တၢ်လိာ်ကွဲဖျၢၣ်သွ့ (Basketball) စးထီၣ်သီအကတီၢ်န့ၣ်, လၢပဟံၣ်ကပၤ တီၤခၢၣ်သးကၠိတဖျၢၣ်န့ၣ် ပှၤလၢအသိၣ်လိနဲၣ်လိဖျၢၣ်သွ့သရၣ်တဂၤ, ဒ်သိးအပှၤလိာ်ကွဲတၢ်ဖိတဖၣ် ကကျဲးစၢးကွံာ်နုာ်လီၤ ဖျၢၣ်သွ့အဂီၢ် ဖျါလၢထဲးဂံၢ်ထဲးဘါ, ဟ့ၣ်ဂံၢ်ဟ့ၣ်ဘါဝဲန့ၣ်လီၤ. အဝဲအိၣ်လၢ တၢ်လိာ်ကွဲပျီအပနိ (sidelines) အကပၤ, ဒီးကိးထီၣ်ဝဲဒၣ် “ကွံာ်နုာ်လီၤ” န့ၣ်လီၤ. လၢတၢ်သးဆူၣ်အပူၤန့ၣ် အပှၤလိာ်ကွဲတၢ်ဖိတဖၣ် ဟ့ၣ်ခီလိာ်သး ဖျၢၣ်သွ့န့ၣ်လီၤ. တၢ်ဃ့ၢ်စိာ်ဖျၢၣ်သွ့စ့ၢ်ကီး မ့ၢ်တၢ်လၢအဝဲသ့ၣ်အဲၣ်ဒိးမၤဝဲန့ၣ်လီၤ. တချုးလၢအပှၤလိာ်ကွဲဖိတဖၣ် မၤဟါမၢ်ဒံးဘၣ် တၢ်သးဒ့ဒီလၢ ကသွီနုာ်လီၤ ဖျၢၣ်သွ့ ဒ်သိးကဒိးန့ၢ် တၢ်သွီနုာ်အဖီးအဂီၢ်န့ၣ် တၢ်လိာ်ကွဲ အကတီၢ် လဲၤပူၤကွံာ်ဝဲတဝာ်လံန့ၣ်လီၤ. ဘၣ်ဆၣ်, ဖဲအဝဲသ့ၣ် ကျဲးစၢးသွီနုာ်လီၤ ဖျၢၣ်သွ့န့ၣ် ဒုးအိၣ်ထီၣ် တၢ်လီၤဆီခဲလၢာ်န့ၣ်လီၤ. ခီဖျိလၢတၢ်ဒိကနၣ်အသရၣ်အကလုၢ်, လၢတၢ်မၤဟါမၢ်ကွံာ် တၢ်သးဒ့ဒီတဖၣ်, ဒီးလၢတၢ်ဂုာ်ကျဲးစၢး သွီနုာ်ဖျၢၣ်သွ့- ကွံာ်သွီနုာ်ဖျၢၣ်သွ့ မ့ၢ်တနုာ်လီၤကိးဘျီဒဲးဒၣ်လဲာ်, တၢ်မၤနၢၤတၢ်န့ၣ် အဝဲသ့ၣ် မၤလိန့ၢ်ဝဲဒၣ်န့ၣ်လီၤ.
ဒ်သိးပကဒိကနၣ်အတၢ်ကိး, လၢတၢ်ဒုးကဲထီၣ် အပျဲၢ်အဘီၣ်တဖၣ်အဂီၢ်, ကစၢ်ယ့ၣ်ရှူးသိၣ်လိပှၤလၢ ပကဘၣ်ပျဲပျၢ်ကွံာ် တၢ်သးဒ့ဒီန့ၣ်လီၤ. ကစၢ်ယ့ၣ်ရှူး တဲနၢ်ပၢၢ်ဝဲဒၣ်လၢ, “ တၢ်ဟ့ၣ်လီၤလံယၤလၢ ကယဲၢ်တၢ်စိတၢ်ကမီၤလၢမူခိၣ်, ဒီးလၢဟီၣ်ခိၣ်ချၢလီၤ. မၤသးဒ်န့ၣ်ဒီး, လဲၤဒုးကဲထီၣ်ပှၤအကလုာ်တဖၣ်ခဲလၢာ်လၢ ယပျဲၢ်ယဘီၣ်တက့ၢ်. ဒီးဘျၢအီၤလၢပၢ်, ဒီးဖိခွါ, ဒီးသးစီဆှံအမံၤအပူၤတက့ၢ်. ဒီးသိၣ်လိသီလိအီၤ, ဒ်သိးအကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သုခဲလၢာ်တက့ၢ်” (မး၂၈:၁၈-၂၀) န့ၣ်လီၤ.
ပမ့ၢ်ဘၣ်စံးကတိၤအီၤလၢ တၢ်ကမၤအသးနီၢ်နီၢ်အပူၤန့ၣ်ဒီး, အခီပညီမ့ၢ်သ့ဝဲဒၣ်လၢ ပကဘၣ်အိၣ်ဟးထီၣ်လၢ ပတၢ်အိၣ်မုာ်အိၣ်ပၢၤအလီၢ်အကျဲ, ဒီးဟ့ၣ်ခီဟ့ၣ်နီၤ တၢ်လၢယွၤမၤတ့ၢ်တၢ်, လၢပတၢ်ဂ့ၢ်တၢ်ကျိၤတဖၣ်အပူၤန့ၣ်လီၤ. မ့တမ့ၢ်ဘၣ်ဒီး, ဒုးနဲၣ်ပာ်ဖျါထီၣ် ကစၢ်ယ့ၣ်ရှူး အတၢ်အဲၣ်ဆူ ပှၤဘၣ်နးဘၣ်ဖှီၣ် လၢနဟံၣ်ခိၣ်ဟံၣ်ဃၢၤတဖၣ်န့ၣ်တက့ၢ်. ဘၣ်ဆၣ်, ပမ့ၢ်ပျဲပျၢ် တၢ်သးဒ့ဒီ, ဒီးပမ့ၢ်ဂုာ်ကျဲးစၢးမၤတၢ်န့ၣ်မး, ကျိၤကျဲဒ်သိးအံၤတဖၣ်န့ၣ်တၢ်မၤကကဲထီၣ်ဝဲဒၣ်န့ၣ်လီၤ.
လၢတၢ်ခဲလၢာ်အဖီခိၣ်, ဖျါလၢ တၢ်ဒုးကဲထီၣ် အပျဲၢ်အဘီၣ်တဖၣ်န့ၣ် ကကီကခဲဝဲဘၣ်ဆၣ်, ပကထဲးဂံၢ်ထဲးဘါ မၤသပှၢ်ပှၢ်လၢ ကစၢ်ယ့ၣ်ရှူး အစိအကမီၤ အပူၤန့ၣ်လီၤ. ဘၣ်ဆၣ်, ကစၢ်ယ့ၣ်ရှူး အၢၣ်လီၤဝဲဒၣ်လၢ, “ဒီးကွၢ်ကွၢ်, ယအိၣ်ဒီးသုကိးမုၢ်နံၤမုၢ်နၤဒဲး, တုၤတၢ်အစိၤကတၢၢ်လီၤ” (:၂၀) အဃိ, ပပျံၤတၢ်အလီၢ်တအိၣ်ဘၣ်.
