လၢနိရၣ်အဂီၢ်, အဝၤ လဲၤပူၤကွံာ်ဟီၣ်ခိၣ်န့ၣ် မ့ၢ်လၢအတၢ်အိၣ်မူ ဆီတလဲအသး အကတီၢ်န့ၣ်လီၤ. နိရၣ် ဘၣ်ဟံးထီၣ်ဖီၣ်ထီၣ် အဝၤ ခီၣ်ဖၠူထၢၣ် ဟး(ဒ)ဝဲ (hardware) အတၢ်ဖံးတၢ်မၤ, ဒီးဘၣ်ကွၢ်ထွဲ အဖိသၢဂၤ လၢအနီၢ်ကစၢ်ဒၣ်ဝဲ
န့ၣ်လီၤ. အတံၤသကိးတဖၣ် စံးဘၣ်အီၤလၢ “ပာ်ဆူၣ်နသး” တလီၢ်လီၢ်န့ၣ်လီၤ. ဘၣ်ဆၣ်, နိရၣ် ဆိကမိၣ်ထီၣ်ဝဲ “ပာ်ဆူၣ်နသး” စံးတၢ်န့ၣ် ကမ့ၢ်တၢ်အခီပညီ မနုၤလဲၣ်. မ့ၢ်ယကဘၣ်မၤလၢပှဲၤ မူဒါတၢ်ဖံးတၢ်မၤတဖၣ် လၢတၢ်လီၤတူၢ်လီၤကာ် အသုတအိၣ်ဘၣ်အပူၤဧၣ်” န့ၣ်လီၤ.

ကစၢ်ယွၤ ဟ့ၣ်လီၤမူဒါဖးဒိၣ်ဆူ စီၤဧိၤသန့လး ဖဲလၢပှၤအံၣ်စရ့လးဖိ အတၢ်အိၣ်အသးမၤအသးတဖၣ် ဆီတလဲအသးအကတီၢ်န့ၣ်လီၤ. မ့ၢ်လၢအပှၤဂီၢ်မုၢ် ဘူၣ်ထီၣ်ဘါထီၣ် တၢ်ဂီၤတၢ်ဖီၣ်အဃိ, ဒ်သိးကစံၣ်ညီၣ်အဝဲသ့ၣ်အဂီၢ်, ကစၢ်ယွၤ ဆါကွံာ်ပှၤအံၣ်စရ့လးဖိဆူ “မ့းစပတၤမံ အစီၤပၤ ကူရှၣ်-ရံးရှၤသဲၣ်အစုပူၤ, ဒီး ပှၤအံၣ်စရ့လးဖိမၤ စီၤကူရှၣ်-ရံးရှၤသဲၣ် အတၢ်န့ၣ် ဃိးနံၣ်လီၤ” (စံၣ်ညီၣ် ၃:၈). အဆၢဖိ ၉ ပာ်ဖျါဝဲလၢ မ့းစပတၤမံ အစီၤပၤအၢသီအံၤ အတၢ်ပၢဆှၢအဖီလာ်န့ၣ်, ပှၤအံၣ်စရ့လးဖိတဖၣ် “ကိးထီၣ်ယွၤ,” ဒီး “ယွၤဒုးဆၢထၢၣ် တၢ်အုၣ်က့ၤခီၣ်က့ၤလၢပှၤအံၣ်စရ့လးဖိအဂီၢ်,” န့ၣ်မ့ၢ်ဝဲဒၣ် စီၤဧိၤသန့လး ဒီးအမံၤအခီပညီန့ၣ် မ့ၢ် “ကစၢ်ယွၤအဂံၢ်အဘါ” န့ၣ်လီၤ.

လၢပှၤအံၣ်စရ့လးဖိအကျါ, ဒ်အမ့ၢ် စံၣ်ညီၣ်ကွီၢ် အဆိကတၢၢ်တဂၤအသိး, ခိၣ်နၢ်အိၣ်ဟဲလၢ စီၤဧိၤသန့လး အမဲာ်ညါ, ပှၤလၢကမၤစၢၤအီၤန့ၣ် တအိၣ်ဝဲဒၣ်နီၤတဂၤဘၣ်. သုးခိၣ်သုးနၢ်တဂၤအံၤ, ကဘၣ်နဲၣ်ဆှၢက့ၤ ပှၤအံၣ်စရ့လးဖိတဖၣ် ဒ်သိးကအိၣ်မူအိၣ်ဂဲၤဝဲလၢ တၢ်အၢၣ်လီၤအီလီၤအတၢ်ရ့လိာ်သးဒီးယွၤ. ဒီးကဘၣ်ဒီတဒၢပှၤဂီၢ်မုၢ်လၢ ဒုၣ်ဒါ အစုပူၤန့ၣ်လီၤ. ဘၣ်ဆၣ်, မ့ၢ်လၢ “ယွၤအသးအိၣ်ထီၣ်လၢအလိၤ” (:၁၀) အဃိ, မၤနၢၤဝဲဒၣ်တၢ်န့ၣ်လီၤ. ကစၢ်ယွၤ အဂံၢ်အဘါ ဟံးဃာ်ပၢၤဃာ် စီၤဧိၤသန့လး အတၢ်ကဲခိၣ်ကဲနၢ်အဃိ, “ထံဧိၤကီၢ်ဧိၤန့ၣ် အိၣ်ဘှံးအနံၣ်လွံၢ်ဆံ, ဒီးစီၤဧိၤသန့လးန့ၣ် သံဝဲ” (:၁၁) န့ၣ်လီၤ.

“ပကပာ်ဆူၣ်ပသး” နီၢ်နီၢ် ကသ့ဝဲဒၣ်ဒ်လဲၣ်. တၢ် “ပာ်ဆူၣ်သး” န့ၣ်ကဘၣ်အိၣ်ဟဲခီဖျိလၢ တၢ်သ့ၣ်ညါလီၤက့ၤသး လၢအမ့ၢ် ပတအိၣ်ဒီးဂံၢ်ဘါလၢလၢပှဲၤပှဲၤ, ဒီးခီဖျိတၢ်နာ်သန့ၤသးလၢ ကစၢ်ယွၤ, ဒ်သိးကဟ့ၣ်လီၤပှၤလၢ အတၢ်ဂံၢ်တၢ်ဘါအဂီၢ်န့ၣ်လီၤ. မ့ၢ်လၢယွၤအဘျုးအဖှိၣ် အါလံလၢပဂီၢ်လံ. ဒီးယွၤအစိအကမီၤ လၢထီၢ်ပှဲၤထီၣ်လၢ တၢ်အဂံၢ်စၢ်အဘါစၢ် (၂ ကရံၣ် ၁၂:၉) အပူၤန့ၣ်လီၤ. ကစၢ်ယွၤ အဂံၢ်အဘါ ဖံးတၢ် မၤတၢ်ခီဖျိလၢပတၢ်အိၣ်မူအပူၤ, ထဲယွၤတဂၤဧိၤ မၤဝဲသ့န့ၣ်လီၤ.