လၢတၢ်သးဃံၢ်ဃူအဲၣ်ဒိးသ့ၣ်ညါတၢ်အပူၤ, ယလဲၤကွၢ် တၢ်ဒုးနဲၣ် တၢ်သ့ၣ်နီၣ်ထီၣ် ၉/၁၁ အတၢ်သူၣ်အုးသးအုးအဂီၢ်, တၢ်ကွၢ်ကီလီၢ် အတၢ်သူၣ်ထီၣ်လၢ ဝ့ၢ်နယူယီး (New York) ဘၣ်ဆၣ်, ယသးပူၤတၢ်လၢယတူၣ်ဘၣ်ခီၣ်ဘၣ်တဖၣ်န့ၣ် ယပၢၤဃာ်ယဲဒၣ်န့ၣ်လီၤ. ယတၢ်ပၢၤသူၣ်ပၢၤသးန့ၣ် ဆီတလဲအသး ဖဲယနုာ်လီၤဆူ တၢ်ဒုးနဲၣ် အဒၢးလၢ အဘၣ်တၢ်ပာ်တဒၢအီၤလၢ ပှၤဘၣ်မူဘၣ်ဒါတဖၣ် ဒ်သိးပှၤဖိသၣ်တဖၣ်, ဒီးပှၤလၢအတအဲၣ်ဒိးထံၣ် တၢ်သူၣ်အုးသးအုးအဂ့ၢ်တဖၣ် အသုတထံၣ်ဘၣ် တၢ်ဂီၤတဖၣ် လၢအမၤဘၣ်ဒိဘၣ်ထံပှၤသူၣ်ပှၤသးအဂီၢ်န့ၣ်လီၤ. ဒ်ယထံၣ်ဘၣ်တၢ်ဂ့ၢ်တမံၤဘၣ်တမံၤ, လၢအမၤဘၣ်ဒိပသး, ဒီးတၢ်လီၤမၢ်တဖၣ်ဝံၤန့ၣ်ဒီး, တၢ်သူၣ်အုးသးအုး အလပီတဖၣ် အိၣ်ဟဲထီၣ်ဝဲဒၣ် လၢယသးပူၤန့ၣ်လီၤ.
ဖဲပထံၣ်ဘၣ် (မ့) ဖဲပသ့ၣ်နီၣ် တၢ်မၤဟးဂီၤ, ဒီးတၢ်ဘၣ်ဒိဆါ ဒ်သိးအံၤတဖၣ်န့ၣ်ဒီး, ပနုာ်လီၤပာ်ဖှိၣ်လိာ်ပသးဒီးပှၤလၢအဟီၣ်ကိးပာ်ဖျါထီၣ် တၢ်သူၣ်အုးသးအုးတဖၣ်ဆူ ယွၤအအိၣ်သ့ဝဲဒၣ်န့ၣ်လီၤ. တၢ်ပာ်ဖျါအံၤပာ်ဃုာ်ဒီး တၢ်သူၣ်ကိၢ်သးဂီၤ အတၢ်ကတိၤ ဆူၣ်ဆူၣ်ကိၤကိၤတဖၣ် ဖျါဖဲလံာ်သးသယုၢ်တၢ်အပူၤ, ဒီးယွၤဂ့ၢ်ပီညါ အပှၤသ့လံာ်သ့လဲၢ်တဖၣ် နာ်ဝဲဒၣ်လၢ ဝံယံးရမံယၤ ကွဲးတ့ၢ်ဝဲလံာ်တဘ့ၣ်အံၤ, ဖဲဝ့ၢ် ယရူၤရှလ့ၣ် ဘၣ်တၢ်မၤဟးဂီၤဝံၤအလီၢ်ခံန့ၣ်လီၤ. ထါတယုၢ်အံၤ ဘၣ်တၢ်ကွဲးအီၤလၢ က့ၢ်ဂီၤဂ့ၤဂ့ၤဘၣ်ဘၣ်, ဒီး သးသယုၢ် ၁:၂၀ န့ၣ် ဝံ ပာ်ဖျါထီၣ် အတၢ်သူၣ်အုးသးအုး, အတၢ်ကအုကစွါလၢ ယွၤ အပှၤဂီၢ်မုၢ်တဖၣ် အတၢ်နးတၢ်ဖှီၣ်အဂ့ၢ်, ဒီးစံးဝဲဒၣ်လၢ “ကွၢ်လီၤတက့ၢ်ယွၤဧၢ, အဂ့ၢ်ဒ်အံၤ, ယဘၣ်တၢ်ကိၢ်တၢ်ဂီၤလီၤ. ယသးတမုာ်ဘၣ်. ယသးကဒံကဒါလၢယပူၤ” န့ၣ်လီၤ. ဘၣ်ဆၣ်, ဝံကွၢ်ထီၣ်ဝဲဆူ ယွၤအအိၣ်, ဒ်စံၣ်ညီၣ်ကွီၢ်အတီအလိၤတဂၤအသိး, ဒီးသ့ၣ်ညါဝဲလၢ ထဲဒၣ်ယွၤတဂၤဧိၤ ဘှါဆှဲတၢ်ဒဲးဘး, ဒီးတၢ်ဟးဂူာ်ဟးဂီၤတဖၣ် သ့ဝဲဒၣ်အဃိ, စံးဝဲဒၣ်လၢ “မ်အတၢ်ဒဲးဘးခဲလၢာ် ဟဲထီၣ်ဆူ နမဲာ်ညါတက့ၢ်” (:၂၂) န့ၣ်လီၤ.
တၢ်ကိးပသူထီၣ် အတီအလိၤဆူ ယွၤအအိၣ်ဒ်သိးအံၤန့ၣ် ကမၤစၢၤပှၤလၢ တၢ်ဃုထံၣ်န့ၢ် ကျိၤကျဲလၢပကမၤနၢၤ တၢ်ဘၣ်ဒိဆါအၢအၢသီသီ အိၣ်ဟဲကဲထီၣ်အသး ဖဲ ၂၀၀၁ နံၣ်, လါစဲးပထ့ဘၢၣ် (၁၁) သီ, (မ့) တၢ်မၤအၢမၤသီတၢ်အဂုၤအဂၤတဖၣ်လၢ ခ့ခါအကတီၢ်န့ၣ်လီၤ. လၢတၢ်မၤစၢၤအဂီၢ်, လၢတၢ်မုၢ်လၢ်အဂီၢ်, လၢတၢ်မၤမုာ်ထီၣ်က့ၤ, ဒီးလၢတၢ်တီတၢ်လိၤအဂီၢ်, ပကွၢ်ထီၣ်ဆူ ယွၤအအိၣ်န့ၣ်လီၤ.
