ဖဲဖးဖီမုၢ်အကတီၢ်, ကယဲၢ်တၢ်အိၣ်အသးမၤအသးတဖၣ် မ့ၢ်တဘၣ်လိာ်ဖိးဒ့လိာ်အသးဘၣ်န့ၣ်ဒီး, မ့ၢ်နကကိးစံးကတိၤသကိးတၢ်ဒီးမတၤတဂၤကသ့ဝဲလဲၣ်. အပူၤကွံာ်အါနံၣ်အါလါ, ဖဲယနၢ်ဟူ တၢ်သံကွၢ်အံၤ အဆိကတၢၢ်န့ၣ် မ့ၢ်တၢ်လၢအမၤပျံၤမၤဖုးယသးန့ၣ်လီၤ. ဖဲယဘၣ်ကီဘၣ်ခဲအကတီၢ်, တံၤသကိးလၢ ယရ့လိာ်ဘၣ်ထွဲလိာ်သးတဖၣ်အကျါ မ့ၢ်ယနာ်သန့ၤအဝဲသ့ၣ် ကအိၣ်ဝဲဒၣ်ပှဲၤဂၤလဲၣ်. ယတသ့ၣ်ညါယဲလီၤတံၢ်လီၤဆဲးဘၣ်.

ကစၢ်ယွၤ အကလုၢ်ကထါ စံးဘၣ်ပှၤလၢ တၢ်ရ့တံၤရ့သကိးအဂ့ၢ်အါမး, ဒီးပာ်ဖျါဝဲဒၣ် တံၤသကိးလၢအသးတီတဂၤ (ကတိၤ ၁၁:၁၃, ၁၆:၂၈), ပှၤလၢအဟ့ၣ်ကူၣ်ဟ့ၣ်ဖးတၢ် (၂၇:၉), ဒီးပှၤလၢအပာ်ကဲ တၢ်ရ့လိာ်အဘၢၣ်ကဝီၤအဒူၣ်အဆၢ (၂၅:၁၇) န့ၣ်လီၤ. ဘၣ်ဆၣ်, တၢ်ပာ်ဖျါ တၢ်ရ့တံၤရ့သကိးအဂ့ၢ်, ကဂ့ၤဒိၣ်န့ၢ်ဒံး ကစၢ်ယ့ၣ်ရှူးန့ၣ် တမ့ၢ်ကအိၣ်ဝဲဘၣ်. ဖဲလၢပှၤဘိးဘၣ်သ့ၣ်ညါပာ်ဖျါတၢ်တဖၣ်အဂီၢ် ပမ့ၢ်တၢ်ဆါတၢ်ပှ့ၤအလီၢ်အကျဲ, ဒီးလၢတၢ်မၤကစၢ်တဖၣ်အဂီၢ်န့ၣ် ပမ့ၢ်အပှၤမၤတၢ်ဖိဘၣ်ဆၣ်, မ့မ့ၢ်လၢတၢ်ခဲလၢာ်အကစၢ်, ကစၢ်ယ့ၣ်ရှူးအဂီၢ်န့ၣ်ဒီး, ပမ့ၢ် “တံၤသကိးတဖၣ်” (ယိၤ ၁၅:၁၅) န့ၣ်လီၤ. တၢ်ရ့တံၤရ့သကိးလၢ ကစၢ်ယ့ၣ်ရှူး ပာ်ဖျါဝဲန့ၣ် သူၣ်ထီၣ်အသးလၢ ကစၢ်ယွၤ အတၢ်ဟ့ၣ်ခီနီၤလီၤ အတၢ်အဲၣ်, ဒီးဟ့ၣ်လီၤအသးသမူအလိၤ (:၁၃,၁၅)- တၢ်လၢ ကစၢ်ယ့ၣ်ရှူး အိၣ်မူဟ့ၣ်ဒိဝဲ, ဒီးမၤလိာ်ပှၤလၢ ပကအိၣ်မူမၤထွဲ (:၁၂) ဝဲဒၣ်န့ၣ်လီၤ.

ဖဲပနၢ်ဟူ တၢ်သံကွၢ်အံၤဝံၤ ခံနံၣ်လဲၤပူၤကွံာ်ဝဲန့ၣ်ဒီး, ယမါဒီးယၤ ပတူၢ်ဘၣ်ခီၣ်ဘၣ်တၢ်လီၤမၢ်ဖးဒိၣ်တမံၤန့ၣ်လီၤ. ဒၤရဲ (Darren) မ့ၢ်ပှၤလၢအသ့ၣ်ညါ ယတၢ်ဂ့ၢ်စှၤဂၤအကျါတဂၤ, ဘၣ်အိၣ်ဟဲဝဲဒၣ် တၢ်လဲၤ ခံနၣ်ရံၣ်အကျဲ, ဒ်သိးကဟဲထံၣ်ယၤ, ဒိကနၣ် ယတၢ်သးကိၢ်ကဲၤထီၣ်တၢ်, ဒီးယတၢ်သးဘၣ်ဒိဆါအဂ့ၢ်, ဒီးကဃ့ထုကဖၣ်န့ၢ်တၢ်လၢယဂီၢ်န့ၣ်လီၤ. ဒၤရဲ မ့ၢ်ပှၤလၢအတၢ်မၤအါ, တနံၤအတီၢ်ပူၤန့ၣ် အိၣ်ဒီးတၢ်ဖံးတၢ်မၤအဂုၤအဂၤတဖၣ် အါမး, လၢကဘၣ်မၤဝဲဒၣ်န့ၣ်လီၤ. ဘၣ်ဆၣ်, အဝဲအိၣ်မူလူၤပိာ်ထွဲ ကစၢ်ယ့ၣ်ရှူး အတၢ်အိၣ်မူဟ့ၣ်ဒိ ဒ်အမ့ၢ်တံၤသကိးလၢဟ့ၣ်လီၤအသးတဂၤအသိးန့ၣ်လီၤ. ဖဲလၢယလိၣ်ဘၣ်တၢ်နီၢ်နီၢ်အကတီၢ်န့ၣ် ယအိၣ်ဒီးတံၤသကိးတဂၤန့ၣ်လီၤ.

ခဲကနံၣ်အံၤ, တၢ်သံကွၢ်တမံၤမ့ၢ်ဝဲဒၣ် လၢပှၤဂုၤပှၤဂၤအဂီၢ် ယမ့ၢ် “တံၤသကိး ဖဲဖးဖီမုၢ်အကတီၢ်တဂၤ” စ့ၢ်ကီးဧၣ်န့ၣ်လီၤ. အဂ့ၢ်ဒ်အံၤ, တၢ်မၤအါထီၣ် တံၤသကိး တဖၣ်အလီၢ်န့ၣ် တၢ်ကဲထီၣ်တံၤသကိးအဂ့ၤဒ်န့ၣ်အသိးအဂီၢ်, မ့ၢ်လၢ ကျိၤကျဲအဂ့ၤအဝါတဖၣ် အိၣ်ဒၣ်စှၤထံၣ်အဃိန့ၣ်လီၤ.