ဖဲယလဲၤအိၣ်သကိး မိၢ်တဂၤစိာ်ဖိးဟုဃာ် အဖိအိၣ်ဖျဲၣ်သီဖိလၢ အသးနါပှၢ်အကတီၢ်, ယဆ့ၣ်နီၤယဲလၢ တၢ်ကွၢ်ထွဲ ဖိသၣ်အိၣ်ဖျဲၣ်သီ လ့ၤတုၢ်လ့ၤတီၤအလီၢ် လၢတၢ်ဆါဟံၣ်န့ၣ်လီၤ. လၢတၢ်ကူစါယါဘျါစဲအ့ၣ်အပီးလီတဖၣ် လဲၤထီၣ်လဲၤထီဒိၣ်ဒိၣ်အါအါ အိၣ်ဝဲဒၣ် အတၢ်လီၢ်တတီၢ်အံၤန့ၣ်, ဒ်သိးတၢ်ကမၤဂ့ၤထီၣ် ဖိသၣ်အတၢ်အိၣ်ဆူၣ် အိၣ်ချ့အဂီၢ်, ကသံၣ်သရၣ်တဖၣ် ဟ့ၣ်ကူၣ်ဝဲဒၣ် တၢ်ကူစါယါဘျါအကျိၤကျဲ ညီကဒၣ်ဖိ, ဒီးတၢ်ဟ့ၣ်ကူၣ်အံၤမ့ၢ်ဝဲဒၣ် မိၢ်သီသံၣ်ဘှဲတဂၤအံၤ ကဘၣ်ဟ့ၣ်အါထီၣ် တၢ်ဆါကတီၢ်လၢ ကစိာ်ဖိးဟုဃာ်အဖိမုၣ်ဖိန့ၣ်လီၤ.
လၢတၢ်ကမၤဘျါက့ၤ, မၤမုာ်ထီၣ်က့ၤဖိသၣ်ဖိတဂၤအံၤအဂီၢ်, တၢ်ကဟံးန့ၢ် မိၢ်ပၢ်အတၢ်အဲၣ်, အတၢ်ကဟုကယာ်အလီၢ်န့ၣ် တၢ်အဂၤတအိၣ်ဝဲဒၣ်နီၤတမံၤဘၣ်န့ၣ်လီၤ. တၢ်ထံၣ်ဆိကမိၣ်က့ၢ်ဂီၤ လၢအပှဲၤဒီးတၢ်စိတၢ်ကမီၤဒ်သိးအံၤန့ၣ် ပကထံၣ်ဘၣ်လၢ ဝံယရှါယၤ အတၢ်ကွဲးပာ်ဖျါထီၣ် ကစၢ်ယွၤဒီးအပှၤဂီၢ်မုၢ်တဖၣ် အဂ့ၢ်အပူၤန့ၣ်လီၤ.
ယရှါ ၃၉:၅-၇ အပူၤန့ၣ်, မ့ၢ်လၢပှၤဂီၢ်မုၢ်တဖၣ် လဲၤကပာ်ယွၤအဃိ, ဝံစံးကတိၤ ဆိတ့ၢ်ဝဲလၢ ပှၤအံၣ်စရ့လးဖိတဖၣ် ကဘၣ်တၢ်က့ၤစိာ်မၢကဲကုၢ်ဒၣ်လဲာ်, လၢအမ့ၢ် ကစၢ်ယွၤ အဲၣ်ဝဲဒၣ်အပှၤဂီၢ်မုၢ်အဖၢမုၢ်, ဒီးကမၤစၢၤအဝဲသ့ၣ်ထီဘိအဂ့ၢ်န့ၣ် ဝံယရှါယၤ ဟ့ၣ်ထီၣ်ဝဲဒၣ် တၢ်လၢအကါဒိၣ်လီၤဆီတဖၣ်ဆူ ပှၤအံၣ်စရ့လးဖိတဖၣ်န့ၣ်လီၤ. ယွၤအတၢ်အဲၣ်ကပုာ်လုးဖိ, ဒီးအတၢ်ဒီတဒၢကဟုကယာ်အံၤ နဲၣ်ဖျါအုၣ်အသး ခီဖျိလၢတၢ်ကတိၤက့ၢ်ဂီၤဟ့ၣ်ဒိ, ဖျါဝဲဒၣ်လၢ ယရှါ ၄၀:၁၁ အပူၤ, ဖဲဝံပာ်ဖျါထီၣ် ကစၢ်ယွၤ, ဒ်ပှၤကွၢ်သိတဂၤအသိး, လၢအလီၤဂာ်အါဝဲဒၣ်ဒီးပၢ်လၢအအဲၣ်တၢ်တဂၤ ဟံးယာ်ပၢၤဃာ် အသိတဖၣ် “လၢအစု, ဒီးကစိာ်အီၤလၢအသးနါပှၢ်” န့ၣ်လီၤ.
ကစၢ်ယွၤ အိၣ်ဒီးပှၤန့ၣ် ဟ့ၣ်ပှၤတၢ်ဃူတၢ်ဖိး, ဒီးတၢ်ဒီတဒၢသ့ဝဲဒၣ်, ဒီးဒုးသ့ၣ်နီၣ် ထီၣ်က့ၤပှၤ ဒ်မိၢ်တဂၤစိာ်ဖိးဟုဃာ်ဝဲ အဖိအိၣ်ဖျဲၣ်သီဖိအသိး, ကစၢ်ယွၤ စိာ်ဆှၢပှၤ ဘူးဘူးတံၢ်တံၢ်လၢအသးနါပှၢ်န့ၣ်လီၤ. ဒ်ယရှါ ၄၀:၂၉ ပာ်ဖျါဝဲ “ပှၤလၢအလီၤဘှါန့ၣ် ယွၤဟ့ၣ်ဝဲလၢ အဂံၢ်အဘါလီၤ. ဒီးပှၤလၢအဂံၢ်အဘါ တအိၣ်ဘၣ်န့ၣ် ဒုးဆူၣ်ထီၣ်ဝဲ အဂံၢ်အဘါလီၤ,” အသိး, ဒ်သိးပကလဲၤခီဖျိကွၢ်ဆၢၣ်မဲာ် ပတၢ်ကီတၢ်ခဲ တနံၤဘၣ် တနံၤအဂီၢ်, သးမုာ်စီဆှံ အတၢ်မၤဘျါမၤမုာ်ထီၣ်က့ၤပှၤန့ၣ် ကမၤစၢၤပှၤန့ၣ်လီၤ.
