မဲၣ်ထံလၢလံာ်ကဘျံးအလိၤ, လၢပှၤမၤစီအီၤတန့ၢ်တဖၣ် တၢ်ကဘၣ်ထူးသံကွံာ်အီၤ ဒ်လဲၣ်န့ၣ် အဒီ(လ)ဖိၣ် ကမ့စကံ (Adolfo Kaminsky) သ့ၣ်ညါဝဲန့ၣ်လီၤ. ဒ်အမ့ၢ် ကရၢဖိတဂၤ လၢအထီဒါ နၣ်စံၣ်, လၢကီၢ်ဖြၣ်စ့ၣ်န့ၣ်, ဆီတလဲက့ၤ လံာ်တီမီအုၣ်သးတဖၣ်, ဒ်သိးကမၤပူၤမၤဖျဲးဝဲ ပှၤကညီလၢအကယၤတဖၣ်အကယၤ, ပှၤလၢအဘၣ်အိၣ်ဆိးဝဲဒၣ်လၢ တၢ်ဒုးဃာ် အဒဲကဝီၤတဖၣ်အပူၤန့ၣ်လီၤ. ဘၣ်တဘျီန့ၣ်, အဝဲဒိးန့ၢ် တၢ်ဆၢကတီၢ်ထဲဒၣ် သၢသီဧိၤ, ဒ်သိးကကွဲးဒိမၤဒိးဝဲ တၢ်အိၣ်ဖျဲၣ်, ဒီးတၢ်ဒိးဘျၢထံ လံာ်တီမီအုၣ်သး လၢပှၤအဂၤ ခွံကယၤအဂီၢ်, ဒီးတၢ်အီၣ်အလံာ်အုၣ်သးလၢ ပှၤယူဒၤဖိသၣ် အဂၤသၢကယၤအဂီၢ်န့ၣ်လီၤ. အဝဲဟ့ၣ်လီၤအသးဒီးမၤတၢ်ခံသီတပယုာ်ဃီ, ဒီးတမံဝဲဒၣ်ဘၣ်. ဒီးစံးကတိၤလီၤက့ၤအသးလၢ “တနၣ်ရံၣ်အတီၢ်ပူၤန့ၣ် ယကဘၣ်မၤ လံာ်တီမီအုၣ်သး တုၤအဝံၤဝဲဒၣ် အဘ့ၣ်သၢဆံန့ၣ်လီၤ. ယမ့ၢ်မံဘၣ်ယဲလၢတနၣ်ရံၣ်
အတီၢ်ပူၤန့ၣ်ဒီး, ပှၤကညီအဂၤ သၢဆံ ကသံကွံာ်ဝဲဒၣ်န့ၣ်လီၤ.”
အလီၢ်အိၣ်ဝဲလၢ တၢ်ကဘၣ်မၤအီၤတဘျီဃီ ဒ်သိးအံၤန့ၣ် ပှၤတၢ်မၢဖိ စီၤပီလူး တူၢ်ဘၣ်ခီၣ်ဘၣ်ဝဲဒၣ်န့ၣ်လီၤ. မၤ ၂၀:၁၉ အပူၤန့ၣ် စီၤပီလူး ဒုးသ့ၣ်နီၣ် အ့းဖ့းစူး အတၢ်အိၣ်ဖှိၣ်လၢ “ယမၤကစၢ်အတၢ် အိၣ်ဒီးတၢ်ဆီၣ်လီၤယသးတုၤအလၢာ်, ဒီးယမဲာ်ထံလီၤ, ဒီးတၢ်လ့ပစီလၢအဘၣ်ယၤ, လၢပှၤယူဒၤဖိကူၣ်ထီဒါယၤ” န့ၣ်လီၤ. စီၤပီလူး စံးကဒီးဝဲလၢ “တၢ်ကမၤအါထီၣ် သုဘျုးသုဖှိၣ်န့ၣ် ယတပာ်ခူသူၣ်တၢ်နီတမံၤဘၣ်” (:၂၀) န့ၣ်လီၤ. တၢ်ဂ့ၢ်အကါဒိၣ်, ဒီးအလီၢ်အိၣ်ဝဲလၢ တၢ်ကဘၣ်မၤအီၤတဘျီဃီအံၤန့ၣ်, မၤဆူၣ်မးစိး စီၤပီလူးအဃိ, တၢ်ပီၢ်ယၢ်လီၤက့ၤသး, ဒီးတၢ်စူၢ်က့ၤနာ်က့ၤ ကစၢ်ယ့ၣ်ရှူးန့ၣ် မ့ၢ်တၢ်လၢအလိၣ်ဘၣ် သပှၢ်တၢၢ် (:၂၁) လီၤန့ၣ် ဟ့ၣ်ခီနီၤလီၤဝဲဆူ ပှၤကိးဒံးကိးဂၤဒဲးအအိၣ်န့ၣ်လီၤ. ခဲကနံၣ်အံၤ, စီၤပီလူး အသူၣ်ဆူၣ်သးဂဲၤ ဝဲလၢ “ကမၤဝံၤ (ယ) အတၢ်ဃ့ၢ်…, ဒီးကမၤလၢပှဲၤတၢ်မၤလၢ (ယ) အဒိးန့ၢ်လၢ ကစၢ်ယ့ၣ်ရှူးခရံာ်, လၢ (ယ) အကအုၣ်အသးလီၤတံၢ်လီၤဆဲးလၢယွၤအဘျုးအဖှိၣ် အတၢ်သးခုကစီၣ်” (:၂၄) အဂီၢ်န့ၣ်, အဝဲဒိးထီၣ်ကဘီ, ဒီးက့ၤဝဲဒၣ်ဆူ ဝ့ၢ် ယရူၤရှလ့ၣ်န့ၣ်လီၤ.
စီၤပီလူး အုၣ်က့ၤခီၣ်က့ၤ ပှၤကညီတဖၣ်တသ့ဘၣ်. ထဲဒၣ်ကစၢ်ယွၤတဂၤဧိၤ မၤဝဲသ့ န့ၣ်လီၤ. ဘၣ်ဆၣ်, စီၤပီလူး မၤသ့ဝဲဒၣ်လၢ ကတဲဖျါထီၣ် ယွၤအတၢ်သးခုကစီၣ်, ကစၢ် ယ့ၣ်ရှူးအဂ့ၢ်န့ၣ်လီၤ. “အဂ့ၢ်ဒ်အံၤ, မံၤအဂုၤအဂၤ လၢပှၤကညီအကျါ, လၢမူခိၣ်အဖီလာ်, တၢ်တဟ့ၣ်ဘၣ်ဝဲလၢ ပဘၣ်တုၤလၢ တၢ်အုၣ်က့ၤခီၣ်က့ၤလၢအပူၤ နီတမံၤဘၣ်” (မၤ ၄:၁၂) န့ၣ်လီၤ.
မုၢ်တနံၤအံၤ, လၢနသးပူၤန့ၣ် သးစီဆှံကစၢ် ဟဲစိာ်န့ၢ်နၤ မတၤတဂၤလဲၣ်. နဟ့ၣ်ခီဟ့ၣ်နီၤကစၢ်ယွၤအတၢ်သးခုကစီၣ်ဒီးအဝဲသ့ၣ် သ့ဝဲဒၣ်န့ၣ်လီၤ.
