ဖဲလၢတၢ်ထံၣ်လိာ်သံကွၢ် မံးနံး ၆၀ အပူၤန့ၣ် အလဲးစဲဒၢ မဲးကလံ (Alexander Mclean) စံးကတိၤပာ်ဖျါဝဲလၢ “လၢတၢ်အိၣ်မူအပူၤ ဘၣ်တဘျီဘျီ, တၢ်လၢပထံၣ်တဖၣ်န့ၣ် ပပာ်အီၤဒ် ပတထံၣ်အီၤတန့ၢ်တသ့ဘၣ်” န့ၣ်လီၤ. အဝဲမ့ၢ် ပှၤအိၣ်ဆိးလၢ ဝ့ၢ်လိဒိၣ်-ကလံၤထံးဖိတဂၤ (The South Londoner), ဒီးကလဲၤမၤစၢၤတၢ်လၢဃိာ်ပူၤ, ဒီးတၢ်ကဟုကယာ် ပှၤသးပှၢ် တဖၣ် အတၢ်မၤအဂီၢ်, လဲၤဝဲဆူ ကီၢ်ယူၣ်ကၢ်ဒၣ် (Uganda) န့ၣ် အသးအိၣ်ဒံးဒၣ် တဆံ-ဃိးနံၣ်န့ၣ်လီၤ. ဖဲန့ၣ်, ထံၣ်ဝဲဒၣ် တၢ်လၢအသးပ့ၤနီၣ်ဝဲတန့ၢ်တသ့တမံၤ- ပှၤသးပှၢ်လၢ ပှၤကမၤစၢၤအီၤတအိၣ်ဝဲတဂၤန့ၣ် မံစုၢ်လီၤအသးလၢ တၢ်ဟးလီၢ်အကပၤန့ၣ်လီၤ. မဲးကလံ အံးထွဲကွၢ်ထွဲဘၣ်အီၤထဲဒၣ် ယဲၢ်သီ, ဝံၤန့ၣ်ဒီး, ပှၤသးပှၢ်တဂၤအံၤ သံဝဲဒၣ်န့ၣ်လီၤ.

တၢ်လဲၤခီဖျိအံၤ မၤကဲၤကပီၤထီၣ် တၢ်သူၣ်ဆူၣ်သးဂဲၤလၢ မဲးကလံအသးကံၢ်ပူၤန့ၣ်လီၤ. အဝဲဒိးန့ၢ် တီၤဒိၣ်တုာ်လံာ်အုၣ်သးလၢ သဲစးတၢ်မၤလိဝံၤ, ဟဲက့ၤကဒါဝဲဆူ ကီၢ်အၤဖရံၤကၤ ဒ်သိးကမၤစၢၤ ပှၤလၢအဘၣ်တၢ်လဲၤကပာ်ကွၢ်ကပာ်အီၤတဖၣ်န့ၣ်လီၤ. လၢခံအကတၢၢ်န့ၣ်, သူၣ်ထီၣ်ဝဲ “တၢ်ဒီတဒၢဒီဒၣ် တၢ်စံၣ်ညီၣ်တီ” (Justice Defenders), တၢ်ကရၢကရိလၢ အစံးကတိၤမၤစၢၤ ပှၤဃိာ်ဖိတဖၣ်အဂီၢ်န့ၣ်လီၤ.

ပှၤအါဒံအါဂၤ ဘၣ်အိၣ်မူအိၣ်ဂဲၤဝဲလၢ တၢ်အိၣ်အသးမၤအသးတဖၣ်, တၢ်လၢပပာ်အီၤဒ်ပတထံၣ်အီၤ တန့ၢ်တသ့အပူၤန့ၣ်လီၤ. ဘၣ်ဆၣ်, ပတထံၣ်အဝဲသ့ၣ်ဘၣ်. လၢအထံကီၢ် တၢ်ဟးဂူာ်ဟးဂီၤအဂီၢ်, ဝံယံးရမံယၤ အတၢ်ကအုကစွါအပူၤန့ၣ် နဲၣ်ဖျါထီၣ်ဝဲ အတၢ်သးအုး, တူၢ်ဘၣ်ခီၣ်ဘၣ်ဝဲလၢ တၢ်တပာ်ထံၣ်အီၤအဃိန့ၣ်လီၤ. ဝံဟီၣ်ကအုကစွါဝဲဒၣ်လၢ “ကယဲၢ်ပှၤလၢအလဲၤတြူာ်လၢ ကျဲပူၤသ့ၣ်ဧၢ, တမ့ၢ်ဘၣ်တၢ်နီတမံၤဘၣ်လၢ သုစ့ၢ်ကီးဧါ. ကွၢ်ဆိကမိၣ် တၢ်ကိၢ်တၢ်ဂီၤ ဒ်တၢ်မၤယၤ… မ့ၢ်အိၣ်တအိၣ်လဲၣ်န့ၣ် ကွၢ်တက့ၢ်” (သးသယုၢ် ၁:၁၂) န့ၣ်လီၤ.

ဝံယံးရမံယၤ အသူၣ်အုးသးအုးဝဲန့ၣ် တမ့ၢ်ထဲ အနီၢ်ကစၢ်ဒၣ်ဝဲအဂီၢ်ဘၣ်. မ့မ့ၢ်ကယဲၢ် ပှၤလၢအဘၣ်တၢ်မၤနးမၤဖှီၣ်တဖၣ်ခဲလၢာ်အဂီၢ်စ့ၢ်ကီးန့ၣ်လီၤ. သးသယုၢ် ၃:၃၄-၃၆ အပူၤန့ၣ် ဝံသံကွၢ်ဝဲဒၣ် တၢ်သံကွၢ်လၢတလိၣ်တၢ်စံးဆၢတမံၤ, “တၢ်ယီၢ်လီၤလၢအခီၣ်ဖီလာ် ပှၤဃိာ်ဖိ ခဲလၢာ်လၢကီၢ်ပူၤန့ၣ်, တၢ်ဘိးဃၣ်ပှၤအတၢ်စံၣ်ညီၣ်… န့ၣ် ကစၢ်ယွၤ တထံၣ်ဘၣ်ဧါ” န့ၣ်လီၤ. ဘၣ်ဆၣ်, ဝံ ထံၣ်န့ၢ် တၢ်မုၢ်လၢ်, ဒီးစံးဝဲဒၣ်လၢ “ယွၤတညိကွံာ်တၢ်လီၤထူလီၤယိာ်ဘၣ်. ယွၤဧၢ, နလိာ်ယသးအကွီၢ်, နပှ့ၤက့ၤယသးသမူ” (: ၃၁,၅၈) န့ၣ်လီၤ.

ပှၤလၢတၢ်တပာ်တၢ်ထံၣ်အီၤတဖၣ် အိၣ်ဝဲဒၣ်လၢ ပခိၣ်ပဃၢၤဝးဝးန့ၣ်လီၤ. ကစၢ်ယွၤ, လၢအပှ့ၤက့ၤပသးသမူတဂၤ, အဲၣ်ဒိးဝဲလၢ ပကထံၣ်န့ၢ်, ဒီးကမၤဂ့ၤမၤစၢၤ ပှၤလၢတၢ်တပာ် တၢ်ထံၣ်အီၤတဖၣ်အဂီၢ်, ဒ်ကစၢ်ယွၤ ပျဲပကမၤသ့ဝဲအသိးန့ၣ်လီၤ.