ပှၤသးဝံၣ်တၢ်, ဒီးပှၤကွဲးတၢ်သးဝံၣ် ကၠ့ ခရ့တၢၣ် မၣ်စူၣ်စကံ (Jane Kristen Marczewski) န့ၣ် ကမျၢၢ်လၢအဟ့ၣ်ဂံၢ်ဟ့ၣ်ဘါအီၤတဖၣ် (Fans) သ့ၣ်ညါအီၤလၢ ထိၣ်မုၢ်နၤ (Night Bride) န့ၣ်လီၤ. ဖဲ ၂၀၂၁ နံၣ်န့ၣ် ဒိးန့ၢ်ဝဲဒၣ် တၢ်ဒုးနဲၣ် တၤလၣ်ပြၢ အခိၣ်ဖးလၢ ကွဲၤထံၣ်ဟူ လၢပှၤမုာ်လၤဘၣ်သူၣ်ဘၣ်သး (Popular TV Talent Show) အတၢ်ရဲၣ်တၢ်ကျဲၤန့ၣ်လီၤ. ဖဲ ၂၀၁၇ နံၣ် တၢ်ဃုထံၣ်န့ၢ် နုၢ် ခဲစၢၣ် (breast cancer) အတၢ်ဆါ အပတီၢ် ၃ လၢအီၤန့ၣ်လီၤ. အတၢ်ဆါန့ၣ် ဂ့ၤထီၣ်က့ၤဝဲဒၣ် ဖဲ ၂၀၁၈ နံၣ်န့ၣ်လီၤ. အဝဲစးထီၣ်လဲၤဟးလိာ်ကွဲဆူ တၢ်လီၢ်အါတီၤဘၣ်ဆၣ်, စှၤလါပူၤကွံာ်န့ၣ်ဒီး, အတၢ်ဆါန့ၣ်နးဒိၣ်ထီၣ်တုၤလၢ, ကအိၣ်မူဝဲအဂီၢ်, ခွဲးယာ်အိၣ်ဒၣ်တဆံးတက့ၢ်န့ၣ်လီၤ. လၢတၢ်လီၤကမၢကမၣ်အပူၤန့ၣ်, အဝဲဘျါက့ၤဝဲ, ဒီးအခဲစၢၣ်တၢ်ဆါတအိၣ်လၢဘၣ်န့ၣ်လီၤ. ဘၣ်ဆၣ်, ထိၣ်မုၢ်နၤ (Nightbirde) သံဝဲဒၣ် ဖဲ လါဖ့ၤဘြူၤအါရံၤ (၁၉) သီ , ၂၀၂၂ နံၣ်န့ၣ်လီၤ.

လၢအသးသမူ အတၢ်လဲၤအကီအခဲအကတီၢ်, လၢအတၢ်ရ့လိာ်ဘၣ်ထွဲ ပှာ်ဘျးစဲအလိၤန့ၣ် အဝဲကွဲးပာ်ဖျါဝဲဒၣ် “ယဟ့ၣ်ပလီၢ်ယသးလၢ ယကဃ့ထုကဖၣ် ယွၤလၢအမၢ ပှၤအံၣ်စရ့လးဖိတဖၣ် ဟးဝ့ၤဝီၤဝဲ နံၣ်လၢအဆံတဖၣ်အပူၤန့ၣ်လီၤ. ဒ်သိးကတုၤဃီၤဝဲဒၣ်အဂီၢ် အဝဲသ့ၣ်ဃ့ကညးဝဲဘၣ်ဆၣ်, လၢအလီၢ်န့ၣ် ပှၤဂီၢ်မုၢ်တဖၣ် ဘၣ်ဟးဝ့ၤဝီၤဝဲ, ဒီးယွၤစံးဆၢ တၢ်ထုကဖၣ်လၢအဝဲသ့ၣ်တဃ့ဝဲတဖၣ်န့ၣ်လီၤ. ကစၢ်ယွၤ ကတဲာ်ကတီၤန့ၢ် တၢ်သးကညီၤအကိၣ်လၢမူခိၣ် ကိးမုၢ်ဂီၤဒဲးန့ၣ်လီၤ. ယလူၤကွၢ်ဃု တၢ်သးကညီၤအကိၣ်, ဒီးပှၤအံၣ်စရ့လးဖိတဖၣ် ကိးဝဲလၢ ကိၣ်မၤနၤ, ဒီးအခီပညီန့ၣ် “တၢ်အံၤမ့ၢ်တၢ်မနုၤလဲၣ်” န့ၣ်လီၤ. တၢ်အံၤမ့ၢ်စ့ၢ်ကီး တၢ်သံကွၢ်တမံၤဃီ, လၢယသံကွၢ်ယဲ……. တၢ်သးကညီၤန့ၣ် ကအိၣ်ဝဲဒၣ် ဖဲတၢ်လီၢ်တတီၤတီၤန့ၣ်လီၤ. ဘၣ်ဆၣ်, တၢ်အံၤမ့ၢ်တၢ်မနုၤလဲၣ်.

၂ မိၤရှ့ ဒုးနဲၣ်ပာ်ဖျါဝဲဒၣ် ယွၤအတၢ်သးကညီၤအဂ့ၢ် ဒိၣ်ဒိၣ်အါအါန့ၣ်လီၤ. ယွၤအတၢ်သးကညီၤ အခီၣ်ထံးတထံၣ်န့ၣ် မ့ၢ်အတၢ်အၢၣ်လီၤ ပှၤအံၣ်စရ့လးဖိတဖၣ်လၢ “သုကအီၣ်ဘျဲးအီၣ်ကိၣ်” (၂ မိၤ၁၆:၁၂) န့ၣ်လီၤ. ယွၤအတၢ်သးကညီၤ ခံထံၣ်တထံၣ်, လၢအမၤကမၢကမၣ်ပှၤန့ၣ် “မ့ၢ်မနုၤမနုၤန့ၣ် တသ့ၣ်ညါဘၣ်ဝဲဘၣ်” (:၁၅) န့ၣ်လီၤ. ဘၣ်တဘျီဘျီ, တၢ်သးကညီၤန့ၣ် တမ့ၢ်ဝဲဒၣ် ဒ်ပဆိကမိၣ်တ့ၢ်ဝဲအသိးဘၣ်ဆၣ်, မ့ၢ်ဝဲဒၣ်တၢ်သးကညီၤအဖၢမုၢ်န့ၣ်လီၤ. လၢပှၤအံၣ်စရ့လးဖိတဖၣ်အဂီၢ်, တၢ်သးကညီၤန့ၣ် ကလီၤဂာ်ဝဲ ဒ်ကိၣ်မၤနၤလၢမုၢ်ဂီၤအသိးန့ၣ်လီၤ. မ့မ့ၢ်ယၣ်လုးဖိလၢ အတံၤသကိးဟ့ၣ်အီၤ, ဒီးအမိၢ်အစုဖိတဖၣ်န့ၣ် မ့ၢ်ဝဲဒၣ်တၢ်သးကညီၤလၢ ထိၣ်မုၢ်နၤအဂီၢ်န့ၣ်လီၤ.