈ မံးလာ် (၅၂၈ km/h) ဘၣ်ဆၣ်, မ့ၢ်လၢအကဟၣ်ယူၤ ဘလူဘၢး အတၢ်ဘၣ်ဒိဘၣ်ထံးန့ၣ် ဟံးထီၣ်ကွံာ်အသးသမူအဃိ, တမၤလၤကပီၤဘၣ် အတၢ်မၤနၢၤအဂီၢ်ဘၣ်န့ၣ်လီၤ.
တၢ်လီၢ်လၢအမုာ်အဃံအလၤတဖၣ်န့ၣ် တၢ်သူၣ်အုးသးအုးအကတီၢ်တဖၣ် ကဲထီၣ်အသးသ့ဝဲဒၣ်န့ၣ်လီၤ. ၁ မိၤ ၂:၁၅ ပာ်ဖျါဝဲလၢ တၢ်ဘၣ်တ့ ကစၢ်ယွၤ “ဟံးန့ၢ် ပှၤကညီ, ဒီးပာ်ဝဲလၢဧ့ၤဒ့ၣ်အတၤသၣ်လီၢ်ပူၤ, ဒ်သိးအကမၤအီၤ,ဒီးပၢၤအီၤ” န့ၣ်လီၤ. တၤသၣ်လီၢ် မ့ၢ် “ကစၢ်ယွၤ အစုတၢ်ဘၣ်တ့ အဂ့ၤကတၢၢ်” ဘၣ်ဆၣ်, ဖဲတၢ်ပာ်လီၤ ပိာ်ခွါဒီးပိာ်မုၣ်လၢ ပၤရဒံစူး အလီၢ်တတီၤအံၤန့ၣ်ဒီး, တဒိကနၣ် ကစၢ်ယွၤအကလုၢ်လၢၤဘၣ်. ဒီးဟဲစိာ်နုာ် တၢ်ဒဲးဘး, ဒီးတၢ်သံဆူ ယွၤအတၢ်ဘၣ်တ့ (၃:၆-၇) အပူၤန့ၣ်လီၤ. မ့ၢ်လၢအတၢ်ဃုထၢ လၢအလီၤသးအုးအဃိ, မုၢ်တနံၤအံၤ, ပကထံၣ်ဘၣ် တၢ်ဟးဂူၢ်ဟးဂီၤ လၢအပိာ်ထွဲထီၣ်အခံတဖၣ်န့ၣ်လီၤ.
တဘျီန့ၣ်, မ့ၢ်လၢတၢ်ဒဲးဘးအဃိ, ပဝဲပှၤဟီၣ်ခိၣ်ဖိတဖၣ်သံတ့ၢ်ဝဲဘၣ်ဆၣ်, ကစၢ်ယ့ၣ်ရှူး ဟဲလီၤစိာ်န့ၢ်ပှၤတၢ်မူန့ၣ်လီၤ. ဘၣ်ဃးဒီးတၢ်ဂ့ၢ်အံၤ, ရိ ၅:၁၉ အပူၤန့ၣ် ပှၤတၢ်မၢဖိ စီၤပီလူးကွဲးပာ်ဖျါဝဲလၢ “အဂ့ၢ်ဒ်အံၤ, ဒ်တၢ်ပာ်ပှၤအါဂၤ လၢတၢ်ဒဲးဘးဖိလၢ ပှၤတဂၤ အတၢ်တစူၢ်ဘၣ်အဃိအသိးန့ၣ်, တၢ်ကပာ်ပှၤအါဂၤလၢတၢ်တီတၢ်လိၤ လၢပှၤတဂၤအစူၢ်တၢ်အဃိ, ဒ်န့ၣ်အသိး” န့ၣ်လီၤ. မ့ၢ်လၢကစၢ်ယ့ၣ်ရှူးအဃိ, ပဝဲကိးဂၤဒဲးအဂီၢ, ဟံၣ်မုာ်လၢအဃံလၤဒိၣ်ကတၢၢ်န့ၣ် အိၣ်ခိးပာ်တ့ၢ်ပှၤလံန့ၣ်လီၤ.
လၢတၢ်ဃံတၢ်လၤအပူၤန့ၣ် တၢ်သူၣ်အုးသးအုးဟဲအိၣ်ထီၣ်ဝဲဒၣ်န့ၣ်လီၤ. ဒီးလၢတၢ်သူၣ်အုးသးအုးအပူၤန့ၣ် တၢ်ဃံတၢ်လၤအထူအယိာ် ဟဲအိၣ်ထီၣ်ဝဲဒၣ်, ခီဖျိလၢကစၢ်ယွၤအဘျုးအဖှိၣ်န့ၣ်လီၤ.
