ယပၢ်လၢ အလဲၤထီၣ်တၢ်ဆါဟံၣ်န့ၣ် ပဟံၣ်ဖိဃီဖိဒီးယၤ ပဟဲကိးက့ၤအီၤဆူဟံၣ် န့ၣ်လီၤ. အတၢ်ဆူးတၢ်ဆါန့ၣ် တၢ်ကူစါယါဘျါအီၤလၢ ကသံၣ်ကသီတန့ၢ်လၢၤဘၣ်အဃိ, ဒီးခဲကနံၣ်အံၤ, ပဘၣ်ရဲၣ်ကျဲၤမၤဘၣ်လိာ် တၢ်ယါဘျါကျိၤကျဲအသီတမံၤ, ခီဖျိဘၣ်အိၣ်ဝဲဒၣ်ထီဘိလၢလီၢ်မံခိၣ်, ဒီးလိၣ်ဘၣ်ဝဲ တၢ်ကဟ့ၣ်ဒုးအီၣ်ဒုးအီအီၤလၢ တၢ်ဆှၢနုာ်တၢ်အီၣ်အကျိၤဘိန့ၣ်လီၤ. ယဘၣ်ရဲၣ်ကျဲၤ တၢ်ယါဘျါယမိၢ် ကဖုတၢ်ဆါ တခီခီ, ဒီးတၢ်ဖံးတၢ်မၤတဖၣ် လၢတၢ်မၤလီၢ်စ့ၢ်ကီး ယဘၣ်ဘှါဆှဲမၤဝံၤဝဲဒၣ်တခီခီန့ၣ်လီၤ. လၢသူၣ်လီၤဘှံးသးလီၤဘှံးအပူၤ, ဘၣ်တနံၤန့ၣ်, ယနုာ်လီၤလၢ တၢ်လုၢ်ထံဒၢးထဲတဂၤဧိၤ, ဒီးကိးထီၣ် ကစၢ်ယွၤ- ပၢ်ယွၤဧၢ, မၤစၢၤလၢ်ဘၣ်ယၤတက့ၢ်. ဝံသးစူၤ ဟ့ၣ်လီၤဘၣ်ယၤဂံၢ်ဘါ, ဒ်သိးယကလဲၤခီဂာ်န့ၢ်ယဲ မုၢ်နံၤမုၢ်သီတဖၣ်လၢအကဟဲ အဂီၢ်န့ၣ်တက့ၢ်.

လၢတၢ်ကီတၢ်ခဲတဖၣ်အဃိ, စီၤဒၤဝံးစ့ၢ်ကီး အသူၣ်ကၢ်သးလီၤဘှါဝဲဒၣ် (စံး ၅၅:၂-၅) န့ၣ်လီၤ. အဖိခွါ စီၤအးဘရှါလိၣ် ထီဒါအီၤ, အတံၤသကိးတံၢ်နီၢ်တဖၣ်န့ၣ် ဟ့ၣ်လီၤကွံာ်အီၤ, ဒီးလၢဝ့ၢ်ယရူၤရှလ့ၣ်န့ၣ် တၢ်မၤစုဆူၣ်ခီၣ်တကးအတၢ်မၤတဖၣ်အဃိ, လၢအဂီၢ်တၢ်မၤစၢၤတအိၣ်လၢၤဘၣ်အကတီၢ်, စီၤဒၤဝံး စံးဝဲဒၣ်လၢ, “တၢ်ပျံၤ, ဒီးတၢ်ကနိးလီၤဘၣ်ယၤ, ဒီးယတၢ်ကနိးကစုာ်လုၢ်ဘၢယၤ” (:၅) န့ၣ်လီၤ.

ဘၣ်ဆၣ်, စီၤဒၤဝံး ဃုထၢဝဲလၢ ကနာ်သန့ၤ ကစၢ်ယွၤ (:၂၃) န့ၣ်လီၤ. စီၤဒၤဝံး နာ်ဝဲဒၣ်လၢ ယွၤ “တဟ့ၣ်ဟူးဝး ပှၤတီပှၤလိၤနီတစုဘၣ်” (:၂၂) န့ၣ်လီၤ. တၢ်နာ်န့ၢ် သ့တၢ်လၢာ်ကစၢ်တဂၤ အါနံၣ်အါလါအံၤန့ၣ် သိၣ်လိန့ၢ် စီၤဒၤဝံးလၢ, တၢ်ကီတၢ်ခဲတဖၣ် မ့ၢ်မၤဟူးမၤဝးပှၤဒၣ်လဲာ်, ပှၤနာ်သန့ၤအသးလၢ ကစၢ်ယွၤ န့ၣ် တတူၢ်ခီၣ်ဘၣ်ဝဲ တၢ်လီၤမၢ်ထီဘိဘၣ်, ဒီးတၢ်မုၢ်လၢ်တအိၣ်လၢၤဘၣ်န့ၣ် အသးတကလၢၢ်ဘၣ်ဝဲ နီတဘျီဘၣ်န့ၣ်လီၤ. စံး ၃၇:၂၄ ပာ်ဖျါဝဲလၢ “မ့ၢ်လီၤဃံၤဝဲဘၣ်ဆၣ် ဒီးတဟးဂီၤဝဲ တုၤအလၢာ်ဘၣ်. အဂ့ၢ်ဒ်အံၤ, ယွၤမၤစၢၤအီၤလၢအစုလီၤ.” စီၤဒၤဝံး သ့ၣ်ညါဝဲလၢ ကစၢ်ယွၤ ကဆီၣ်ထွဲ မၤစၢၤအီၤလၢအဂံၢ်အဘါ, ဒီးအတၢ်ကူၣ်သ့န့ၣ် ပာ်ဖျါဝဲဖဲ စံး ၅၅:၁၆ အပူၤ “ယကိးထီၣ်ယွၤ, ဒီးယွၤအုၣ်က့ၤခီၣ်က့ၤယၤလီၤ.”

ပဘၣ်ကဟုကယာ် ယပၢ်လၢဟံၣ်အဖၢမုၢ် တုၤဒၣ်လဲာ်တဆံလွံၢ်နံၣ် လဲၤပူၤကွံာ်ဝံၤ, ဖဲပပာ်လီၤ ပတၢ်ဝံဃၢတဖၣ်လၢ ယွၤအလိၤန့ၣ်ဒီး, ယွၤကမၤစၢၤပှၤလီၤန့ၣ် နံၣ်တဖၣ်အံၤ သိၣ်လိယၤ (:၂၂) န့ၣ်လီၤ. ကစၢ်ယွၤစိာ်ဝံ ပတၢ်ဝံဃၢတဖၣ်, စိာ်ဝံဃုာ်ဒီးပှၤန့ၣ်လီၤ.