ဖဲယတံၤသကိး ခီနၢၣ် (Connor) ဒိဝဲတၢ်ဂီၤ လၢအခဲမရၣ်လီၢ်လံၤအကတီၢ်, ဒ်သိးကဒိးန့ၢ်တၢ်ကပီၤ, တၢ်မၤဆှဲ တၢ်မဲာ်သူမဲာ်ဂီၤ, ဒီးတၢ်ထူးစီကွံာ် တၢ်လၢပကွၢ်တမုာ်တလၤတဖၣ်အဂီၢ်န့ၣ် တမၤတံာ်တာ်အသးဘၣ်. အတၢ်ဂီၤတဖၣ် လိၣ်ဘၣ်ဝဲလၢ တၢ်ကဘှီဂ့ၤမၤဂ့ၤထီၣ်ဝဲဒၣ်န့ၣ်လီၤ. လၢယတၢ်ရ့လိာ်မုာ်လိာ် ပှာ်ဘျးစဲအလိၤန့ၣ် အတၢ်ဂီၤတဖၣ်ဖျါလီၤဆီဝဲဒၣ်လၢ ပှၤကညီလၢအဒိၣ်တၢ်ဂ့ၤ, ဒီးတၢ်လီၢ်တၢ်ကျဲ အဃံအလၤအဂီၤတဖၣ်လၢ ဘၣ်တၢ်ဘှီဂ့ၤမၤဂ့ၤအီၤတဖၣ်အကျါန့ၣ်လီၤ. ခီနၢၣ် အတၢ်ဂီၤတဖၣ် တမ့ၢ်ဝဲဒၣ် ဒ်ညီနုၢ်ပှၤဒိအီၤအသိးဘၣ်ဆၣ်, မ့ၢ်လၢ တၢ်ဂီၤတဖၣ် ပာ်ဖျါထီၣ် အတၢ်မ့ၢ်တၢ်နီၢ်နီၢ်အဃိ, အတၢ်ဂီၤတဖၣ်န့ၣ် ဖျါဂ့ၤဝဲဒၣ်န့ၣ်လီၤ.
ပဝဲကိးဂၤဒဲး, ပသးဆၢမိၣ်န့ၢ် တၢ်လၢအမ့ၢ်တၢ်နီၢ်နီၢ်န့ၣ်လီၤ. ဘၣ်ဆၣ်, ဘၣ်တဘျီဘျီန့ၣ် တၢ်အမ့ၢ်အတီတဖၣ် တထုးန့ၢ်ဝဲဒၣ်ပသးဘၣ်န့ၣ်လီၤ. ဘူးထီၣ်လၢ ကစၢ်ယ့ၣ်ရှူး ကဘၣ်သံဝဲန့ၣ်, ဘိးဘၣ်သ့ၣ်ညါဝဲဒၣ်, “ယမ့ၢ်….တၢ်မ့ၢ်တၢ်တီ” (ယိၤ ၁၄:၆) န့ၣ်လီၤ. အပျဲၢ်အဘီၣ်တဖၣ် အဲၣ်ဒိးသ့ၣ်ညါဝဲလၢ ကလဲၤနုာ်လီၤဘၣ်ဝဲဆူ တၢ်လၢ ကစၢ်ယ့ၣ်ရှူး ဆၢမုၢ်လၢ်ပာ်ဖျါဝဲ, ဆူပၢ်အဟံၣ်ဒ်လဲၣ် (:၂-၃) န့ၣ်လီၤ. ကစၢ်ယ့ၣ်ရှူး လၢအဂဲၤဆၢထၢၣ်သမူထီၣ်က့ၤ, လၢအဝဲသ့ၣ် အမဲာ်ညါတဂၤ, မ့ၢ်တၢ်စံးဆၢလီၤန့ၣ် အပျဲၢ်အဘီၣ်တဖၣ် တသ့ၣ်ညါဝဲဘၣ်န့ၣ်လီၤ. ဒ်သိး အဝဲသ့ၣ် ကနၢ်ပၢၢ်ဝဲဒၣ် ကစၢ်ယ့ၣ်ရှူး ကဟဲစိာ်တၢ်မၤနၢၤ ခီဖျိလၢအတၢ်ဒိးသံအသးအဂ့ၢ်န့ၣ် ဘၣ်ဂုာ်ကျဲးစၢးဃုနၢ်ပၢၢ်ဝဲသပှၢ်ပှၢ်န့ၣ်လီၤ.
ဝံယရှါယၤ တဲဆိတ့ၢ်ဝဲဒၣ် မ့းရှံအၤ လၢအကဟဲတဂၤအံၤ တအိၣ်ဒီး တၢ်ဃံတၢ်လၤ (မ့) တၢ်လၤတၢ်ကပီၤဘၣ်န့ၣ်, ယရှါ ၅၃:၂ ပာ်ဖျါဝဲလၢ “တအိၣ်ဘၣ်ဒီးအက့ၢ်အဂီၤဘၣ်, ဒီးတအိၣ်ဘၣ်ဒီးအဃံအလၤဘၣ်. ဒီးတုၤပထံၣ်အီၤဒီး, အဃံအလၤလၢ အဘၣ်ပမဲာ်န့ၣ် တအိၣ်ဘၣ်” န့ၣ်လီၤ. ကစၢ်ယ့ၣ်ရှူး စံးကတိၤဝဲတဖၣ်အါတက့ၢ်န့ၣ် မ့ၢ်တၢ်လၢပှၤကနၢ်ပၢၢ်အီၤကီ, ဒီးမ့ၢ်တၢ်လၢ ပှၤတမုၢ်လၢ်တဖၣ်အဃိ, တၢ်ဘူၣ်တၢ်ဘါခိၣ်နၢ်တဖၣ် ထီဒါအီၤ (ယိၤ ၁၁:၄၅-၄၈) န့ၣ်လီၤ. နီၢ်နီၢ်န့ၣ်, ဒ်သိးဒီးပှၤကိးဂၤဒဲး ကသ့ၣ်ညါ တၢ်မ့ၢ်တၢ်တီနီၢ်နီၢ်, ဒီးဃုထံၣ်န့ၢ်တၢ်မူနီၢ်နီၢ်အဂီၢ်, ကစၢ်ကွဲမုာ်ဝဲဒၣ်န့ၣ်လီၤ. ယိၤ ၁၄:၇ ပာ်ဖျါဝဲလၢ “သုမ့ၢ်သ့ၣ်ညါယၤဒီး, သုသ့ၣ်ညါယပၢ်စ့ၢ်ကီး” န့ၣ်လီၤ. ဟီၣ်ခိၣ်လၢ အဘၣ်တၢ်မၤဟါမၢ်, ဒီးပာ်တဒၢတၢ်တဂ့ၤတဝါတဖၣ်, ဒီးလၢအတမ့ၢ် တၢ်နီၢ်နီၢ်အပူၤန့ၣ်, မုၢ်တနံၤအံၤ, ပဖိးဟုဃာ် တၢ်မ့ၢ်တၢ်တီလၢအတဘၣ်တၢ်မၤဂ့ၤအီၤ, ဒီးအဃံအလၤတမံၤအံၤ သ့ဝဲဒၣ်န့ၣ်လီၤ.
