ဖဲယတံၤသကိး အနံၤအိၣ်ဖျဲၣ်ဆၢက့ၤအနံၤန့ၣ် ယလဲၤပိာ်အခံဆူ တၢ်မၤဃံမၤလၤ က့ၢ်ဂီၤအကျးအကတီၢ်, မ့ၢ်လၢတၢ်တူၢ်လိာ်မုာ်ပှၤလၢ မဲာ်မုာ်နါဆၢအဃိ, ပမုာ်လၤသးခုဘၣ်ဝဲဒိၣ်မးန့ၣ်လီၤ. တၢ်သူၣ်ဝံၣ်သးဆၢအမုာ် လၢအသီၣ်ကဖီလီဖိ, ဒီးပှၤမၤတၢ်ဖိ တဂၤစုာ်စုာ်န့ၣ် တူၢ်လိာ်မုာ်နဲၣ်ဆှၢပှၤဆူ ဒၢးလၢအိၣ်ဘှ့ၣ်အိၣ်ဘှီၣ်, ဒီးတၢ်ကပီၤကဒုကဒုအပူၤန့ၣ်လီၤ. ကယဲၢ်တၢ်လၢပသးကလၢၢ်ဘၣ်တၢ်ခဲလၢာ်န့ၣ် မ့ၢ်တၢ်မုာ်တၢ်ပၢၤ, တၢ်ဘှ့ၣ်တၢ်ဘှီၣ်, ဒီးတၢ်အိၣ်ဘှံးအိၣ်သါအမုာ်အလၤန့ၣ်လီၤ. ဘၣ်ဆၣ်, ဖဲယထံၣ်တၢ်ပနီၣ်ဘိးဘၣ်သ့ၣ်ညါတၢ်တမံၤ လၢစီၢ်နီၤခိၣ်အလိၤ, လၢအစံးဝဲ “တၢ်ကဟုကယာ် ခိၣ်သူ ဒ်န့ဆၢၣ်ကျိၤကျဲအံၤ ကဟ့ၣ်နၤသးအတၢ်မုာ်တၢ်ပၢၤ အါန့ၢ်ဒံး နခိၣ်သူအဃံအလၤ” န့ၣ်ဒီး, ဒ်သိးယသုတနံၤသီၣ်ထီၣ်အဂီၢ်, ယဘၣ်ပၢၤဃာ်ယသးန့ၣ်လီၤ.

တၢ်ထုးထီၣ် တၢ်ဖိတၢ်လံၤပိးလီတဖၣ်လၢ ခိၣ်သူအဂီၢ်န့ၣ်, တမ့ၢ်လၢ ကဟဲစိာ်န့ၢ်ပှၤသးအတၢ်မုာ်တၢ်ပၢၤ အဂၢၢ်အကျၢၤဘၣ်န့ၣ် ပသ့ၣ်ညါဝဲဘၣ်ဆၣ်, မ့မ့ၢ်ဟီၣ်ခိၣ်လၢအိၣ်ပှဲၤဒီးတၢ်ဆီၣ်သနံးတဖၣ်အပူၤ, လၢတၢ်ကမၤဖှံထီၣ်ပသး တစိာ်တလီၢ်ဖိအဂီၢ်န့ၣ် ပစူးကါအီၤ တလီၢ်လီၢ်န့ၣ်လီၤ.

နီၢ်နီၢ်န့ၣ်, သးအတၢ်မုာ်တၢ်ပၢၤန့ၣ် တအိၣ်ဟဲဝဲဒၣ်လၢတၢ်တမံၤမံၤဘၣ်. မ့မ့ၢ်အိၣ်ဟဲဝဲဒၣ်လၢ ပှၤတဂၤဂၤအအိၣ်န့ၣ်လီၤ. ပှၤစူၢ်က့ၤနာ်က့ၤ ကစၢ်ယ့ၣ်ရှူး လၢဝ့ၢ်ရိမ့ၤတဖၣ်အဂီၢ်, ရိမ့ၤ ၅:၁ အပူၤန့ၣ် စီၤပီလူး ဟ့ၣ်ဂံၢ်ဟ့ၣ်ဘါ, ဒီးဒုးသ့ၣ်နီၣ်က့ၤ အဝဲသ့ၣ်လၢ “မၤသးဒ်န့ၣ်ဒီး, တၢ်ပာ်တီပာ်လိၤပှၤလၢ တၢ်နာ်သတးဒီး, ပဃူပဖိးဒီးယွၤလၢပကစၢ် ယ့ၣ်ရှူးခရံာ်အဃိ” န့ၣ်လီၤ. တၢ်ဒဲးဘး မၤလီၤဖးပှၤဒီးကစၢ်ယွၤဘၣ်ဆၣ်, လၢတၢ်ပျၢ် ပတၢ်ဒဲးဘးအဂီၢ် ကစၢ်ခရံာ် လုၢ်ထီၣ်အသးသမူန့ၣ်, ဒုးအိၣ်ထီၣ်ကျဲလၢ ပကရ့လိာ်သးဒီးပၢ်ကစၢ်ယွၤ (:၉-၁၀) အဂီၢ်န့ၣ်လီၤ. မ့ၢ်လၢ “တၢ်ပာ်တီပာ်လိၤပှၤလၢတၢ်နာ်” (:၁),
“တၢ်မုၢ်လၢ် ယွၤအလၤကပီၤ” (:၂), ဒီးလၢဟီၣ်ခိၣ်အတၢ်နးတၢ်ဖှီၣ်အပူၤဒၣ်လဲာ်, ပအိၣ်ဒီးတၢ်မုၢ်လၢ် (:၃-၄) အဃိ, သးအတၢ်မုာ်တၢ်ပၢၤလၢ ကစၢ်ယ့ၣ်ရှူး ကတဲာ်ကတီၤန့ၢ်ပှၤန့ၣ် မ့ၢ်ဝဲဒၣ်လၢမုၢ်တနံၤအံၤအဂီၢ်, ဒီးလၢတၢ်လီၤထူလီၤယိာ်အဂီၢ်န့ၣ်လီၤ. တၢ်အိၣ်ဃူအိၣ်ဖိး လိာ်သးဒီးကစၢ်ယွၤစံးတၢ်န့ၣ် ဒိၣ်န့ၢ်ယိာ်န့ၢ်ဒံး ပသးကလၢၢ်ဘၣ်တၢ်တမံၤမံၤ- ဒီးမ့ၢ်ဝဲဒၣ်
တၢ်ဟ့ၣ်တမံၤ, ခီဖျိလၢပစူၢ်က့ၤနာ်က့ၤ ကစၢ်ယ့ၣ်ရှူးအဃိ, ပဒိးန့ၢ်ဘၣ်အီၤန့ၣ်လီၤ. ဖဲပသးကလၢၢ်ဘၣ်တၢ်လၢ ပအိၣ်ဘူးဒီးကစၢ်ယွၤမ့ၢ်ဂ့ၤ, တအိၣ်ဘူးမ့ၢ်ဂ့ၤန့ၣ်, လၢတၢ်မၤဃံမၤလၤက့ၢ်ဂီၤအကျး, (မ့) လၢတၢ်ဆါဟံၣ်, ဖဲလၢတၢ်အိၣ်ဘှ့ၣ်အီၣ်ဘှီၣ်အဆၢကတီၢ်, ဒီးလၢတၢ်သဘံၣ်ဘုၣ်ပံာ်ပုာ်အဆၢကတီၢ်တဖၣ်အပူၤန့ၣ် ပဒိးန့ၢ်သ့ဝဲဒၣ် ကစၢ်ယွၤ အတၢ်ဃူတၢ်ဖိးန့ၣ်လီၤ.