ဖဲ ၂၀၂၄ နံၣ် အိၣ်လၣ်ပ့း တၢ်ဂဲၤလိာ်ကွဲပြၢ (Olympics) လၢဝ့ၢ် ပဲရ့း(စ) (Paris) န့ၣ် ဒ်ညီနုာ်မၤတ့ၢ်ဝဲအသိး, ခ့ထံၣ် လဒၢးကံၣ် (Katie Ledecky) ပီၢ်ပြၢဝဲဒၣ်ထံ တဝီၤဝံၤတဝီၤ, လၢ မံထၢၣ် ၁၅၀၀ တၢ်ပီၢ်ထံ အတၢ်ပြၢလၢအတအိၣ်ဒီးတၢ်ဖီၣ်ဃံး (Freestyle race) န့ၣ်လီၤ. အဝဲပီၢ်ပြၢထံဝံၤဝဲဒၣ် တၢ်ဆၢကတီၢ်ဆိန့ၢ် ပှၤပြၢတၢ်ဖိအဂၤတဖၣ် ၁၅ မံးနံး, ဒီးလၢအသးပူၤန့ၣ် ဆိကမိၣ်ထီၣ်ဝဲဒၣ်ထဲတဂၤဧိၤန့ၣ်လီၤ. လၢတၢ်ပီၢ်ပြၢထံဖးယံာ်ဖးထီတဘျီအံၤ ဒီတကတီၢ်န့ၣ် မ့ၢ် လဒၢးကံၣ် ဆိကမိၣ်ဝဲတၢ်မနုၤလဲၣ်. လၢတၢ်ပီၢ်ပြၢထံတဘျီအံၤန့ၣ် လဒၢးကံၣ် ဒုးအိၣ်ထီၣ် တၢ်ကွဲးနီၣ်ကွဲးဃါအသီ (New Record), ဒီးဖဲအဝဲ တူၢ်လိာ်ဟံးန့ၢ် တၢ်မၤလၤကပီၤ ခိၣ်ဖးထူကဘျၣ်ဝံၤ, တကီၢ်ခါန့ၣ် ပိာ်ထွဲထီၣ်အခံဒီးတၢ်သံကွၢ်စံးဆၢအကတီၢ်န့ၣ် လဒၢးကံၣ် စံးဝဲဒၣ်လၢ တၢ်ပီၢ်ပြၢထံအကတီၢ်န့ၣ် ဆိကမိၣ်ဝဲအတံၤသကိးတဖၣ်လၢ အမၤလိပီၢ်သကိးထံတဖၣ်အမံၤန့ၣ်လီၤ.
တၢ်ကဘၣ်ပညိၣ်ပာ်ဖှိၣ် သးအတၢ်ဆိကမိၣ်အဂ့ၤအဘၣ်န့ၣ် တမ့ၢ်ဝဲဒၣ်ထဲလၢ ပှၤပီၢ်ထံတၢ်ဒ့ၣ်စၢၤအယံၤတဖၣ်န့ၣ်ဘၣ်. ဒ်ပမ့ၢ်ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်စ့ၢ်ကီး, ပကဘၣ်ပၢၤဃာ် ပသးအတၢ်ဆိကမိၣ်တဖၣ် လၢပတၢ်စူၢ်တၢ်နာ်အတၢ်လဲၤအပူၤန့ၣ်လီၤ.
တၢ်မၢဖိစီၤပီလူး ဟ့ၣ်ဂ့ၢ်ဟံၣ်ဘါ ဖံလံးပံး အတၢ်အိၣ်ဖှိၣ် “သးခုလၢကစၢ်အပူၤ တဘိယူၢ်ဃီတက့ၢ်…., သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ် လၢတၢ်ထုကဖၣ်….အပူၤန့ၣ် ဘိးဘၣ်သ့ၣ်ညါယွၤ” (ဖံလံး ၄:၄,၆) န့ၣ်လီၤ. တၢ်အစၢကမ့ၢ်ဝဲဒၣ် “ယွၤအတၢ်ဃူတၢ်ဖိးလၢအဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသး, ဒီးသုဆိကမိၣ်တၢ်လၢ ယ့ၣ်ရှူးခရံာ်အပူၤ (:၇) န့ၣ်လီၤ. ဒ်သိး ပကပာ် ပတၢ်ဘၣ်ယိၣ်ဘၣ်ဘီတဖၣ်, ဒီးတၢ်ကီတၢ်ခဲတဖၣ်လၢ တၢ်ထံၣ်အဂ့ၤအဘၣ်အဂီၢ်, ကစၢ်ယ့ၣ်ရှူး, တၢ်ဃူတၢ်ဖိးအကစၢ်, ကမၤစၢၤပှၤန့ၣ်လီၤ.
စီၤပီလူး ဟ့ၣ်ဂံၢ်ဟ့ၣ်ဘါစ့ၢ်ကီး ပှၤစူၢ်က့ၤနာ်က့ၤတၢ်ဖိတဖၣ်လၢ, “ဖဲဒၣ်တၢ်မ့ၢ်တၢ်တီ, ဖဲဒၣ်တၢ်လၤတၢ်ကပီၤ, ဖဲဒၣ်တၢ်တီတၢ်လိၤ, ဖဲဒၣ်တၢ်စီတၢ်ဆှံ, ဖဲဒၣ်တၢ်လၢတၢ်အဲၣ်အီၤ, ဖဲဒၣ်တၢ်ဟူထီၣ်သါလီၤလၢအဂ့ၤသ့ၣ်တဖၣ်, တၢ်ဂ့ၤဝါလၤကပီၤမ့ၢ်အိၣ်, ဒီးတၢ်စံးထီၣ်ပတြၢၤမ့ၢ်အိၣ်, ဒီးဆိကမိၣ်လၢတၢ်တဖၣ်န့ၣ်အဂ့ၢ်အကျိၤတက့ၢ်” (:၈) န့ၣ်လီၤ.
လၢပတၢ်အိၣ်မူ တနံၤဘၣ်တနံၤအပူၤန့ၣ်, မ်ပကပလီၢ်သူၣ်ပလီၢ်သးလၢ ပသးအတၢ်ဆိကမိၣ်တဖၣ်န့ၣ်တက့ၢ်. ဖဲပထံၣ်ယွၤအစု မၤတၢ်လၢပတၢ်အိၣ်မူအပူၤန့ၣ်ဒီး, ပဂံၢ်ထီၣ် ပတၢ်ဆိၣ်ဂ့ၤတဖၣ်, ဒီးဘူၣ်ထီၣ်ဘါထီၣ်အီၤသ့ဝဲဒၣ်န့ၣ်လီၤ.
