ထွံၣ်မံၤ ဟၣ်ယ့နၢး(စ) (Hyenas) တဖၣ် ကဝီၤဃာ် ခ့ယူၢ်မိၢ် လၢအိၣ်ဝဲထဲတဒုဧိၤန့ၣ်လီၤ. ဖဲဆၣ်ဖိကီၢ်ဖိအအၢတဖု စးထီၣ်ဒုးအီၤန့ၣ်ဒီး, ခ့ယူၢ်မိၢ်တဒုအံၤ တြီဆၢဒုးဆၢက့ၤဝဲဒၣ်န့ၣ်လီၤ. တၢ်အ့ၣ်အီၤ, တၢ်ဝာ်ဖှီယာ်အီၤ, ဒီးတၢ်ကညီၤရုၢ်ရုၢ်အပူၤန့ၣ် ဂုာ်ကျဲးစၢးမၤဆၢက့ၤဒုၣ်ဒါတဖုအံၤဘၣ်ဆၣ်, အကတၢၢ်န့ၣ် ခ့ယူၢ်မိၢ်အံၤ ဘၣ်ဟ့ၣ်လီၤအသးန့ၣ်လီၤ. ဖဲဒုၣ်ဒါတဖုအံၤ ကဝီၤအ့ၣ်အီၤအဆၢကတီၢ်န့ၣ်ဒီး, ခ့ယူၢ်မိၢ်အဂၤတဒု ဟဲတုၤဃီၤဝဲဃုာ်ဒီးခ့ယုၢ်အဂၤခံဒု, ဒ်သိးကမၤစၢၤအုၣ်က့ၤခီၣ်က့ၤအီၤအဂီၢ်န့ၣ်လီၤ. နီၣ်ဂံၢ်မ့ၢ်တအါဘၣ်ဆၣ်, သၣ်မံယီၤမိၢ်ဖးဒိၣ်တဖၣ်အံၤ ဒုးဆၢက့ၤ ဒုၣ်ဒါတဖၣ် တုၤလၢအလီၤပြံၤပျါ ဃ့ၢ်ဟးဖျိးကွံာ်ဝဲန့ၣ်လီၤ. ခ့ယူၢ်မိၢ်တဖၣ် ဂဲၤဆၢထၢၣ်သဃဲၤလိာ်သး, ကွၢ်ထံကွၢ်ဆးဝဲ တၢ်လီၢ်ကဝီၤ, ဒီးအိၣ်ကတဲာ်ကတီၤအသးလၢ တၢ်ဒုးလၢခံတဘျီအဂီၢ်န့ၣ်လီၤ.

ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်စ့ၢ်ကီး လိၣ်ဘၣ်တၢ်မၤစၢၤသပှၢ်တၢၢ်လၢပှၤအဂၤတဖၣ်အအိၣ်န့ၣ်လီၤ. တၢ်မၤစၢၤအသဟီၣ်အဂံၢ်ဆူၣ်ကတၢၢ်န့ၣ် မ့ၢ်ဝဲဒၣ် တၢ်ထုကဖၣ်န့ၣ်လီၤ. တၢ်အိၣ်ဖှိၣ်လၢ ဝ့ၢ်ရိမ့ၤ အဂီၢ်, ပှၤတၢ်မၢဖိ စီၤပီလူး ကွဲးဆှၢလီၤလံာ်ပရၢအပူၤန့ၣ် ပာ်ဖျါဝဲလၢ “ပုၢ်သ့ၣ်ဝဲၢ်သ့ၣ်ဧၢ, ယဃ့ကညးသုလၢ ပကစၢ်ယ့ၣ်ရှူးခရံာ်အဃိ, ဒီးတၢ်အဲၣ်ဘၣ်ဃးဒီးသးန့ၣ်အဃိ, ဒ်သိးသုကဂုာ်ဃုာ်ဒီးယၤ လၢတၢ်ဘါထုကဖၣ်အပူၤ, လၢယဂီၢ်လၢယွၤသပှၢ်ပှၢ်” (ရိမ့ၤ ၁၅:၃၂) န့ၣ်လီၤ. စီၤပီလူး ဃ့ကညးဝဲဒၣ်လၢ တၢ်အိၣ်ဖှိၣ်ဖိတဖၣ် ကဃ့ထုကဖၣ်တၢ်, “ဒ်သိးတၢ်ကထုးထီၣ်ကွံာ်ယၤ လၢပှၤတစူၢ်တနာ်ဘၣ်, လၢကီၢ်ယူဒၤ, အစုပူၤ,” (:၃၀), “ဒီးဒ်သိးယလဲၤမၤတၢ်ဆူ ယရူၤရှလ့ၣ်အံၤ, ကဘၣ်ပှၤစီဆှံအသး, ဒီးဒ်သိးမ့ၢ်ဘၣ်ယွၤအသးဒီး, ယကလဲၤဒီး ယသူၣ်ခုသးခုဆူသုအိၣ်, ဒီးဒိးတၢ်ခုၣ်တၢ်မုာ်ဒီးသု” (:၃၁) န့ၣ်လီၤ. စီၤပီလူး တူၢ်လိာ် အၢၣ်လီၤဝဲဒၣ် ခီဖျိလၢအတၢ်ရ့လိာ်ဘၣ်ထွဲလိာ်သးဒီးအဝဲသ့ၣ်တဖၣ်အတၢ်ကဲဘျုး ကဲဖှိၣ် (:၃၂) န့ၣ်လီၤ. အဝဲဂဲၤဆၢထၢၣ် ဃ့ထုကဖၣ်ဃုာ်ဒီးပှၤရိမ့ၤခရံာ်တၢ်အိၣ်ဖှိၣ်ဖိတဖၣ်, ဒီးမၤကတၢၢ်ဝဲဒၣ် အလံာ်ပရၢလၢတၢ်ဆိၣ်ဂ့ၤ, “ဒီးတၢ်ဃူတၢ်ဖိးအကစၢ်န့ၣ်,မ်အအိၣ်ဒီးသုခဲလၢာ်တက့ၢ်” (:၃၃) န့ၣ်လီၤ.

ပအိၣ်မူအိၣ်ဂဲၤ လၢကစၢ်ခရံာ်အဂီၢ်န့ၣ်, ပကဘၣ်ကွၢ်ဆၢၣ်မဲာ် တၢ်ထီဒုၣ်ထီဒါလၢနီၢ်ခိ, ဒီးလၢနီၢ်သး အဘၢၣ်ကဝီၤတဖၣ်န့ၣ်လီၤ. ကစၢ်ယွၤ ကအိၣ်ဒီးပှၤ, ဒီးကတြီဆၢဒုးတၢ်လၢပဂီၢ်န့ၣ် အၢၣ်လီၤဝဲဘၣ်ဆၣ်, ပကဘၣ်ဂဲၤဆၢထၢၣ်သကိး, ဒီးအိၣ်ကတဲာ်ကတီၤပသး လၢတၢ်ထုကဖၣ်န့ၣ်လီၤ.